السلام عليكم ورحمه الله وبركاته
لقد ذهبت قبل اسبوعين الى ورشه العيوني للميكانيكا في الجبيل الصناعيه لاصلاح سيارتي الجمس سوبربان بشان خروج دخان اسود من العادم مع رائحه بنزين واستهلاك بنزين كبير ورجه في المحرك وافاد المهندس الفلبيني بانها تحتاج الى تصفيه المحرك وسوف يكلف تقريبا 1000 ريال وتحتاج الى يوم واحد فقط للاصلاح..
فتركتها عندهم ثم حضرت ثاني يوم ودفعت المبلغ واخذت السياره ولكن المشكله لم تحل وارجعت السياره عندهم مره اخرى ثم بعد يومين اخذتها وهكذا استمر الحال لمده اسبوعين - تعال ورح - فكلمت الكفيل صاحب الورشه محمد العيوني وافاد بان السياره تحتاج الى acm او كمبيوتر قيمته 7000 ريال لتصريفي فقط فلما قلت له " اذا لماذا اخذتم علي 1000 ريال ؟" ولماذا لم تخبروني من البدايه ؟ اصبح يماطل في الكلام وفيما معناه هذا اللي عندنا لك ..في الحقيقه لما عرفوا اصدقائي وزملائي بالسالفه نصحوني ان لا اذهب الى ورشه العيوني لانهم مشهورين بالنصب على الزبائن وسمعه الورشه مدموره بالمره ..لذلك احببت ان احذر الناس من واقع تجربه وبالمناسبه هذه ليست الاولى في النصب علي ولكن انا كنت من عجله من امري وهم استغلوا هذه المساله.

يالغالي مسألة خروج دخان أسود سهلة وأسهل من السهل


المسألة من اثنين

بنزين زائد يدخل للسلندر ويحترق ويطلع دخان اسود مع ريحة كربون وهذا بسبب خراب شئين

1- البلف اللي يرجع البنزين الزائد للتانكي خربان ويدخل للسلندر


2- الهواء نسبته قليله للدخول بسبب فلتر هواء او الثروتل يبيله تنظيف او الهواء يتسرب من احد الليات وهذا يسبب رجه للمحرك


والامر الاخر للمشكلة هذي


البواجي واسلاكه تحتاج تغيير ولعلمك ترى دامك غيرتها وما ضبط اكيد من البلف


وبالنسبة لريحة البنزين اذا تحسه بالكبوت ترى البلف هو السبب


واذا لا يمكن غطاء البنزين




على العموم دامك بالجبيل وانا بالدمام تراني بالخدمة ابشر باللي يجيك ويشيك على موترك وترى لي خبره بالفورد وخاصه كراون فكتوريا

والجمس امريكي وقريبين من بعض



اذا تبغى اشيك لك على السيارة من عيوني وخاصه ان بكره ويك اند

مشكور أخي "النوتة الموسيقية" على التنبيه وإن كنت أتمنى لو تم تدعيم الموضوع ببعض الوثائق والفواتير.


أخي أمير المقاطعة ..أشكرك على توضيح مسببات الخلل المحتملة و عرضك للمساعدة .. بارك الله في علمك وجهدك.

يابعد راسي انت وفيت وما قصرت وانا الان افكر اوديها في الخضريه في الدمام لان الجبيل ورشهم محدوده لكن اذا تخبر ورشه كويسه في التصفيه tuning the engine اكون لك من الشاكرين وقبله على راسك على المساعده اللي اعتبرها وصلت.

ابوهشام .. اقسم بالذي رفع السماء بلا عمد اني صادق فيما قلت ولم ازود عليهم بل في اشياء بخسوني فيها لم ارد ذكرها واقسم بالله ان الفواتير موجوده في باب السياره لكن ليس عندي سكانر لارفعها ..وشكرا لاهتمامكم.

أشكرك على طرحك للموضوع اخي وللتنبيه
وأشكر اخي امير على توضيح المشكله وتقديم المساعدة
الورش فيها نصب وإحتيال غير طبيعي إلا من يخاف الله
فلا تتركهم طالب بحقك لأنهم لم يصلحوا السيارة والف ريال ما هي قليلة , وسوف يستمرون بهذا النصب على غيرك إذا لم يجدوا من يطالب ويأخذ حقه , ونصيحه اللي يصلح السيارة يقعد عندهم حتى يخلصون من عملهم ويرى ما يصلحونه , لأن أحياناً تكون المشكلة بسيطه ولا تكلف شيء يمكن يكون حساس ولا يحتاج إلا لتنظيف فقط او فيوز رخيص الثمن ويقول يحتاج لها يوم ليوهم صاحب السياره انها مشكله كبيرة وتكلف الكثير
حصلت مشكلة في مكيف السيارة عند تشغيله يتأخر في التبريد وبعدها يشتغل طبيعي ويبرد , رحت لورشه وقال لي هذا في الكبروسر فيه قطعه خربانه نسيت اسمها قلت له طيب غير القطعه قال لازم كمبرسور كامل جديد ما تجي لوحدها , والكبرسور سليم لو فيه شيء ما يبرد بعد فترة , عرفت ان الدعوى فيها نصب لكي يأخذ الكبروسر ويبيعه وانا اتحمل قيمه الجديد على شان يستفيد هو , أو انه لا يعرف في المجال ويتعلم مثل البقيه في سياراتنا لأنهم لا شهاده ولا شيء , وذهبت لآخر أمين وقال من الكتاوت وذهبت لقطع الغيار ولم اجد جديد وجدت مستعمل ونظفت القديم ببخاخ خاص للقطع الألكترونية وركبته وضبط المكيف والحمد لله