مرحبا ألف و 1000 و 100 و 400
معاليش صارت الدعوى أسعار الأضاحي
.
أول شيءأقول لكل عضو عشر مباركة ، وكمان عيدكم مبارك و زين ومعمر وبشار ....وووواو عسى ما أجيب العيد ...والا هو جاء بنفسه

.
.

يا شباب و شيبان
.
.
عندي موضوع منقول
وإن شاء الله تستفيدون منووووووووووهووووووو هي !
.
الموضوع كتبته إحدى الأخوات الفاضلات
وهو تجربه لها
.
وأنا أبنزل الموضوع على شكل حلقات
أهم شيء
المتابعة
والقراءة للموضوع بدقة
7
7
7
نبدأ
الحلقة الأولى
بالنسبة لمزانية البيت انا المتحكمة فيها من اول زواجي لان زوجي مشغول طول الوقت ومو فاضي لهذي الامور

انا طريقتي بالتوفير غير باكتبها يمكن انها تساعد احد فيكم وفي البداية محتاجة لشوية وقت
وتنفع للعائلات الكبيرة

اول شئ مستلزمات البيت من ادوات التنظيف
( ديتول وفيري وتايد وغيره ) القصدير واكياس الزبالة بمقاساتها واكياس حفظ الاطعمة واسفنج الغسيل والمعجون وجميع انواع المناديل ( اي شئ غير الاكل ) حتى شامبو الشعر والشور جل لاني ما استخدم غير نوع واحد من سنين ولاعندي امل اني اغيرهم حتى الالويز, ما لها وقت انتهاء عشان كذا اشتريها بالكراتين والدرزن( 12او24 حبة يعني سنتين حبة في الشهر) مرة بالسنة واحيانا يبقى اشياء منها للسنة الثانية يمكن يكلف الموضوع مرة بالسنة من 4000 الى ثلاثة الاف حسب الماركات المشتراة وكميتها
واحطها بغرفة المخزن او دولاب واقفل عليهم وما احد يدخل المخزن او يفتح الدولاب غيري لاشغالة ولا احد

لاتتفاجئ من المعروف انك اذا اشتريتي مثلا الفيري الكبير من السوبرماركت ب 8 او 9 ريال
واذا اشتريته من محل الجملة بالدرزن بيكون الحبة تقريبا ب 7 ريال او ارخص لكن اذا اشتريتها بالكرتون من المورد او مكتب التوزيع او مندوب المبيعات او المصنع نفسه بيكون سعر الحبة ارخص لانك تشتريه بسعر المصنع مثل تجار المفرق
((انا اشتري صابون التايد كيس مثل كيس الارز 25 كليو ب 88 ريال وكل شهر اعبي سطل صغير يزن 2 كيلو مع كوب قياس واحطه بغرفة الغسيل كل شهر يكفيني الكيس لمدة سنة وحدة
انتي عارفة انه كيس التايد على ما اعتقد 2 كيلو ب 14 ريال بالسوبرماركت ( شفتي الفرق بالسعر ) وعليك القياس على باقي المواد ))

عشان كذا اول خطوة انك تشوفي فين مواقع مخازن او مكتب توزيع البضاعة للمصانع ( بالنسبة للي في جدة تلاقيهم في باب شريف او الحلقة ) في مدينتك
طيب كيف تلاقيها اقري الملصق على المنتج وتلاقي عنوان ورقم المورد او المصنع واتصلي وخذي العناوين احيانا يحطوا ارقام مجانية للاستفسار استخدميها
واسألي لا تنحرجي خليكي جريئة واذا احرجك الرجل قولي له انك بتفتحي سوبرماركت صغيرة وحابة تعرفي كيف توفري البضايع واذا مرة ذابحك الحيا خلي زوجك يكلم ويسأل ممكن اذا لقيت شاحنة التوزيع والموزع ( او المندوب) انك تسأليه اذا ييبع لك الكرتون بنفس سعر التجار وبتلاقيه يوافق لانه ياخذ نسبة عمولة على التوزيع
يمكن تشوفي طريقتي صعبة او مكلفة لكن صدقوني والله مريحة وموفرة بشكل رهيب انا اشتريت كراتين من جميع انواع اكياس البلاستيكات والمناديل لها سنتين عندي وماخلصت

بالنسبة للاستخدام كل شهر اطلع من المخزن على حبة من كل نوع منظف حتى لو مخلص القديم واحطها بكرتونة واسلمها الشغالة طبعا انا مفهمتها لو تخلص مافي غيرها عشان تنتبه لكمية الاستخدام ( قبل مايكون عندي شغالة كنت احطها بدولاب المنظفات في الطبخ ) واكياس زبالة واكياس حفظ اطعمة وقصدير على قدر حاجتي للشهر
هذي الطريقة راح تغنيك من شراء المنظفات كل شهر ولمدة طويلة اشتري كرتون الفيري فية 24 حبة يعني يكفي لمدة سنتين كل شهر حبة وبكذا الميزانية الشهرية تخف




.

