السلام عليكم ورحمة الله وبركاته

إلي أصحاب القلوب الرحيمة: قمنا نطر يا عالم .. بس للضرورة أحكام .

\\

\\



مرحبا بكم يا أعضاء احلا منتدى

قررت نشر مشكلتي بشتى ارجاء النت لعلي اجد حل لما الت اليه حالي

ارحموا عزيز قوم ذل

دموع كثير ذرفتها وأنا راجع أمس من المطار لكن دموعي كانت تجف بسرعة لأني فاتح الشباك وما اقدر أسكره لان الدنيا حر

جتني فكرة مراسلة جميع المنتديات أمس عقب ما رحت للخطوط الجوية على أساس أشوف وش صار بوظيفتي المرتقبة اللي صار لهم 6 شهور يسحبون فيني وأخير شي قالوا لي ( اقضب الباب )




قصتي الحزينة

بعد رمضان أي العام المنصرم صرم الله روس أصحاب الواسطات اتصل بي احد الأصدقاء وقال لي: خلاص ودع وسادتك جاك الموت يا تارك الشغل

قلت له خير وش صاير يا أبو التخريعات..؟

قال أبشرك فيه تقديم بالخطوط الجوية الحق لك مقعد هناك قبل لا تطيّر الواسطات اللي لكم يا أهل الله ..لأنه في هـ الزمن ليس لكل مجتهد نصيب

وعلى الفور فزيت من مكاني من فرحتي لبست شماغي وعقالي قبل البس الثوب وعلى طول امتطيت صهوة جواد سيارتي التي ملت مني بس لازم اشكرها لأنها ما عمرها قالت لي "لا" ماني مشتغلة إلا لما أكون بحاجتها

مالكم بالطويلة دقيت الباب على جارنا وقلت له بالله اشرك سيارتي أبي أروح لقيت وظيفة والفرحة تملا فمي ووجهي

وما قصر جارنا الطيب واشرك سيارتي

انطلقت إلي الخطوط الجوية بالحر والغثا والمرض من الجو الرهيب لان سيارتي فيها مكيف وما خرب من يوم شريتها

وصلت هناك وقدمت أوراقي سألوني سؤال واحد عقب ما آخذو أوراقي

( شلونك باللغة الانجليزية ) قلت لهم ممتاز ولله الحمد

وبعدها آخذو رقم جوالي مع انه مكتوب على بطاقة الأحوال وقالوا لي نتصل فيك

ذهبت إلي المنزل وبدأت بترتيب أوراقي والتفكير بما بعد الوظيفة

وعلى شان يكون التفكير صافي رحت لفراشي واستلقيت على قفاي

من أول ما استلم الوظيفة راح أقول لمي تخطب لي فلانة لأني راح أساهم بالحد من العنوسة لا لا فلانة ما أبيها أبي فلانة لا ما أبي فلانة الثانية أبي علانه ومنذ ذلك الوقت وأنا أفكر

راح أتضامن مع اخوي ونشتري بيت مو مشكله خلني أسدد على مدى عشرين سنه بس أهم شي عيالي يرتاحون

بس إذا شريت البيت أنا واخوي ماراح نتزوج ولا يتهنون عيالي بالبيت لان القرض بيكسر ظهورنا واصلا انا مدري كم راح يكون راتبي

طيب إذا تزوجت ماراح اقدر اشتري سيارة بدل سيارتي الموديلها 1992 لحول هذي المسالة لازمها محاسب قانوني ويعجز عنها

إن شاء الله يتصلون قريب وبخصوص الزواج والبيت وعيالي اللي بيتهون لكل حادث حديث



مر أول أسبوع ولحقه الثاني وأنا انتظر وطوى صفحته أول شهر والعالم زحمه عند الصرافات وأنا بس أناظرهم وأقول الله يهنيهم وان شاء الله قريب اصف معهم

ومر الشهر الثاني وأنا على حطت يدك لا من تمي ولا من كمي

وطوى صفحته الشهر الثالث وأنا حزين ومقهور وحاتلي ما يعلم فيها الا رب العالم ولكن الحمد لله

وبعد طول انتظار رن جوالي

أنا : الو

الشخص الغريب : معك فلان من الخطوط الجوية

أنا: قسم حتى ضرس العقل بان عندي من كبر الابتسامة هلا اخوي بصوت مرتجف مع دقات قلب قويه تعبيرا عن فرحتي

الخطوط الجوية : <<< (غيرت اسمه بعد ما عرفته) تجينا بنادي الخطوط الجوية على خريص بكره الساعة 8 صباحا فيه اختبار انجليزي

انا : الله يبشرك بالخير ابشر من عيوني

سكرت وطرت على امي ابشرها بالاختبار وبعد الاختبار ان شاء الله الوظيفة

رفعت يدينها أمي وقالت الله يوفقك يا وليدي

صليت ركعتين شكر لله وتبعتها بركعتين لان رب العالمين يستاهل واحنا مقصرين

وانتظرت يارب متى يجي بكره ... يا الله يا بعد بكره عن اليوم

رحت لفراشي حاولت أنام على شان اقتل الوقت ماجاني نوم تقلب حاولت مافيه مجال النوم طار من عيوني

