يااخوان شريت تلفزيون Lcd سوني من احد الاسواق الشهيرة بالرياض مع ضمان الشركة والبياع يقول لاتشتري غير سوني تراه اضمن لك من بقية الماركات الاخرى ولايخرب وشركة كبيرة الصيانة متوفرة وقطع الغيار وخدمة سريعة . علماً عيني على اجهزة اخرى بنصف السعر وفيها مواصفات افضل من سوني ، وشريت الجهاز وركبتة واشتغل لشهر ونصف وفجأة صار التلفزيون مايشتغل وعلامة التشغيل على طول حمرا . اتصلت بالشركة في يوم 12/7/2011 وبلغت الصيانة ، وقالوا راح يتصل فيك مهندس الصيانة في اقرب فرصة في نفس اليوم وبالكثير بكرة . المهندس مااتصل وعاودت المتابعة معهم في يوم 14/7/2011 وانا طفشت بدون تلفزيون واجازة صيف ، تعرفون وش قالوا ان الطلب مسجل بتاريخ 13/7/2011 وان مافية مهندس الا بعد تاريخ 17/7/2011 لانهم في دورة تدريبية وانا متأكد كلامهم خراط في خراط ، وش دخل العميل في دورتهم التدريبية وش هالإدارة الي تدرب مهندسيها دفعة واحدة وتاركة عملائها . بعدين ابي افهم لية ندفع سعر مضاعف عشان اسم الشركة وخدمتها ويصير فينا كذا ، جهاز يخرب بسرعة وخدمة سيئة بعد البيع وابي اذكركم انهم مارح يتقيدون بموعد يوم 17 . المشكلة اني ورطت معهم لوجبت مهندس من غيرهم بييقولون ليش وانت المسؤول مايصلح جهازنا وهو تحت الضمان الا الشركة ، وان خذتة بونيت ورميتة عليهم علشان يصلحونة ممكن ينكسر الجهاز حساس ومايصلح الا في مكانة ، افكر انزلة بسوق بن قاسم وابيعة وآخذ اردى ماركة صينية بس يشتغل ، وش رأيكم يااخوان ....

اسم الشركه الي اشتريت منهم

ولا من نفس وكيل سوني ؟

الوكيل نفسة

ماقلت لكم انة بيجي يوم 17/7/2011 وماراح يتصلوا ، وهذا اللي صار وانتظر الا قبل نهاية دوامهم علشان ما اظلمهم يمكن ولعل وعسى واتصلت عليهم ! وقلت مواعديني اليوم وماحد كلمني ، بصراحة كانوا اخلاق وقالوا آسفين خلال يومين راح نتصل فيك ، ياكافي هذا اتصال وشلون بيجون للصيانة ، كنت في البداية قبل ان اكتب عنهم متردد وقلت عسى مااكون مستعجل لكن سبحان الله ظني فيهم صحيح من شفتهم يغالطون في تاريخ تقديم الطلب وان مهندسيهم في دورة وانا غاسل يدي منهم لان اللي يبي يخدم عملائة بشكل صحيح مايسوى مثلهم . وش نستنتج ان وكيل شركة سوني لشاشات التلفزيون غير صادق في الخدمة بعد البيع أو ان اعطال شاشاتهم كثيرة ومو ملحقين على التصليح وفي كلتا الحالتين المثل يقول : يامن شرا له من حلالة علة .

راسلني على الخاص
سوف اعطيك ايميل العضو المنتدب لوكيل سوني في السعوديه

اولا اشكر الاخ موشر السهم على اهتمامة واقولة ماقصرت يعطيك العافية
ثانيا الجهاز صلحوه لكن بصراحة المدة طويلة الموضوع مايستاهل 14 يوم من تقديم الطلب الى انتهاء الصيانة . في البيت ماركات اخرى ثلاجات غسالات اذا تعطلت بالكثير يومين ثلاثة وهي خالصة . من التجربة كنت وراهم متابعة اول بأول ولو سكت يمكن المدة تاخذ شهر وزيادة للانصاف هذا الموضوع يخص شاشات lcd لشركة سوني ماجربت صيانة شركات اخرى علما عندي شاشات من ماركات مشهورة لكن ماخربت علشان نشوف خدماتهم وانشاء الله ماتخرب . وارجو ان لايعتبر هذا الموضوع انتقاد سلبي لشاشات سوني فهي شركة مشهورة ومعروفة ولو كانت شركة غير معروفة ماشرهنا عليها وعلى الشركة دراسة موضوع تأخير الصيانة والهدف الارتقاء بالخدمات وتحسينها للعملاء مع الشكر والتقدير لادارة موقع مقاطعة الرائع بنقل هموم المستهلكين وتبادل المعرفة بينهم .

يا رجل ،،،، الحال من بعضه للأسف ...

ممكن أقول أن أغلب الشركات إلم يكن كلها لا تهتم بالعملاء إلا قبل الشراء وبعد ما تدخل الفلوس في الصندوق أحلم أن تجد خدمة إلا بعد التهديد والوعيد ،،،

والسبب مرده الى غياب الرقابة الحكومية عن تلك العصابات الخاصة وعدم وجود أي رادع أو عقوبة ضدهم ...

فالحل الآن يمكن في المقاطعة أو مراسلة الشركة الأم أو اذا عندك واسطة

أنا شريت تلفزيون دايو من سنة 2005 29 بوصة شبة مسطح بـ 755 ريال (رخيص في وقته) وحتى الان شغال زي الحلاوة (ماشاء الله تبارك الله ) وشريته من عرض في المخازن الكبرى قبل ما تشتريها بنده...

الله يعينك يا أخي ويعوضك خير

صدقت يا أخي بالفعل شركة سيئة وبضاعة مضروبة أنا اشتريت رمضان ما قبل الماضي تلفزيون lcd شاشة كبيرة ظنا مني أن سوني هي الأفضل لكنني اكتشفت أن الشاشة فيها خلل !!

وعندما طلبت الصيانة قال لي البائع في عالم سوني وأنا أكتب إليك من الطائف لا بد أن تحمل الجهاز لفرع الصيانة وهم بدورهم سيرسلونه لجدة !!

وليس أمامك إلا هذا الخيار !!!


فبالله عليك أهذه شركة محترمة ؟!