الحلقة الثانية
.

المواد الغذائية

انا اشتريت ثلاجة او برادة مثل حقت المحلات واللي تعرض فيها المشروبات او الاجبان بباب زجاج مقاس كبير( شفت اعلان تقبيل سوبرماكت واتصلت عليهم وسألتهم بكم يبعونها وارسلت اخوي يكشف عليها هي ممتازة والا لأ او شوفي مصانع المواد الغذائية يمكن توفرها او المحلات انتي وشطارتك ) وحطيتها بالمخزن واشتري حسب الحاجة بالدرزن او (( بالكرتون خاصة المواد المستخدمة بشكل مستمر)) من محلات الجملة او الموزعين مثل الكاتشب والقشطة و المكرونة والحليب وغيره خاصة الشكولاتة والعصيرات للي عندهم اطفال ( طبعا اركز على تاريخ الانتهاء لازم يكون بعد سنة) واحطها بالثلاجة ليش عشان ما تخرب من حرارة الجو او الرطوبة وبكذا اضمن انها بتكون صالحة حتى تاريخ انتهائها لمدة سنة
حتى البهارات المعروفة اشتريها بالكيلو واحطها بالفريزر واخذ قدر حاجتي بعلب صغيرة
يعني بيمر وقت طويل ماراح تحتاجي نزول السوبر ماركت الا لشراء بعض الحاجات الغريبة والغير مستخدمة بشكل كبير عند الحاجة

بالنسبة للتمر مخصصة فريز له فقط كل سنة نشتري ( السكري والخلاص) وقت الموسم كميات كبيرة من نفس المزارع لانه يكون ارخص واوزعها بعلب صغيرة للاستخدام

بالنسبة للخضار الانواع اللي ممكن انها تتفرزن اشتريها بالصناديق من الحلقة ارخص
اما الباقي من الخضار والفاكهة اشتريها على قدر حاجتي بالاسبوع

.
.
.

الحلقة الثالثة
.
المكالمات الهاتفية
استغلي برنامج قطاف اذا الجوالات والهاتف باسم الزوج او اسمك اشتركي بالبرنامج ( راجعي النشرة من الموقع ) وحولي النقاط مكالمات مجانية لجوال ولدك او بنتك( بس لازم يكون الجوال المستخدم باسمك او اسم زوجك) او رسائل جوال مجانية لك او اذا ما عندك اشتراك دي اس ال حولي النقاط لاتصال نت مجاني ( 200 نقطة فيها 23 ساعة اتصال نت مجاني اذا ماكنت غلطانة)
انا من اول مابدأت الخدمة كل رسايلي مجانية بسبب قطاف
بالنسبة للهاتف اذا اهلك او اي قريب خارج المنطقة اشتركي بخدمة الاهل ممتازة وتوفر عليك

سويت دعاية للاتصالات لكن ادخلي الموقع وبتلاقي عروض حلوة واستغليها
بالنسبة لموبايلي ماعندي خلفية لكن ادخلي وشوفي العروض وقارني واختاري الخدمة الافضل لك

بالنسبة للانترنت اذا استخدامك كثير وفي اكثر من شخص يستخدم النت افضل حل هو الدي اس ال
في البداية بتكون التكلفة عالية اول مرة بس بعد كذا بتكون الفاتورة ثابتة
اشتراك 300 ريال + مقدم شهرين 240 ريال + بطاقة لمدة شهر 200 ريال + موديوم لجهازين او اكثر 500 ريال = 1300 ريال تقريبا
لكن بعد كذا راح تدفعي فقط كل شهر اشتراك هاتف 120 ريال + بطاقة 200 ريال = 320 ريال اتصال نت مفتوح 24 ساعة بدون توقف
.
.
.
فاصل ثم نواصل
,
بقي حلقات أخرى
أبكملهن بعد الصلاة إن شاء الله
فقد أذن المؤذن لصلاة العصر
.
أبروح أصلي ثم أكمل الحلقات
.
.

.
الحلقة الرابعة
.

