شفت هالموضوع ...وبجد تأثرت منه كثير...وحزنت على حالنا وين كنا ووين صرنا ....
بجد جزاها الله خير كاتبه الموضوع والله يجعله في ميزان حسناتها يارب
بجد موضوع يستحق أن تقراه عدة مرات وأن يتثبت في كل منتدى ....
اتمنى الكل يقراه .... على مهل
اتمنى ما حد يحرمنا من الرد ....
اتمنى الكل يسير فيه تغيير او تغير .....
اتمنى اشياء كثير.... ويارب تتحقق....

اترككم مع البنت السعوديه ..وقلمها المميز .. والله يوفقها وين ما كانت ويصلحها..
ويجعل هدايه المسلمين على يدها ....

فتاة سعوديه تكتب عن المجتمع السعودي بعد رجوعها إليه
السلام عليكم ورحمة الله وبركاته

حياكم الله

هذا أول موضوع لي في هذا المنتدى

ومتفائلة أنه يتثبت ويلاقي صدى حلو لأني عارفة رقي العقليات اللي بأحاورها
أنا لي شهرين أقرأ في هذا المنتدى وبصراحة حاسة إني بين صديقاتي
أبهرني تعاونكم وأهنيكم على المشرفات
------------
ندخل في الموضوع..
وراح أتكلم بعفوية وتلقائية لأن الكلام اللي يطلع من القلب مباشرة يدخل القلب

عمري 23
تغيبت عن مجتمعنا السعودي 10 سنوات مع عائلتي بسبب عمل والدي..
ورجعت للوطن من شهرين
بصراحة تفاجأت وانصدمت من التغيرات اللي حاصلة في المجتمع بكل فئاته وطبقاته ..
في النوادي الرياضية..في الأسواق وفي الافراح ..
والأهم في الجامعات والمدارس..وفي المنتديات والمدونات والجروبات الشبابية
تمنيت أني ألقى المجتمع تطور للأمام..أو تقدم للأفضل
لكني للأسف لقيت النقيض رجوع خطوااات للخلف..من جميع النواحي

قد يكون كلامي فيه غلظة شوي بس يقول لك المثل
يا بخت من بكاني وبكى الناس علي
ولا من ضحكني وضحك الناس علي

تساؤلات كثيرة أرددها بيني وبين نفسي وما ألقى لها أي جواب
وأنا متأكدة أنها تتردد على كل صاحبة دين ورزينه وعاقله شرواكم

هل لما زادت رفاهية الحياة يزداد تخلفنا؟؟
هل لما تطورالعلم وتسهلت الطرق له يزداد جهلنا؟؟

ليه صرنا مجتمع سطحي لاهم ولا رؤية ولا رسالة ولا هدف من الحياة
شغلنا اصبح فقد التفكير والتركيز على المنظر والمظهر

فيه كاريكاتير أول ما شفته زعلت
لكن ألحين حسيت إنه أبلغ من كتب ممكن نكتبها
الكاريكاتير يمثل شعوب العالم
فمثل الشعب السعودي بكرتونات مزينة من الخارج وإذا فتحتيها لقيتيها فاضية
وهذا واقع البنات اليوم مظهر ومنظر
ولو تقولين لها 1 ×1 كم؟
تنحت بعيونها شوي وتفكر في الجواب .

لو تقولين لها وش آخر كتاب قريتيه؟
قالت هااااه

"بغض النظر عن الروايات التافهة اللي طايحين فيها البنات هالفترة"
لو نص هوس المظاهر هذا كان على عقولنا لكنـّـا أنجح الشعوب في العالم
لأنه ببساطة كل شيء متوفر عندنا لا ناقصنا مال ولا قدرات عقلية

الأجانب فلوسهم رايحة على تعليم عيالهم وتثقيفهم وصحتهم وبناء مستقبلهم
تلقين راتب الأب والأم ضئيل ومستحملين شظف العيش عشان يرسلون ولدهم برى يدرس شهادة عليها القيمة
بينما عندنا يستحملون الديون والأقساط عشان تسوي زواج كله إسراف وتبذير وآخرته الناس طالعة منتقدة في الفرح وماخلوا شي فيك .
وإلا ديون وأقساط عشان تقول صيفنا برى شهر كامل
ولا الشباب متحملين اقساط السيارة من اول شهر يتوظف .
هذا حرام ولايقبل به أي دين ويعتبر تخلف وانحلال في المال واستهتار .

