لقيت البديل لمواد التنظيف.......

**إلى متى...؟** · 31-08-2007, 12:09 AM

بسم الله الرحمن الرحيم

السلام عليكم ورحمة الله وبركاته,

بالنسبة لمواد التنظيف عندكم منتج سعودي اسمه " مذهله" بصراحه اسم على مسمى
سائل تنظيف المواعين 3 كبار نفس علب اللوكس حجم كل علبه 1 لتر بـ10 ريال والله انه رغوه وينظف الصحون والمواعين كلها احلى تنظيف ولا يسبب حساسيه ولا شيء صار لنا حوالي سنه نستخدمه.
وحتى سائل تنظيف اليدين اول نشتري واحد بـ17 ريال نسيت اسمه لكن لما لقينا"مذهله"غيرنا تخيلوا 4 لتر بـ5 ريال وثقيل ورغوه روعه ولا يسبب الحساسبه عن تجربه..
ونزل جديد كلوركس مذهله بـ5 ريال شريناه بس لسا ماجربناه لان عندنا واحد مفتوح اذا جربناه اقولكم وكمان سائل تعطير الملابس مذهله بـ5 ريال كمان ماجربناه للحين لان عندنا واحد مفتوح...

انا ماسوي دعايه للمنتج الا عن تجربه بصراحه وحنا نشتريه من عند رامـــــــــــز.....

واذا على السعر رخيص مع انه جيد برايي لعدة اسباب :
1- ماله دعايه وانتم عارفين ملايين تندفع على الدعايات لان الناس تركض وراها
2/انه منتج سعودي يعني مايتكفلون مصاريف شحن وتصدير ورسوم وماادري ايش
على طول ينزل للسوق.....

جربوه واحكموا بانفسكم......

**أيامنا الحلوه** · 31-08-2007, 12:28 AM

شكرا على نقل تجربتك إلى متى
بس تدري وين المشكله ؟؟؟؟؟؟؟
اني مدري وين احصل هذا المنتج اللي ذكرته على كثر ما رحت اسواق ومراكز ما عمره مرّ علي
وكثير من البدائل اللي يذكرونها الاخوان ما احصلها
الظاهر فيه اتفاق بين المحلات واصحاب الشركات الكبيره مايعرض الا منتجاتهم

**ضد الطمع** · 31-08-2007, 12:51 AM

يعطيك العافية على النصيحة ..

بس اذا انتي من الرياض ياليت تقولين لي وين لقيتيه فيه ؟؟

لأن مثل ما قالت أيامنا الحلوة انه اشياء كثيرة تنذكر كبدائل وما نلاقيها ..

**إلى متى...؟** · 31-08-2007, 03:26 AM

انا من الدمام وموجود عند محل كبير اسمه "رامــــــــــــــــــــز"
ابي اشوف كيسته واكتب وين فروعه الثانيه ان شاء الله يكون فيه فرع بالرياض
وغيره من المناطق...........

**ضد الطمع** · 31-08-2007, 03:33 AM

يعطيك العافية ..

بأنتظارك ..

**التاج2** · 31-08-2007, 04:23 AM

انتبهوا من رامز الحين يستغل الوضع ويرفع الاسعار بعد

يعطيك العافيه وان شاء الله بنجربه...

**إلى متى...؟** · 31-08-2007, 03:22 PM

فروع رامـــــــــــز
الرياض-النسيم-شارع حسان بن ثابت-مخرج30
الدمام-الحياة بلازا
تبوك-شارع جده-حديقة فن بارك
حفر الباطن-المحمديه

**ضد الطمع** · 31-08-2007, 04:04 PM

الى متى ..
يعطيك العافية على الافادة ..
يالله ان شاء الله يوافقون اللي عندي يدقون مشوار للنسيم .. مع اني ما اتوقع بس نحاااااااول ..

**الفقير** · 31-08-2007, 10:02 PM

ألف شكر على التفاعل مع المقاطعة وإلى الأمام كل واحد يعطينا خبراته

**إلى متى...؟** · 31-08-2007, 10:19 PM

تصدقين يا أختي ضد الطمع ان أهل البحرين يجون يشترون من عند رامز
وكل اهل الدمام يشهدون بكذا لانه رخيص واللي عنده مو بس منظفات
كل شيء بخص البيت واهله حتى الملابس الاقمشه المكياج العطورات
الالعاب الاواني المنزليه كل شيء باختصار..........واسعارهم رمزيه مقارنة بالمحلات
والمجمعات الاخرى يبيعون كل شيء الا المواد الغذائيه.....