حركت من بيتنا الساعة 6 الصباح ما قدرت اصبر مع إن نادي الخطوط الجوية يبعد عن بيتنا ربع ساعة مع الزحمة

وصلت هناك الساعة 6:10 لأني مستعجل أبي أوصل أول واحد

المهم لقيت سيارات كثير قلت شكل الموظفين مداومين زين أول ما دخلت لقيت القاعة مليانه شباب مثلي يبون وظائف دورت لي كرسي ما لقيت قلت خيرة خلني اوقف شوي

مع العلم ان الوظائف المطلوبة 20 وظيفة وكان عدد المتقدمين حوالي 200 شخص

قلت بقلبي راح يطير منهم حوالي 150 بسبب عجزهم على اجتياز الاختبار لان مثلكم عارفين شبابنا بالانجليزي ( ميح )

دخلونا قاعة الاختبارات وجانا شخص أجنبي وقال باللغة الانجليزية ( حطوا جوالاتكم على الطاولة وافتحوا الغطا وطلعوا البطارية وحطوهم على الأرض )

انا على طوووول سويت مثل ما قال التفت وراي الا محد فيهم سوا شي والله يا عالم بدون مبالغه العالم مبلمين على هالصبحيه

جانا سعودي قال طلعوا البطاريات وحطوا جولاتكم على الأرض وفعلا سويها بعد جهد جهيد



المهم بلشنا بالاختبار

وكانت مدة الاختبار 1:30 دقيقه

وأنا احل الاختبار قلت بقلبي راح اخلص أول واحد وتفاجأت بان ثلاث أرباع القاعة خلصوا قبلي مع أنهم ما عرفوا وش قال صاحبنا الأجنبي

المهم حليت الاختبار ولله الحمد والمنة ورحت للبيت وانا فرحاااااااااااااااان حيييييييل

طبعا سألتهم عقب ما خلصنا لاختبار وش بعدها قالوا نتصل عليكم ( يا شينها من كلمه نتصل عليكم )

رحت للبيت وأنا فرحان وطاير من السالف ذكرها

وبدأنا مرحله الانتظار ,, يا الله على هـ الانتظار قاتل والله قاتل

المهم بعد تقريبا شهر من الانتظار اتصل نفس صاحبنا تبع الخطوط الجوية الساعة 7 صباحا وقالي عندك مقابله شخصيه اليوم بالخطوط الجوية الساعة 8 صباحا يعني بعد ساعة

على طول لبست نص ملابسي بالسيارة لأنه ما عندي إلا ساعة وحده على المقابلة

وصلت هناك 7:50 دقيقه صبحا

ولقيت الموجودين حوالي 5 أشخاص وأنا سادسهم ... !!

قلت بقلبي وين الـ 200 شخص اللي اختبروا معقولة ما نجحنا إلا حنا ... ؟

المهم دخلت المقابلة ولله الحمد والمنة تكللت بالنجاح الباهر ونسمت شوي باللي قابلني وقدرت ارسم الابتسامة على براطمه

وعقب ما خلصت سألته السؤال المعهود ( وش بعد المقابله ) قالي نتصل عليك بعد أسبوعين إن شاء الله

قلت طيب

وطلعت ونفس السيناريو بشرت أمي ودعت لي وانا صليت ركعتين شكر لله

وبدأنا مشوار الانتظار

مر أول أسبوع ولحقه الثاني ولا حس ولا خبر وجاء الأسبوع الثالث ولا اتصال وخلص الأسبوع الرابع وما فيه حس ولا خبر

وانطلقت أمس 2008/3/30 الموافق 1429/3/22 هـ إلي المطار والخوف يعتريني .. المهم وأنا في طريقي صادفني تفتيش المطار وقال إثباتك واستمارة السيارة

عطيته الاستمارة وبطاقة الأحوال قالي وين الرخصة

قلت له : ما عندي

قال لي: ليش

قلت له والله ما عندي فلوس اطلع رخصة لان على مخالافات 1500 ريال وعجزت أسددهم ناهيك على التامين ورسوم الرخصة وانا رجال حالتي على قدي يعني اطلب من الله الستر

قالي لبق على جنب ... !

