السلام عليكم ورحمة الله

في البداية لو كنت اعلم عن هذا المنتدى ومشاكل مكيفات سامسونج ما اضعت فلوسي مع شركة لاتضع احترام العميل ضمن خططها

المتبولي و زبانيته


قدر الله علي واشتريت مكيف سامسونج اسبيلت 24 الف وحده من معرض المنيع بسعر مغري تقريباً 2600 ريال والي اغراني اكثر انه كوري

بعد التركيب جاني فني تبريد وشاف المكيف قال لي لاتضيع الضمان ترى السامسونج كثير يخرب كمبرسره
قلت الله يستر
بعد سنتين نقلت من شقتي و تعاقدت مع شركة الصفرات لاجل ينقلون العفش مع مكيفين اسبيلت بحكم خبرتهم و سمعتهم واذكر اني قلت للبنقالي بزودك 50 ريال بس ابي الفريون ما ينقص قال لو نقص الفريون بتدفع 200 ريال
بعد التركيب حسيت ان مكيف كروني تبريده سيء و السامسونق اقل من اول قال لي هذا بعد كم ساعه بيروح
اكتشفت بعدين ان الفريون ناقص كثير في الكروني و ناقص الربع في السامسونج بعد ما عبيت الفريون على حسابي بشهر حصلت الكارثه
السامسونج في المجلس وقليل اشغله بعد ماشغلته بكم دقيقه ضرب شوط و طفي من الطبلون هنا قلت وقف لازم اكلم الصفرات
اتصلت بمدير الصفرات واعتقد انه المالك للمؤسسه وقال لي ليش تتلقف وتعبي فريون هذي شغلتنا لو نقص حنا نعبي لك ؟؟ يعني بالعربي مافيه فلوس قلت طيب عندي ملاحظات ثانية قال توك تفضى عقب شهر تتكلم ليش ماتكلمت من الاول ؟
قلت اسف بس اليوم ضرب المكيف وشكلة بسبب التركيب
قال ابد انى مختص واعرف في الامور هذي اكيد انه بويبنه
قلت حتى انا اعرف هذي جديده اذا خربت البويبينه يضرب شوط المكيف
قال اكيد انه من تسليك البيت
المهم جلست ربع ساعه وكل ماجاب لي عذر ارد عليه الرجل واضح ان المال عنده اهم من سمعته ومن ذمتة
في الاخير قال لي بالحرف الواحد انا برسل لك افضل مختص عندي فزعة مني لك ؟ واذا قال الخطى من التسليك ترى مالي علاقه انا رجل كبير واهم شي عندي الذمه
قلت بلا من زين حماية المستهلك قلت سم انا موافق وا ارسل لي الفني الحين قال ما اقدر بس بكره الصبح عندك
الرجل امانه تجاوب لي وارسل الفني الصباح تاخر علي شوي
طبعا ارسل كهربائي وقال المكيف مافيه شي والتسليك كويس والمكيف يشتغل قلت طيب ليش مايشتغل الكمبوسر الهوى حار قال ما ادري انا ماني مختص بس الكهرب عندك سليم
اتصلت على الرجال ولا رد علي قلت اجل مالي الا الله ثم المتبولي

اتصلت عليهم يوم السبت اعطتني الموظفه موعد يوم الثلاثاء الساعه 11 الصباح
جا الموعد ولا احد كلمني واتصل عليهم اكثر من مره كل مره يقولون راح يتواصل معك فرع الرياض
المهم الفني كلمني الساعه 5 العصر قال انا بجيك مشواري يبي له 30 دقيقه قلت تعال بكره الصباح انا عندي دوام الحين
صحيت الصباح جاتني رساله منهم انه تم الغاء الموعد بناءا على طلبك واتصلت عليهم من الصباح الين الظهر كل مره يصرفوني اخر شي سوو لي موعد جديد يوم السبت الساعه 12
اتصلت عليهم في نفس الوقت قالت لي الموظفه انه الفرع دخل على بلاغك وخلى الموعد الخميس ليه ما اتصلو عليك
قلت ما احد اتصل علي وادخل في دوامه ثانيه اتصالات بالهبل ولا فيه اي تجاوب بس ما تعرف تقول الا ارسلت ايميل للفرع وراح يردون عليك

