بسم الله الرحم الرحيم

االحمد لله رب العالمين ، والصلاة والسلام على اشرف الانبياء والمرسلين

السلام عليكم ورحمة الله وبركاته،،،


امتلك سيارة من الجميح موديل 2004 وكاله والحمد لله .
مشت السيارة 1000 كلم ودايركت على الجميح لو سمحت غير زيت السيارة ( لان تغيير اول مره مجانا ).

مشت السيارة مايقارب 5000 كلم وانطلقت بسرعه جنونيه الى محطة ( اي سي ديلكو ) تكفى غير زيت السيارة .
قال: طيب وش تبغى اللون الاحمر او الابيض ؟؟
قلت : وش الفرق .
قال العلبه البيضاء تمشيك الى 5000 كلم والاحمر يمشيك 3000 كلم فقط .
قلت : وليش كذا طيب ، وبكم الابيض وبكم الاحمر؟
قال : عشان اختلاف درجة الضغط واللزوجه. الابيض ب 9 ريال والاحمر 7 ريال.
( فكرت قلت خذ الابيض اضمن ويمشيك اكثر).
قلت : تدري توكل على الله وعطني الابيض.
وسالت العامل وهو يغير الزيت ( طبعا بعيد عن الزول المدير تبعهم )كيف الزيت ( اقصد الزيت المستخدم). قال الفلبيني كويس

( قلت اذن المره القادمه باغيره على 6 او7 الاف كلم وليس 5000 كلم).

وكتب الله ماغيرت الزيت الا بعد 9000 كلم ، بيني وبينكم والله كنت حايف ( لان لا قدر الله لو صار شي في المكينه والله ماعاد اقدر اغير المكينه الا اذا الله كتب وصار شي من امور الدنيا اما يلين قلب الوالد او بدعوه من امي او من الاجاويد عند المسجد أو تكون العاقبه باني سوف اتفرج في السياره جنب البيت ) لكن الحمد لله ربك ستر ، وله الفضل والمنه والشكر.

ولقيت شخص سعودي وتعرف دخلات عرض وسواليف وجاء طاري الزيت قلتله 9000كلم .
قال : بدهشه واستغراب افا ليش ياشيخ حرام عليك وينك يابن الحلال .. ومن بعدها طيلة الجلسه في المحطه يناديني يابو 9 ( نسبة ل 9000 كلم).
( هنا دليل ان وعي الشعب رايح في عين امها ( وكيف عرفت بعد مادخلت المنتدى وعرفت الصح من الخطا، الله يجزاكم خير).

ويوم جاء دوري في نفس المحطة لتغيير الزيت سالت الهندي. قلت : كيف الزيت . قال : كويس مافي مشكل وسالني كم امشي سياره ؟ قلت 9000 كلم .قال : مشكل كبير ياشيخ كذا بعدين خربان لازم غير زيت قبل لازم 5000 كلم.
( هنا دليل على ان العامل داج مايعرف كيف الزيت ، او ان الشغله اهم شي فيها المكسب ، او الثنتين كلها)

وبعدين اتخذت قرار قلت ماعاد اغير الزيت الا كل 6000 كلم ، لاضرر ولا اضرار.

وجلست اسولف للوالد الله يطول عمره على الصالحات ويجزاه الجنه . وقال هناك في الغرب ماعندهم شي اسمه تغيير زيت فقط اضافه ، لكن هنا مو مشكله غير الزيت عشان الحرارة بس بعد ماتعطي الزيت حقه .

وانا يوم مادخلت هذا المنتدى وبعد توفيق الله سبحانه . ماعاد اغير زيت الا على 10000كلم.
واضيف كل مالقيت نقص في الزيت ان حصل.

****لكن ارجع لموضوعي الاساسي وهو استغباء المواطن بالنسبه للزيت.
الاحمر كان 7 ريال ........ الابيض كان 9 ريال
الاحمر 3000كلم .............. الابيض 5000 كلم
الفرق الزوجه والضغط
الان
الاحمر 14 ريال ............. الابيض 14 ريال
الاحمر 5000 كلم ......... الابيض 5000 كلم
الفرق كما هو من اول . واحد ضغطه 10 والثاني 30.
( هنا دليل اما ان الزيوت غير مختلفه وضحك على المواطن من اول ، او ان الزيوت مختلفه وضحك على المواطن حاليا ، وكيف تمشيك اول 3000 والحين صارت مثل اختها 5000 كلم ولازال الفرق!!!1!!!! )

ماعاد فيه ان شاء الله الا زيت بالكرتون من مبيعات الجمله والفلتر من الوكاله . كذا شغل مضمون ان شاء الله وتوفير . والاهم ماعاد في استغباء او استدلاخ.

واسال الله التوفيق لي ولكم ..وان تكون اعمالنا واعمالكم خالصة لوجهه الكريم..

لاحول ولاقوة الا بالله العظيم ، انا لله وانا اليه راجعون

جزاك الله خير

واستدلاخ المواطن حاصل حاصل

بس يجب علينا ننتبه زين

يعني مو مثل اول نشوف ونمشي

الله يجزاك خير
انا سيارتي يوكون موديل 2000

و كنت مثلك اغير الزيت على 2500 او 3000 اقصى حد ممكن

ولكن بعد ماسمعت من بعض الأخوان صرت اغيره على 5000 الى 6000 والحمد لله مافيه اي مشاكل

سعر زيت سوبر جي تي عند البنشري 13 ريال

بينما عند المورد سعر العلبه 9 ريال شوف الفرق

البلا كله الي حنا فيه

من دلاخة المواطن


واستئساد الاجنبي في البلد وتحكمه بالاسعار