والله أعرف وحدة شخصيا تقول : السفر بالنسبة لي عذاب لأننا إذا سافرنا
طول السفر طقاق أنا وزوجي وأنا أحرسه لا تناظر وهو يحرسني لا تناظرين ..قلت طيب خلوا سفركم لبلدان محافظة أو لا تسافرون حطوا فلوسكم في البيت تغيير ديكورات وأثاث
عصصصبت علي وقالت خيييير سلايفي لين سولفوا أصير بينهم ما سافرت
وإلا إذا سولفوا صديقاتي إلا أنا ما سافرت وش بيقولون عني!!!!!!!

واترك التعليق لكم ...........

أنا لما جيت بعد هذي المدة توظفت في بنك بحكم اللغة الجيدة ومعرفتي بالحاسب الالي .
وبراتب بسيط يمكن لو تعرض عليكم الوظيفه ترفضون .....
واحلى شي فيها انه قسم نسائي 100% اللي بعض البنات يحاربونه ويريدون الاختطلاط

ولاحظت إنه إذا جت العميلة أم ساعة ألماس فخمة وشنطة قوتشي الكل يتبادر لخدمتها
وإذا جت العميلة اللي مظهرها ما فيه بهرجة وعباته فوق الراس ..
تستجدي الموظفات يجون يساعدونها ...... وكل وحده تصرفها لثانية
والمضحك في الوضع إني ألاقي العميلة البسيطة ما شاء الله حسابها شي وشويات..
وهذي أم البهرجة والاستعراض حسابها بالسالب(عليها قروض وسيارات تقسيط)..
وعنوانها يا إما شقة وإلا أيجار وراتبها كله اقساط ..!!!!

مو انتقادي على القرض ولا على السكن انتقادي هو لية الأخت مكلفة نفسها بالديون والقروض عشان شويتين نظرة إعجاب من الناس
بس ما ألومك لكن ألوم المجتمع اللي صار سطحي..يحكم عليك بموديل جزمتك
وكان أول تصنيفنا للمجتمع

جامعية
مثقفة
عاقلة
متربية
قليلة أدب
دينة
بنت ما ربوها أهلها
يعني كان مقياسنا
الدين والتعليم والتربية

أما ألحين
صار تقسيمنا للمجتمع
لو كلاس
هاي كلاس
بنت ستايل
بنت قروية
فعلا تصنيف متخلف رجعي سطحي ..

يعني رجعنا للجاهلية
وإحنا ألحين ننادي بالعولمة والعالمية والتطور والتحضر
الحضارة تبدأ بالعقول

من جد من كثر ما أنا منهارة من هالوضع والله مو عارفة وش أكتب
أروح لنادي رياضي ألاقي ملابس يستحي إبليس يلبسها ولم اشاهدها خارج المملكة في مجتمعنا السكني المختلط من كل الجنسيات العربية .
طبعا هذا غير الاسترتشات اللي لما تتمدد يطلع البنطلون شفاف..شيء يجيب الغثيان..
المشكلة نتدرب في كلاسات كلها مرايا يعني ماتستائين من منظرك!!!!!

المشكلة إن زمان كان هذا الشيء
نكرة + قلة تربية + قلة دين
وله عقاب وتاديب ويمكن قص .

أما ألحين
عادي وكنه العيد
-------------

من أسبوعين اتصلت وحدة سعودية من الرياض على فوزية الدريع قالت أنا معلمة ومتزوجه وكلمت واحد وحبيته وقابلته وقال..و..و..وكملت تفاصيل حماقتها ..
اللي من جد فشيلة على القنوات ينقال أنه هذي سعودية

قالت لها الدكتورة بكل جراءه
"..وش هالخداج معلمة وهذا عقلج.. أي جيل بتخرجين لنا..وين مخج..وين تربيتج "
أجل كيف يكون حال البنات من بعدك ........!!!!!
يعني تعدينا مرحلة أنهم رجعوا للمراهقة.. هم رجعوا لما دون ذلك
هل تقبلون بهذا التصرف على مجتمعنا ...... اين نحن ؟؟؟
-----------------------------