طيب ابي رقم مشرف
ابي رقم الفرع بالرياض
ابي احد يسمعني
مافيه فايده
والي يقهرك انها تقول بتدفع 250 ريال بس اجور اليد من غير القطع واقول لها خليهم يجون بس يعني وش اقول ووش اخلي

المهم كلمتهم السبت وبدون فايده
وجا الاحد وبعد حرب اتصالات اتصل علي الفرع وقال لي الفني راح يتواصل معك بعد دقايق عشان ياخذ بيانات السكن ووالله الدقايق الي يقول ما جت
طبعا جا يوم الاثنين و اتصلت عليهم بعد ما فشلت جميع المحاولات وقلت لها ترا اليوم عندي مناسبة ( ونا صادق ) الساعة 4 العصر بيجيني فني من برى واذا قال ان المشكلة من الكمبرسر راح تتحملونها انتم غصب قالت مالي دخل
قلت وصليها للمشرف انا صبرت اكثر من 10 ايام عليكم
وماجت الساعه 3 الا الفني يكلمني يقول غريبه اعطوني رقمك بدون بلاغ صيانه وبدون شي ونا ما ادري وش السالفه قلت تعال شف المكيف وش فيه ولا تراني ناوي اشتري اليوم مكيف شباك ابرك لي منه
بعد الكشف اتضح ان المشكلة فقط من سلك الكهرب يعني الخلل من تركيب الصفرات واخذ 50 ريال حقت الكشفيه لانه يقول لو بصلحه بياخذ 250 ريال هذا نظام الشركة حتى لو القطعه ماتكلف ريال

صوره مع التحيه لحماية المستهلك


نجي لشركة الجزيره

مكيف ال كروني باقي له شهر و ينتهي ضمانه الشامل قلت بتصل عليهم يشوفونه لان تبريده مب عاجبني
كلمت خدمات ما بعد البيع الثلاثاء قال موعدك الاحد من الساعة 10 الى 11 ص هذا وهو يدري ان الضمان ما خلص
ما جاني الفني الا بعد صلاه المغرب بنص ساعه حقت الفطور
كشف على المكيف وقال ان الفريون زايد و صلحه واخذ اغراضه ومشى ولا خذ ولا ريال ولا قال انت فاكة وجاني في نفس يوم الموعد
وبرضو من 6 سنوات كنا مركبين منهم مكيف اسمه جانت خارج الرياض ب 160 كيلو خرب المكيف في فتره الضمان وارسلو الفني وصلحوه بدون مقابل

شكراَ لهم ولاحترامهم للعميل

طبعا عيب الكروني الجديد انهم ما يعطونك قاعده للريموت و ماتقدر تتحكم بريشه توزيع الهو يا انها تتحرك باستمرار او يكون الهواء للاعلى

كل ما ذكرته انا مسؤول عنه امام الله تعالى

وفي النهايه عشان ما اضلم
مكيف السامسونج هدوءه جيد جدا وا افضل من ال ال جي يعني لو يقفل الكمبرسر ما تدري انه شغال الا من اللمبه وكذالك تبريده ممتاز

بس وكيله زفت و هذي اخر تجربه لي مع السامسونج ما راح اشتريه كرهت شي اسمه سامسونج

اتمنى اني اكون افدت الاخوان عن شركه النصابين و والله لو بذكر كل التفاصيل الي قهرتني كان بيطول الموضوع اكثر بس ما اقول الا حسبي الله ونعم الوكيل

وقفه : لو كان المكيف في غرفه النوم وش بيصير فيني ؟

شكرا لك على نقل التجربة وإفادتنا بها