لي صديق عزيز اسمه ( صبري الطويل ) و عيارته مواطن و له سوالف غريبة... و من سوالفه... انه حلم مره انه لقى ابريق علاء الدين مع قراشيع أمه... و طلع له جني الابريق ما غيره... و بعد الكليشه المعروفه – شبيك لبيك -
الجني: اطلب ثلاث امنيات و احقق لك منها اللي اقدر عليها
صبري الطويل: الحمد لله و بتحقق اح.... لحظه وش قصدك اللي تقدر عليها؟
الجني: يعني تمن و اذا ما اقدر احقق امنيتك تروح عليك امنيه
صبري الطويل: وش ذا حتى الجن صاروا صيني!
الجني: اذا عاجبك و الا بأرجع لأبريقي أبرك لي
صبري الطويل- بخنوع كالعاده-: لا تكفا، خلاص مثل ما تبي
الجني: يلا اطلب اول امنيه
صبري الطويل: ابغا حقوقي كمواطن... و اعيش حياة كريمة
الجني: الحين ملك الانسانية و صقر العروبة و الحوار الوطني و حوار الأديان... و عنده اصلح بطانه... و وراه جيش مستشارين... و مجلس الشورى... و فوائض الميزانيات اللي بالمليارات... و ما قدر يخليك تعيش مثل الاوادم تبي جني ساكن في ابريق يسوي لك شئ... الله يصلحك اطلب شئ معقول... و ترا راحت عليك امنية
صبري الطويل: طيب وش اطلب؟
الجني: اطلب شئ نفسك فيه او ينفعك مثلا موستنق كشف 2010 ...او ساعة لابرجيه مرصعة بالالماس... او قطعة ارض...
صبري الطويل – مقاطعا بلهفة - : عندك... وقف... هذا اللي بأطلبه قطعة أرض
الجني: تم... أبشر بقطعة أرض... لكن من الحين تراها خارج نطاق العمران
صبري الطويل: ايش... خارج العمران... وش اسوي بها... ابغا أرض داخل العمران اقدر ابنيها على حياتي
الجني: لو سمحت لا تدخلني في مشاكل... ترا وزير الشئون البلدية صاحب سمو ملكي... و الله بكره لو أخذت أرض داخل العمران ليصك علي في بيالة بادريق بدال الابريق... الله يهديك ضيعت على نفسك امنية ثانية باقي لك آخر امنية
صبري الطويل: لا حول و لا قوة الا بالله... ما بقى الا اطلب علوك... طيب عطني شوية وقت افكر
الجني: اجل فكر على راحتك و أنا بأنقز لمطعم المندي أتعشى قبل ما يقفلون... مثل ما تعرف بعد 12 في الليل تقعد تدربي راسك في الرياض ما تلقا لقمه الا بسكوت مالح و صيدر
و قعد صبري الطويل يفكر... وش يطلب... :
أطلب من الجني أنه ياخذ عمر الفاسدين اللي اكلوا البلد و افقروا اهلها؟ لا.. لا... لو يموت الفاسدين صار عندنا فراغ دستوري و سياسي و دخلت البلد في فوضى...
طيب أطلب منه ينزل اسعار الرز و المقاضي؟ لكن اذا كانت الدولة بكبرها ما قوت تجار الرز... لا و اعطتهم مليارات دعم و لا نزل سعر الرز بالعكس زاد... و الا حقين البيبسي رفعوا اسعارهم و لا حتى عطوا وزارة التجارة وجه... و الوزارة ما قصرت طلبت لهم اعفاء من الجمارك... لا... لا ما يصلح... اصلا الرز و البيبسي متوفرين ببلاش الله يخلي العروس..
أجل أطلب ينزل سعر الحديد.. لحظة... لحظة اساسا ما عندي ارض و لا فيه امل املك أرض لا في المستقبل المشرق و لا في المستقبل المظلم... اذا كان ولد صالح كامل اللي توه بايع قنوات أرت بسبعة مليار يقول الدولة لازم تخفض اسعار الاراضي لنا حنا المطورين العقاريين... و بعدين وش بأحتاج أسياخ حديد له؟ انا ما قد دورت على اسياخ الا للشوي في عيد الضحيه...