قصة أم وتربية اطفالها ....عاشت في أمريكا 10 سنوات مع زوجها
تقول أنا توقعت السعودية بتسهل علي تربية عيالي لكن اكتشفت العكس
لان برى لما يشوفون ابنائي غلط أقول لهم هم كفار ينبسطون شوي وآخرتها النار
بس إحنا مسلمين ننحرم شوي وبنتمتع فورإيفر في الجنة بأذن الله
تقول: وكانوا مقتنعين والأمور تمام ولايخطلطون مع الكفار ومنتبهين على انفسهم .
أما هنا لما يسألوني عن أشياء غلط يشوفوها في الفيصلية"والله أتلعثم وما ألاقي حجة مقنعة طبعا هم يعرفون كيف يحاورون في الكلام وما تقول له إلا كلام مقنع ومنطقي لكي يقتنع بالفعل .
-----------------
ملاحظة // فيه صرح رائع مشهور في عالم المنتديات اسمه مملكة المرأة

99% من مواضيعه عن المظاهروالشكل والعرض
هل عالم المرأة في قطعتين الملابس اللي تلبسها؟؟
لا وكل مالها تتقلص هذي القطعتين
وين ثقافة المرأة؟ وين أساليب الحوار؟؟ وين القضايا الدينية اللي تخص المرآة؟؟
وين العلم وين اصول تربية الابناء وتكوين جيل ينتفع به .
------------------------
يا كثر ما نسمع ..
ماتوقعت الزواج كذا ؟
انصدمت بالحياة اليومية في الزواج ؟
ما قدرت أفهم زوجي.....
عارفين ليه لأن منتدياتنا النسائية ثقافتها .. واطيه جدآ ومنها :
"بسررررعة بنات وين ألقى بانتي أحمر ..عشاني بألبس في الحفلة لوو ويست"
يابنات .. كيف اخلي زوجي يموت فيه ...؟؟؟
وإلا .."مين أفضل مركز ينظف لي البكيني بالليزر؟؟"
صارت البكيني منطقة عادي تطلع؟
تتقلبين على السرير بمنظر مقزز ومقرف.. وبدون ولا نقطة حياء؟؟
والله لو أمك اللي بتشيل لك بالليزر كان استحيتي ... وين الحياء؟؟
هل مات ...؟؟ أو هرب من كثر فعلنا به ..!!!!
وإلا نخنقه عشان ما يسيطر على تصرفاتنا؟؟
----------
وإلا اللي كان ماسك البنات شدة الأهالي؟؟ لما خفت شفنا الهوايل؟؟
وإلا الدين انحصر في صيام 30 يوم في السنة و5 صلوات في اليوم بس؟
كلها 10 سنوات وتفاجأت وانصدمت
وما أدري متى أقدر أستوعب هذي التغيرات
اللي أتمنى تتعدل للأفضل ولا أحتاج أستوعبها

أتمنى أنها تكون نزوة وقريب تتلاشى وتصير ذكرى أليمة في الماضي ونقول كنا وكان
أتمنى يصير الخطأ شيء عيب ما نتفاخر به ونعتبره مقياس على مدى حضارتنا

-------------
ليه صرنا نستحي من الدين ومن العادات
"أنا أتكلم عن العادات الصح مو المتخلفة"
تجي كوافيرا تقول لو ما عندك تحفظ على الإكستينشن أعمليها !!

صارت المسألة تحفظ؟
صار اللعن أمر قابل للنقاش والتحفظ؟
صار الوصل ينصح به في المنتدى على مسمع من مايزيد عن خمس مية بنت
وياليت وحده ردت وقالت حراااام
من واقعنا الكوافيرات أغلبهم نصرانيات عقيدتها المسيح ابن الله
بس الشرهة علينا إحنا يا أمة لا إله إلا الله
لو ما كانت شايفة جرأتنا وتمردنا على الدين ما قالت كذا

هل كان التوصيل عيني عينك يكتب في بروشور الصالون؟؟ جنب السشوار والتسريحة..

