طريقة ناجحة للتسوق باذن الله

**tariq475** · 24-08-2007, 02:30 PM

السلام عليكم ورحمة الله وبركاته ..

طريقة باعتقادي الشخصي انها ناجحة ان شاء الله للتسوق ..

للي ساكنين في الرياض .. جمع لك ثلاثة من اخوياك او اخوانك او نسباك او.. الخ ...

روحوا لسوق عتيقة (السوق الداخلي) فيه كل شي من خضرة وفاكهة ومواد غذائية .. واشتروا بالجملة وتقاسموا كل اللي تشترونه ارباع .. يعني مثلا شريت لك كرتون جبن قسمه على 4 كل واحد ياخذ ربع الكرتون ..

لابد انكم توفرون وسلعة مع سلعة وكل سلعة فيها ريالين ثلاثة بتطلعون باذن الله بفايدة ..

انا شخصيا اروح انا والوالد للحوشان وكل المحلات تقريبا السعر نفسه ..

ان شاء الله اني سببت فايدة لكم بالاقتراح هذا ..

**tariq475** · 24-08-2007, 03:04 PM

نسيت انوه الى ان سوق عتيقة للي مايعرفه .. يضم محلات لحوم ودجاج وبيض وكل شي يحتاجه المستهلك .. فمنها توفر مادة وتوفر جهد وبنزين وكل شي في مكان واحد

**فعال** · 24-08-2007, 03:08 PM

اذا تبي تطبق هالطريقة
فيه افضل من سوق عتيقة
اسواق الخضار والفواكه بالجملة
بجوار النقل الجماعي
الدائري الجنوبي

والله لتصاب بالذهول من الأسعار
شي لايصدق
محلات الخضار ارباحهم تزيد عن الـ 100% في بعض السلع
وخاصة المستورد من سوريا ولبنان

على سبيل المثال
الكرز جملة بـ 5 ريال بس لازم تشيل اقل شي 20 علبة
وتباع لدى محلات الخضار بـ 10 احيانا

**tariq475** · 24-08-2007, 03:41 PM

انا الله يطول عمرك اخوي فعال كنت املك محل خضرة .. وفعلا سوق الجملة اللي انت قلت عنه رخيص جدا ..

لكن اولا مافيه الا خضرة ..

ثانيا تغير النظام هناك وصار دخول السيارة بـ 10 ريال ومحلي كان صغير واخذ بضاعه على قد حالي ولكن التجار هناك كانوا يرفضون يعطوني بحكم ان الكمية اللي انا طالبها قليلة ( وكل هذا بعد مافتح السوق الجديد ) فصرت اتجمع انا واللي مثلي وناخذ الحد الادنى للكمية ونتقاسمه ..

يعني اتوقع لازم يكون معك 7 غيرك على الاقل عشان تاخذون الحد الادنى للكمية

ولكن اشكر لك ابداء رأيك وانت اسم على مسمى

**ابوريم** · 24-08-2007, 07:29 PM

يسلمو اخوي
الف مليون شكر على المجهود

**tariq475** · 24-08-2007, 09:12 PM

حياك الله يابوريم و ان شاء الله اني قدمت فايدة لك ..