نزلت اليوم مع الوالد الله يحفظه نشوف أضاحي ..

رحنا للمسلخ الأهلي اللي في الصناعية الشمالية بحي النزهة و لقينا سيارات الباعة على مدخل الشارع المؤدي للمسلخ.



نزلنا نشوف المعروض و ناخذ فكرة عن الأسعار .. الوالد كان حاط في باله السواكنيات لسببين .. الأول حجمها مقارنة بالسعر و الثاني كونها مستوردة ما يعني إنها متربية في مراعي مهي مثل المحلية شعير و خبز جاف و خرابيط الله أعلم بها.

لقينا السواكنيات أشكال و ألوان .. من 500 ريال للـ 900 ريال .. هذي الأسعار طبعا بعد قليل من الأخذ و الرد .. يعني لسه ما كاسرنا صح (للأسف مع ضيق الوقت ما لحقت أسأل عن الأنواع الثانية بس بلغني إن الحريات بيعت اليوم حول الـ 1500).






المهم لقينا شيء طيب و أخذنا الواحدة بحوالي 750 ريال .. بس شيء يشرح النفس (قولوا ماشاءالله).

و رحنا على المسلخ .. لقينا شوية زحمة (طبعا الزحمة لاتقارن بأول يوم أو الصبح) و سعر الذبح و السلخ 50 ريال للرأس .. أول يوم أخذوا 100 ريال الرأس.

والوضع كان مرتب إلى حد كبير رغم الحوسة اللي جوة المحل إلا إن الواحد يضمن إن ذبيحته ما تروح عليه لأن كانت فيه أرقام يتم تثبيتها في أذن كل ذبيحة و يسجل رقمها في فاتورة الدفع و لا يتم تفصيل الذبيحة إلا بعد المناداة على رقمها و إستلام الورقة من الجزار.

تدخل الذبيحة و تذبح و تسلخ ومن ثم تعلق أمام الجزارين و يقوم المشرف بالمناداة حسب الرقم المثبت على إذنها لين يرد عليه صاحبها و يوجهه للجزار اللي راح يقطعها له و عشان يتابع معاه و يستلم منه.

المهم .. الوضع جوة المسلخ رغم الترتيب كان شوية حوسة رغم جهود التنظيف التي لا تنقطع .. خاصة في مسألة إدخال الذبائح التي تدخل و ترى التي سبقتها مذبوحة و تصير حالتها حالة.

هذي صورتين لقطتها على السريع من داخل المسلخ:






و كل عام و أنتم بخير.

تقبل الله من والدك ومنك يا أبا abuhisham
.
سلّم على الوالد نيابة عنا
.
وهذي قبلة مني على راس والدك
ومعها تهنئة بعيد الأضحى
.

و تقبل منك أخي المملوح.

بارك الله فيك و راح يوصل السلام بإذن الله.

اليوم كنت مع خبراء الحلال قالوا السواكني يجي عندنا في جدة بعد ما يمر عليه أكثر من يومين وهو في الباخرة ، وأضاف أحد الحاضرين أنهم طوال هذه الفترة يأكلونه مواد كيماوية خوفا من ( الدمن ) أكرمكم الله .
وقالوا أن هذه الأغنام تمر على مختبر لفحصها وتقضي فيه وقتا ، وهو ما يتسبب في جوعها الشديد وضعفها مما يدعو بعض ملاك الحضائر الى الاعتماد على أنواع من الإبر المغذية التي تزيد الوزن بسرعة ليقلل التكلفة .
فليحذر الناس من هذا النوع من التحايل حسبنا الله ونعم الوكيل
الكل أصبح يفكر فقط في كيفية الحصول على المال على حساب ضمأ وجوع المواشي والإضرار ببني آدم
ولو تجيه يقول لك الكل بيعمل كذا