لو أقدم لك كريم وأقول لك لو ما عندك تحفظ على السرطان جربيه تراه يبيض
وش ردة فعلك؟
فيه ردة فعل غير إنك ترمينه علي..
وتنبهين قرايبك منه .. وتحذرين البنات في المنتديات

---------------------------
وحفلات التخرج وحفلات النجاح والزواجات
كلها معازف وأنواع التفنن موسيقى وعود وأورج
وإلى آخر الليل وإلى الثلث الأخير.. وعادي ..
ما فيه اللي يقول للغلطان تراك تماديت بالغلط .. أنتبة !!!
آخر الليل إذا ربي تفضل علينا ونزل لسمانا الدنيا
هل من داعي؟ هل من مستغفر؟ هل من تائب؟
عذرا يا رب إحنا مشغولين مع محمد عبده وأحلام
دوروا الدنيا بكل أبعادها
هل فيه ملك ينزل لك كل ليلة ويقول لك " تبين شي؟ "
أتفه ملوك الدنيا تلقين عنده 10 سكرتارية وبينك وبينه 10 أبواب
والدخول عليه بموعد إن كان يتنزل يقابلك من الأساس
أعجبتني عبارة لداعية مصري قال:
" ربنا ينزل كل يوم ينادي حد عايز حاقة.. وإحنا مشغولين عنه.."
----------------------
تجيك الوحدة تشتكي وقريتها هنا في منتديات المملكة
تقول : أنا كنت أكلم واحد وحبيته موت
ولما تزوجت غيره ما حبيت زوجي
وتحملت قلة حبي له وبعد كذا اكتشفت إنه يكلم وحده وانهارت أعصابي
طيب.. وين الغريب في الموضوع
يعني قمة الخبث والخيانة
خنتي أهلك وربك وتبين واحد طاهر.. نظيف... قلبه عذري

مافي حياته إلا أنتي
وأنتي في حياتك عشرة قبله
شي عجيب !!!
-------------------

هذا غير الصور الشخصية وعبارات وصورالتوقيعات اللي كلها إيحاءات سيئة وسخيفة
وفيديوهات التوقيعات هذي لها نصيب الأسد في السوء إحنا أرقى من كذا

أبصم بالعشرة أن كل قارئات موضوعي هذا متعلمات وجامعيات..أو في طريقهم للجامعة

ليه أحط صورة فاتنة لو مر عليها ولد حركت غرايزة
لا تقولين هذا سيكشن خاص بالمرأة ..أتوقع كلنا سعوديين وأعرف الناس بشبابنا
قولي هنا ريحة حرمة وشوفي ردة فعلهم

وحتى؟أغلب العضوات يكتبون في أقسام أخرى والتوقيع والصورة ثابتة

لا تقولين هو لو يبي يشوف شاف
ما عليك منه عنده رب يحاسبه..بس لا تكونين أنتي السبب .
يجي الشخص يوم القيامة تعرض عليه أعماله السيئة
أنتي كذبتي
أنتي أظهرتي مفاتنك لرجل
أنتي أخرتي الصلاة في اليوم الفلاني
أنت..
أنت..
أنت زنيت
يقول يا ربي ما زنيت

يقول له لكنك ساعدت أحدهم على الزنا
وكان عليك مثل وزره
والآية صريحة وحمدلله إننا عرب نفهمها بدون مترجم:
" ليحملوا أوزارهم كاملة يوم القيامة ومن أوزار الذين يضلونهم بغير علم ألا ساء ما يزرون"

هذا إهداء للبنات اللي يدخـّـلون الشباب للأسواق في أيام العوايل لما يمنعهم السكيورتي
هو بيدخل ويرقم وتبدأ علاقة أنتي السبب فيها للابد .........
وهذا إهداء للي تدل على مواقع سيئة
وهذا إهداء للي ترسل رقم واحد لزميلتها
الواحد يالله يستحمل ذنوبه.. يروح يشيل ذنوب الناس

والرسول صلى الله عليه وسلم يقول
" أيما داع دعا إلى ضلالة فاتبع فإن عليه مثل أوزار من اتبعه من غير أن ينقص من أوزارهم شيء وأيما داع دعا إلى هدى فاتبع فله مثل أجورهم من غير أن ينقص من أجورهم شيء "
أخرجه مسلم