المستوصفات والمستشفيات
اول شئ انصح عن تجربة اذا عندك اطفال خاصة من الولادة عليك بالمستوصفات الحكومية التطعيمات مجانية وكل شهر تروحي ياخذوا فحص للبيبي من طول ووزن وغيره

او اذا حالة المريض مو خطرة راجعيهم مثل مرض سكر او ضغط صرف الادوية مجاني
اذا شاكة بموضوع مرض اطلبي تحويل على المستشفى وهم على طول يحولكم لا تقول لي مواعيدهم طويلة ووو غيره من الاعذار البايخة والله اذا شك الدكتور ان الحالة محتاجة لمتابعة على طول يخلي المواعيد قريبة (( عن تجربة باخي الصغير عندما امي راجعت فيه على اساس انه عنده الغدد وملت من الخاص وكلامهم والله انهم اكتشفوا السرطان قبل ما يتكون وغير كذا من اشاعات والتحاليل والعلاجات المجانية اللي ماصدقنه انها متوفرة عندهم او انهم بهذا المستوى العالي مع ان الشكل الخارجي للمستشفى ما يأهل ))
ولي صديقة اجرت عملية تجميل بمستشفى الملك فهد بجدة مجانية
ووحدة ركبت تقويم اسنان كل اللي دفعته قيمة المواد وكلفتها 1000 ريال فقط والباقي مجاني
يعني اللي راح تتحمل المواعيد بتوفر مبالغ طائلة خاصة اللي عندهم اطفال ومحتاجين تقاويم اسنان او علاجات ثانية

اما اللي مالها خلق على الحكومي اذا رحتي لاي مستشفى قبل لاتدفعي الفلوس اسأليهم اذا زوجك يشتغل بوظيفة حكومية اذا فيه خصم للموظفين الحكوميين واهلهم واعطيهم مسمى الوظيفة او مكان العمل مو خسرانة شئ اغلب المستشفيات تعمل خصومات او اذا المستشفى تصرف بطاقة تامين صحي خاصة فيها شوفي مميزاتها والخصومات عليها واستفيدي

,
الحلقة الخامسة
.

في حاجة مهمة

اغلب الناس تهملها

وهي

بطاقات العضوية

و الخصومات لبعض المحلات

لاتقولي مالها فايدة او تعمل حسم قليل

لا كل شئ فية توفير حتى لو ان شاءالله 40 ريال حسم على مشترواتك يعتبر انتي الكسبانة

(( كل اللي عليك انك تجمعي الفواتير اذا وصلت مبلغ معين قديمها واحصلي على العضوية مجانا))
من المحلات اللي مشتركة فيها
السواني , مكتبة جرير , سيتي بلازا , المخازن الكبرى , ايكيا
(( ياليت اللي تعرف غيرها من المحلات اللي تقدم عضويات تبلغني عشان اشترك ))
انا عندي جوال خاص ( فقط لاستخدامات العمل والمحلات والبوتيكات والمطاعم اواذا كنت بتفق على طلبية وطلبوا رقم للتواصل) اذا رحت لمحل اسألهم اذا عندهم خدمة تبليغ برسايل الجوال وقت التخفيضات واذا كان عندهم اعطيهم الرقم ( يعني ماعندي خوف ان رقمي ينتشر او تجيني ازعاجات لانه خاص فقط لهذا النوع من المكالمات) وبكذا اكون على اطلاع على العروض والتخفيضات اول ما تبدأ

الحلقة السادسة
.
الخروج للنزهة
سبق وقلت ماعندي اطفال
لكن اللي مستغربة منه ليش الواحد ما يخرج اطفاله الا ايام الخميس ليش مو وسط الاسبوع