لبقت على جنب وأخذت مخالفة عدم وجود رخصه قيادة وكانت بـ 300 ريال قلت مو مشكله أسددها ان شاء الله بعد الوظيفة

وصلت المطار ودخلت على مسئول التوظيف وقلت له وش صار على الوظيفة ....؟

قال : وش اسمك قلت له فلان الفلاني

طقطق بالكمبيوتر وقالي اسمك مو مع الموظفين الجدد يعني راحت عليك يا ابني

اقسم بالله يا عالم عجزت أرد عليه .. خنقتني العبرة أبي أتكلم ما اقدر أخاف إن تكلمت تفر الدموع مني وما أبي أبين انكساري أمامهم

قعد يتعذر الموظف مني ويشجعني وأنا منزل راسي وحزين وامتلأت عيوني بالدموع وقبل ما تنزل دموعي طلعت وهو يتكلم لأني خلاص معاد اقدر أتحمل أكثر

رحت لسيارتي ودموعي تسبقني

تهدمت أحلامي اللي بنيتها الزواج والسيارة والبيت وكل شي

لا فلوس ولا وظيفة ولا شي والله يا عالم اني أحس اني مهمش مالي أي داعي ولا لي وجود أصلا ولا كيان

كله بسبب اني عاطل





يا عالم انا خريج ثانوية عامه/ علمي / بنسبه 87% أجيد اللغة الانجليزية وأجيد استخدام الكمبيوتر

وفني أجهزه مرئية ومسموعة وعندي كثير من المهارات

وأكاد اقسم بان اللي اخذوا الوظيفة ما حضروا لا اختبار ولا غيره





اللي عنده وظيفة لي يا عالم يتصل فيني


معانات شاب فقد الامل وخايف من الضياع


==============

بقلمي العام المنصرم لكن الحمد لله الحال زانت

بس باقي غيري ملايين ينتضرون دورهم بالوظائف

انا حماني الله من الضياع يا ترى يالقصيبي كم واحد ماراح ينحرف مثلي

أي وظيفة يالغالي ... أبشر

ماهي مؤهلاتك

بيض الله وجهك يا غالي وواصله يالحبيب

هذا الكلام قبل سنه الحين اللهرزقني من اوسع ابوابه بيضالله وجهك

تهدمت أحلامي اللي بنيتها الزواج والسيارة والبيت وكل شي

لا فلوس ولا وظيفة ولا شي والله يا عالم اني أحس اني مهمش مالي أي داعي ولا لي وجود أصلا ولا كيان

كله بسبب اني عاطل

من بحالته اسمه معطل وليس عاطل
رغب بالعمل ومنع .... من أجل ابناء الواسطة
الله يسهل رزق عيالنا ولا يتكلهم على أحد

الله المستعان

والله كل مرة أحس بنعمة الوظيفة الحمد لله

والله سترها علينا ، اللهم استر على جميع شبابنا

هلوساتك طريفة !!

لاحول ولاقوة الإبالله
للأسف هذا حال الآف الشباب

بصراحة انا من وجهة نظري اعتبر ان الذي يبحث عن الوظيفه فقط هو شاب كسول وغير طموح

العمل الحر واسع والتجاره بأنواعها مربحه لمن يفكر بعقله ويدرس خطواته

وغير ذلك دخل غير محدود , على قدر جهدك تجد مربحك

وعني انا كنت موظف في الخطوط السعودية لمدة 13 سنه ,, وتقلدت اكثر من منصب في جهات اشرافيه

وعملت بكل جهد واخلاص ,,,,,, ولكن مالنتيجه ؟؟؟

مجموعة خطابات شكر + شهادات دورات !!

اين العائد المادي ؟

اين هي مكافئات وزيادات في الرواتب ؟

لاشيء , بمعنى انت تعمل بأخلاص وغيرك نائم وفي اخر الشهر نفس المرتب

مافائدة خطابات الشكر مافائدة الاعمال الاشرافيه في المواسم التي تم تنفيذها بنجاح وبدون تأخير للرحلات

,,,, بعدها قررت ان اجمع جهدي واصبه في تجارتي الخاصه ,,,,

والحمد لله وبفضل من الله تكللت خطوتي بالنجاح

وتحسرت على 13 سنه قضيتها في الوظيفه بدون فائده سوى راتب شهري ثابت

والله ياشباب نحن لاينقصنا ذكاء ولا ينقصنا طاقة ,, فلماذا الكسل والرغبه في عمل يقدم لك تنجزه وينتهي دورك

وتنتظر اخر الشهر حتى يأتي الراتب ,,

ارجو من الله عز وجل التوفيق والنجاح للجميع ,,

والله يحفظكم .

الله يوسع على المسلمين والمسلمات ويرزقهم

أعجبني رد الأخ / قوانين .. لأنه صادق ..

أعرف لك واحد يقول ( إحنا نستخسر النهوض مبكرا للأعمال التي تخصنا ) لكن إذا جاتك وظيفة تلقاك تقوم تقل مقروص .. !! يعني غير كسول تماما في الوظيفة ..

طيب ... إذا كنت تقدر تقوم بدري وتدور لك بزنس ولو متواضع ( فثق تمام الثقة أن البزنس قابل للمكسب مع العزيمة والصبر ( وتوفيق الله )

كل التجار عندنا مالهم وظايف .. حاطزين على تسبودنا ومغير يمصون اللي في جيوبنا .. هم في الغالب غير موظفين .. وتسعة أعشار الرزق في التجارة ..

تعمل بجد أو لا تعمل بجد أنت وزملائك الموظفين بنفس الراتب ونفس الغثاء

على يدكم انا ما املك راس المال

اذا انت الله فاتحها عليك ترا غيرك الرزق بنقط تنقيط

افتح مشروع بالهوا ... ؟