--------------------------

والموسيقى اللي صارت زي السلام عليكم
أصلا صارت هي التحية والافتتاحية في المواضيع في المنتدى سيكشنات مخصصة للأغاني!!
وكأن الأغاني عادي مثلها مثل تبادل الأخبار وأسعار الأسهم

أفتح مواضيع هنا في مملكة المرأة إلا مقطع الصوت تلقائيا شغال أورجيعني بالقوة؟

ما دخلت سيكشن الأغاني..بس برضو مضطرة أسمعها؟
وهذا تجاوز للحدود والحريات والمفروض يكون أحد شروط كتابة المواضيع منع هذا الشيء

لو بأنزل طبخة في وسط موضوعي

قلتوا: خير؟ غلطانه الأخت في العنوان

وبالنسبة للبنات اللي ينزلون زفاتهم الموسيقية
كم وحدة مرت على الموضوع من الأعضاء وسمعتها
+
كم وحدة مرت على الموضوع من الزوار وسمعتها
+
كم وحدة بحثت في قوقل وطلع لها موضوعك
+
كم وحدة أعجبتها الزفة وحطتها في زواجها اللي بتحضره 400 مدعوة
وعداد المعاصي شغال في ظهرك وياطول الحساب
انا نفسي أحضر كل زواج ونشارك الأفراح ....
لكن بسبب الموسيقى الصاخبة واللبس اللي يسد النفس وكشف الاجسام أمام الناس

-----

زميلاتي في ثانوي لما شفتهم
من كثر ذهولي صرت أشك في نفسي
يعني لو وحده تغيرت تزعلين ويضيق صدرك عليها لكن لما 6 كلهم تغيروا

وش ردة فعلك ........................!!!!!

لا.. وأمر الحواجب هذا أمر عجيب
ما أدري هل نزلت بعدي فتوى جديدة بجواز النتف؟
نتف وتاتوو .. والضحكة شاقة فمها.. وكأن شيئا لم يكن
لو أقول : الله يلعنك بتزعل مني
لكن رب العالمين يمسـّـيها ويصبـّـحها على لعنة بسبب نتف الحواجب .
إتز أوكي عندها وطبيعي

وإلا تجيك أم 14 سنة توها داخلة عالم النتف"عالم اللعن" أسفل حاجبها كله أخضر
فعلا.. صرنا على قول المصريين .. نضحك على خيبتنا

-----

أما حكاية العبايات هذي من جد كارثة .. وياليت تكون بدونها أفضل لها .
لان بعض العبايات فتنه أكبر مما نتوقع ..
كيف أقابل ربي في الصلاة محجبة
وأقابل الشباب في السوق بالعيون اللي فيها كيلو مكياج والغرة المنسدلة
أي تناقض هذا؟
أي ديانة هذي؟
أي أخلاق؟
أي تفكير هذا؟؟؟
عبايات وإلا فساتين؟

القضية اجتاحت حتى الأمهات
حريم كبار والله الشعر اللي فوق أذنها بدى يغزوه الشيب وتقول لي
تعرفين غرز الكروشيه بأحطه في عبايتي يعني خافي الله في هالشيبات
وكونوا قدوه لبناتكم ..
وش بقيتي لبناتك المراهقات
إذا أنتي بتزينين عبايتك بورد كروشيه
ماألومهم لو طلعوا من غير عبايات

---------

عشت في مجتمع من كل دول الخليج في الخارج

وأحنا عارفين إن أهالينا محافظين أكثر منهم وبلدنا محافظة أكثر

وموادنا الدينية في المدارس والجامعات أكثر بس شوفوا حياتهم وتفكيرهم

نمزح ونلعب ونتسلى وكل بنت لها خطوط حمراء
هي حاطتها ومقتنعة فيها وفخورة بها ولايمكن أن تتجاوزها ...