بعطيكم كم اقتراح
في بعض مراكز ترفيه تقدم عروض وخصومات وسط الاسبوع عادة من السبت الى الثلاثاء على الالعاب واسعار التذاكر او اوقات معينة ( اتصلي واسألي ) فيها توفير
اهم شئ انكم تعودوا الطفل انه له ميزانية محددة لللعب او عدد مرات محددة مثلا له 25 ريال للعب يحب يلعبها ورا بعض او يلعب شوي ويجلس يتفرج ويكمل الباقي ولايطلب غيرها مهما كانت الالعاب مغرية ولا تتنازلوا وتعطوهم اكثر حتى لو بكيوا واترجوكم مع الوقت بيتعودوا على اللعب بمبلغ محدد ولايطلبوا غيره
بالنسبة لوجبات العشا لاتشتريها من المركز قبل ما تخرجوا اطبخي وجبة العشا وخليها وجبات سريعة وتعشوا بالبيت وبالمركز اشتروا للاطفال ايسكريم او اي شئ ثاني ( انا اعرف عائلتين امهاتهم اجانب كنت اخرج معهم بحكم صلة القرابة كانت الامهات يدخلوا شنط يد نسائية كبيرة شوي عارفين ايش فيها اكياس بوب كرون عاملينها بالبيت قوارير ماء وعصيرات مرة جابوا معهم ترمس ماء حار واكواب ورقية واكياس شاي ونسكافية وسكر عشان تتقهوة الامهات يعني كل اللي يخطر على بالك اول كنت انحرج من تصرفاتهم لكن بعد كذا لاحظت ان ماحد يسألهم وغير كذا لاحظت انه كثير من العائلات الاجنبية تسوي نفس الحركة ولو اختلف الاسلوب )

.

الحلقة السابعة
.

السفر وخساير السفر
اذا انتم عائلة فيها طلاب مدارس او كلية وحابين تسافروا داخل المملكة اطلبوا تخفيض الخطوط السعودية للدرجة السياحي من المدرسة او الكلية يعني تطلع عليكم التذكرة للطفل او الشخص الواحد ذهاب وعودة بنص السعر ( كتبتها عشان اللي ماعندها خلفية عنها او ماتعرف عنها يجيها العلم)

اما اللي ما عندها طلاب مدارس او عندها اطفال تحت سن المدرسة وسفرها كثير لاهلها او زوجها سفره كثير حتى خارج المملكة في حل حلو لهم اتوقع كثير مايعرفه عضوية الفرسان من الخطوط السعودية ( على فكرة تنفع للسعوديين والمقيمين داخل السعودية)
انا مشتركة بعضوية الفرسان ( ( لان سفراتي انا وزوجي كثيرة ونستخدم المكافات اللي نحصلها من العضوية عشان نحصل على ترفيع درجة السفر يعني اكون دافعة قيمة تذكرة درجة سياحية ثم اطلب ترفيع التذكرة على درجة رجال اعمال او اولى يعني اسافر على الدرجة الاولى بنفس سعر السياحي بدون ماادفع ريال زيادة وممكن انك تخلينها تذاكر سفر مجانية او خصومات لبرامج العطلات ( راجعي موقع الخطوط الجوية السعودية لمزيد من المعلومات واشتركي مجانا عن طريق النت ) )

بتكلم عن خطوط طيران دولية يمكن ماعندكم خلفية عنها وهي العربية للطيران اسعارها رخصية جربتها مرة من الشارقة للدمام لاني مالقيت حجوزات على ما اذكر كلفتني الرحلة 300 ريال وانتي تشري وجبات الاكل على حسابك لانهم مايقدموا لك الا الماء فقط ( صحيح ما اعجبتني حسيت نفسي بباص لكن هي حلوة للعائلة الكبيرة او اللي ميزانيتهم قليلة وحابين يسافروا للخارج ) وهي تروح لكذا دولة وسعرها على حسب الحجز اذا من بدري او لأ ( لمزيد من المعلومات زوروا الموقع الخاص بها )

والجديد من خطوط الطيران الرخصية الجديدة في المملكة طيران ناس وخطوط سما ( زوروا المواقع على النت للمزيد من المعلومات)

الحلقة الثامنة
خاصة بالأخوات
.

المكياج والعطور
الكل يحب الزين وكلنا نحب اننا نتجمل وتكون ريحتنا حلوة ومميزة لكن بعيد عن خسارة الفلوس
انا دايما اقول انه المكياج واحد وتصنيعه واحد اللهم اسم الماركة هو اللي يحدد السعر
عشان كذا اهم شئ كريم الاساس والبودرة والكونسلر وكحل العين يكونوا من ماركة غالية
والمكياج الدائم او الالوان الاساسية اللي تستخدميها باستمرار مثل الوردي ودرجات البيج او البني اللي تنفع لكل المواسم ممكن غالية
لكن الوان الموسم لا والف لا لأنك راح تستخديمها فترة ثم تنتهي موضتها وترميها او تستخدميها للبيت ومستحيل انك تخزنيها على امل ان موضتها ترجع الموسم الجاي لانه من المعروف ان حتى الكياج له تاريخ انتهاء فا ليش اشتريها غالية واخسر عليها مبالغ يمكن استخدمها كم مرة بعد كذا مصيرها الدرج او الزبالة
في ماركات رخصية وحلوة ومعترف فيها من قبل اخصائي مكياج عالميين مثل برجوا ومايبليين وغيرها اختاري اللي يناسك