لقيتها أطلب منه يبني مستشفيات حكومية !... لكن وزارة الصحة بتجيب دكاتره من مصر يتعلمون فينا... و ممرضات فيلبينيات ينافخون علينا... و حد السعوديين سكورتيه... و أكيد أحسن مستشفى بيخلونه لفصل التوأم السيامية من غير السعوديين... مع أني ما أظن بقى في العالم سياميين.. فصلهم الربيعة كلهم... الا ان كان بيحول على القطاوه السيامية...
و الا ارسله لوزارة المالية... يصلح هالبزبوز الوحيد ابو ضغط عالي اللي ما يرش الا بره... لكن بيقدر؟ اذا كان موظف المالية النظيف النزيه يسمونه حمار الجت... يشيله و لا ياكله... و الحمد لله ما فيهم حمار جت...
اها ليش ما اطلب منه يخرب نظام ساهر؟ يفكنا من هالغرامات... لكن بدون ساهر بنعود نتذلل و نترجا حقين المرور لا يعطونا مخالفة... و تلقا الواحد منا أصلا ما خالف... يعني لا تسلم كرامتنا و لا جيوبنا... لا يا عم خل ساهر كل اسبوع يصكني بـ 2000 ريال مخالفات و افتك من ذل و اهانة المرور... يكفي الاهانات اللي اكلها من باقي الجهات الحكومية و غير الحكومية...
فجأة فتح الله على قلبه و لقى امنية ما بعدها امنية و قعد يحتري الجني الين جا و ريحته زفر و في فمه عود اسنان
الجني: هاه لقيت أمنية؟
صبري الطويل: ايه لقيت... ابغاك تغور البترول في اسفل الارض... و لا يوصل له احد
الجني: كيف... انت صاحي و الا شارب
صبري الطويل: لا شارب و لا لحية... اذا تقدر سوها
الجني: الا اقدر لكن ليه... وش تستفيد؟
صبري الطويل: اقول لك... اول شئ ما نفعني البترول بشئ... أول سعره كان بسبعة دولار و وصل الى ميه و اربعين دولار و الحال هو الحال... ما تغير شئ بالعكس... يوم كان بسبعه كان احسن شوي... الحين البترول له أكثر من سبعين سنه يسحبون منه... قلي وش لقينا منه... الكهرب الى يومك و هي تنقطع... لا و في مدن كبيره مو في قريه و الا هجره... و المويه يا تنقطع يا تجيك و نصها مجاري... و المجاري نفسها ما لها تصريف... حتى السيول لعبت فينا... ما قد خبرنا حتى على ايام بيوت الطين انه مات اكثر من مية ادمي من سيل... و المستشفيات اذا ما عندك واسطه... ما لك الا مره او حلتيت... و التعليم... و البطالة... و و و وخلني ساكت احسن … ثاني شئ البترول و فلوسه خلا الظالم يزيد ظلمه... و الفاجر يطلع فجره... و الفاسد يعم فساده...حتى أنقلبت أمورنا... الحين اكثر من ثلاثة ارباع الناس ما يملكون بيوت... نبني جامعة خليطي بعشرة مليار ريال!.. و عشان اربعمية طالب!... لا و نصهم اجانب... و الا نبني ملعب كورة بأكثر من سبعة و ثلاثين مليار ريال... و مواعيد مستشفياتنا بالشهور... و لا فيه مستشفيات الا في الرياض... نروح نبني مدينة طبية في البحرين... لا و هدية من الشعب... لعنبوا هالهدية الا ما احد استشارنا فيها... و هالبعثات اللي كب من عيالنا و بناتنا في الخارج... طيب الا رجعوا وش بنسوي فيهم... ما سعودوا الا سوق الخضار و السكيورتي... اقول نفذ امنيتي و يجي خير.
الجني: اسمح لي انك مغفل... مفروض انك طلبت وحده من ثنتين... يا انك حفظت امينتك الاخيرة عشان الا ودوك الحاير بعد كلامك هذا اطلعك منه... او انك تمنيت انك تسكن معي في الابريق.
و صحا الحبيب من النوم و هو يدندن.. زودن على هم الليالي …... تكرمون
05-06-2010, 02:42 PM
صبري الطويل
العرض العادي
