اخواني في الله

شفت موقعكم وفعلا استانست بانه في ناس تعمل في الخفاء لحماية المستهلك لكن لو تبون رأيي فانا بقولها وبكل صراحه ان الموضوع كله غريب علي ولا قدرت افهمه.

مثلا في السيارات تقولوا ان الكامري والافالون ارتفع سعرها وانا اعتقد بان سعر السيارات خاضع لاشياء كثير والفروق كثيره بالله عليكم كامري 1995 زي كامري 2008 مثلا اكيد لا واكيد في تقنيات كثيره مختلفه ولكل شيء سعر.

لاتنسوا هل التويوتا مثل الهونداي مثلا؟؟؟؟ هل سعر الكامري هو نفسه سعر المرسيدس؟؟؟؟؟ هل التويوتا والنيسان شي واحد؟؟؟؟؟؟

اذا جينا نتكلم عن اسعار وعن غيره لازم نناقش بعقل شوي.

انا بجيب قطعه حصير وبقول اللي يبي يشتريها يدفع مليون ريال اعتقد باني حر في هذي الناحيه ياناس حاجه ملكي ولا ابي ابيعها الا بهذا السعر مالكم حق تناقشوني فيه اللي يبي يشتري يدفع المليون واللي مايبي يشتري يروح يدور على شخص ثاني يبيعه وبيلقاها بريال مابروح انا لعنده واقله لي شريت بريال شي اكيد بنزل في السعر حبه حبه لين يوصل سعري لسعر السوق وابيع < اذا كنت ناوي ابيع.

موضوع تقولوا بديل ومدري شنو على ايه بديل يعني في مطعم بيعطيني وجبه بروست بنفس طعم وجودة البيك مثلا؟؟؟؟؟؟
صدقوني لو هالمطعم موجود والله الناس مابتنتظر دقيقه وبتروح لحالها تشتري من هناك ترى البيك ماضربنا على ايادينا وقالنا اشتروا مني
وفي ناس تقول لبن المراعي غالي اشتري لبن نجديه وين الطعم بين المراعي ونجديه وكل شخص له مزاجه في الاكل ولولا تعدد الامزجه لبارت السلع في محلاتها.
احنا مانقدر ننزل سعر شي الا لو قاطعنا كلنا وهذي الشي مستحيل الكل يقاطع والمنتدى تحول وصار كل واحد يعلن عن نفسه واكثر شي لفت انتباهي اللي يقول الجبنه في بنده سعرها كذا ارخص بريال والرز في العثيم ارخص بريالين واللبن في جيان ارخص بنص ريال طيب احسب سعر البنزين اللي بتقضيه وانت تتنقل بين الثلاثه مراكز على سبيل المثال بتلقى نفسك خسران اكثر من 20 ريال

يقولوا اهل زمان اطلب المعقول تلقاه وانتوا تطلبوا شي نبيل وهادف لكن مستحيل وانا اعتقد بان كل شخص يوم يروح السوبر ماركت بيلقى كل الاصناف قدامه يشتري اللي يبيه بالسعر اللي يخارج معاه.

ممكن ندعو الى مقاطعه بعض السوبرماركات مثل بنده ووطني ونقول انهم غالين وفي سوبر ماركت ارخص زي عندنا احنا اهل مكه مافي ولا سوبرماركت نجح لا بن داوود ولا النوري ولا بنده لانه عندنا المستهلك ابو حرب الله يوسع عليه معطينا ارخص اسعار ممكن نلاقيها وشوفوا كيف سوقه ماشاء الله عليه ممكن نشجع ونسوي دعايات لهذا الغرص ونشجع التاجر هذا ونرسل له رساله شكر من اعضاء المنتدى او نكون لجنه ونسوي حفل تكريم لمتجر المستهلك مثلا ونقول احنا نكرمك لان اسعارك طيبه وبشكل تلقائي الناس كلها بتروح له وبيصير لنا اسم وصوت ولكن عن طريق النت ونطالب الناس بالمقاطعه لشيء هم الفوه وتعودوا عليه صعب بالمره.

وفي طريقه ثانيه اننا نرسل بيان لملك الانسانيه الملك عبدالله وصدقوني ابو متعب عمره ماقصر على هذا الوطن المعطاء بس توصل الشكوى له.

وشكرا لكم