اما بالنسبة للعطور اذا رحتي تشتري عطرك المفضل او اللي متعودة انك تستخدميه اطلبي من البايع عيانات للعطور الجديدة او حابة انك تشتري عطر جديد وجربتيه بالمحل واحترتي لاتشتريه على طول اطلبي عينة مجانية منه واستخدميها برواقة وشوفي يناسبك او لأ
احيانا حتى المكياج بعض الماركات تنزل عيانات مجانية للمستحضرات الجديدة اطلبي واسألي عنها
خلي عندك قاعدة عطر واحد غالي ومميز مع كمالياته للسهرة والخروج افضل الف مرة من عطور كثيرة ورخيصة وغير مميزة
بالنسبة لعطور البيت خليها حلوة ورخصية مو اكثر من اثنين اذا حابة التغيير وكل مرة غيري الانواع بكذا تكوني مميزة كل مرة

الحلقة التاسعة
بعد شوي
خخخ

الحلقة التاسعة
.
الهدايا
.
الصراحة لي وجهت نظر فيها
اهدي الناس على حسب ما يهدوني
يعني نكون واقعين فيه ناس ممكن ماتهديك ( مو لقل المال لأ بس كذا ) ليش تهدينها
واحيانا وحدة تهديك هدية رخصية او غير مكلفة ( ايضا مو لقل المال لديها ) ليش تهدينها هدية اغلى
لكن اذا كنت كريمة وما تحبي تكوني مثلهم اتبعي اسلوبي في نوع الهدايا حلو وغير مكلف وينفع لكل مناسبة سواء ولادة نجاح زواج ( اذا ما كانت تقرب لك او ماعمرها اهدتك شئ) او زيارة اول مرة لبيت وحدة ( اذا قلنا الميزانية 100 او 150ريال للهدية) اشتري سلة حلوة من محلات ابو عشرة يكون حجمها مناسب وورد مجفف واشتري كم قطعة من محل ذا بدي شوب او نكتار او زهور الريف وخليه ينسقها لك بالسلة او اشتري مجموعة شموع وزيوت عطرية وفواحات من لايف ستايل او ممكن براويز صور او البوم صور فخم او اي شئ غريب وحلو و بنفس الوقت غير مكلف اذا ولادة اشتري من محلات التعليم المبكر لعبة مناسبة لسن كبير شوي عشان تستفيد منها مستقبلا
او اذا كنت ماهرة بنوع غريب من حلى قهوة او حلى عشا او اي طبق اعمليه وقدميه بشكل حلو
.

الحلقة العاشرة
.

الفنادق تعمل خصم للموظفين الحكوميين ( اذا ماكنت غلطانة الموظف بوزارة الزراعة له خصم بفندق الشيراتون 15 % ) وعليك القياس

وبعض المحلات التجارية الكبيرة او الشركات ايضا تعمل خصومات للموظفين الحكوميين

كلها مكالمة تليفون واسالي

..
.
.
.
.
.

الحلقة الحادية عشر
.

ألادوات المدرسية

.

من دفاتر وغيره

ماعندي اطفال

لكن

ممكن افيدكم روحي للمكتبات الجملة اسألي عنها او تلاقيها بدليل الهاتف بالنسبة لجدة تلاقونها على امتداد شارع السبعين قبل تقاطع شارع فلسطين جميع المكتبات بالجملة حتى ادوات ومستلزمات الهدايا اشياء روعة .

الحلقة الأخيرة وأنا بعيــــــــــــــــــــــــــط
.

اخر شئ بتكلم عن تجربة صديقة وزوجها موظفين
عارفين ايش عملوا ؟
حولوا الراتب ينزل لنفس البنك
وفتحوا حسابات ايداع لاطفالهم الاربعة
وكل شهر ينقطع من رواتبهم على 400 ريال
وينزل بحسابات اطفالهم يعني كل طفل ينزله بالشهر 200 ريال
طبعا الاطفال ما راح يستفيدوا منها الا بعد 25 سنة او اكثر اذا كبروا وتخرجوا من الجامعة ان شاء الله
( 200 ريال * 12 شهر = 2400 ريال / 2400 ريال بالسنة * 25 سنة = 60000 ريال )
وعليها قيسوا لو تعملوا ايداع شهري ثابت ينقطع من الراتب يستخدم وقت الحاجة او للمستقبل