هناك المحجبة ترفع راسها بحجابها ومحد قدها
وعندنا هنا اللي عبايتها ساترة ناقص تدخل في الجدار من الحياء
تخاف يقولون عنها متخلفة .. ياإنها مسوية كابوس هذي الكلمة للبنات
تذبح أمها وأبوها بس لا أحد يهمس بكلمة متخلفة ..
وأهم شي أرضي الله وديني ...... ولو يقولون عليه60 متخلفه
هناك تلقين البنت تقرأ كتب عليها القيمة ومفيده مثل :
"ذا سيكرت - نساء من الزهرة- أسعد امرأة في العالم- سلسلة شوربة الدجاج..."

هنا البنات .. تلقين في يدها رواية للهابطين اللي خسارة أكتب اسمهم هنا

-------------------------
نقطة إضافية
البلوتوثات والهوايل اللي فيها العين تزني وزناها النظر
لو أقول لك شوفي فيلم إباحي قلتي لا حرام
طيب وهذا ليس إلا اقتباس لأقذر ما في الفيلم !!
رسايل الجوال والنكت الجريئة والغريبه
والله لو أقول لوحدة قولي الكلمة السوقية الشوارعية هذي بلسانك
قالت مستحيل بس لما تنكتب كرسالة جوال تصير كلمة عادية
لا ومضحكة بعد..تسمعين الضحكات الرنانة ..
ما أدري هل القذارة صارت تضحك؟؟
والله لو ولدك وإلا أخوك قالها
كان صرختي: عيب عليك ترى بأحرقك بالنار عشان تتأدب
-------------
قبل أي فعل تقدمين عليه لا تحكمين إيمانك لأن يمكن إيمانك ضعيف في هذي الفترة أو يمكن لا سمح الله أنه ما فيه إيمان في هالفترة ..إحنا عارفين عقيدتنا تقول الإيمان يزيد بالطاعات وينقص بالمعاصي ولا تحكمين قلبك لأنه ممكن قلبك يكون قاسي في هالمرحلة

حكمي عقلك لأن العقل هو نفسه ما يتغير
قولي هل لو كنت مريضة لا سمح الله بأسوي هذا الشيء إذا الجواب : نعم
أقدمي معناها إنه حلال وخير ولا تستحين منه إذا قابلتي ربك

وإذا الجواب: لا . معناها تراك تجاوزتي حد مع ربك..
وبيكسر هالشيء عينك أنك تقابلينه وأنتي مسويته..

أي عمل قولي هل لو سويته بيكسر عيني مع ربي لو بأقول يارب اشفني وإلا يارب عطني

-------
دعوة عملاقة أبعثها من هالمكان الراقي

حملة أتمنى نبدأها ونكون قدها ونوصلها ونسمعها الجميع
كفى..استهتارا يابنات وطني
كفى ..تراجعا للخلف والانحطاط
كفى ..تنازلا عن دينك وقيمك .

قومنا حملة لا للكوافيرات الغاليات ونجحت وقومنا حملة السعودية للسعوديين فقط ولقت صداها
شدوا الهمة وساعدوني أثروا الموضوع بردودكم الهادفة

يا صاحبة الدين..أضيفي كلمة تشهد لك يوم القيامة..مو الدين في غرفتك تصلين وتصومين وإذا شفتي الغلط غمضتي عيونك وسكتي عنه..هذا اسمه شيطان أخرس

يجب أن نكون قدوه لبعضنا ونحافظ على ديننا وشرفنا ...
ياصاحبة العقل الرزين..أدلي بدلوك.. نورينا بآرائك الهدافة
ياصاحبة الثقافة..ساهمي في تثقيفنا
هذا اللي جرأ بنات الغلط على المجاهرة..وهو إن صوت أهل الدين والعقل والرزانة واطي
علوا أصواتكم خلونا نسمعها ونسمّـع غيرنا

-----

نريد وحدة تكون شجاعة وسباقة للخير
أكتبي هنا أنا غيرت صورتي الشخصية أو توقيعي
غيري كل ما بداخل جوالك من صور وغيره
يله عشان تشجعين غيرك ويحذو حذوك .. وتأخذين أجرها

----

نبي وحدة شجاعة نبيلة تقول أنا مسحت موسيقى كنت منزلتها في موضوعي
أو زفة نزلتها للبنات

------

نبي وحده شخصيتها قوية تقول أنا مسحت صور شهيرات هوليود من موضوعي لأن ملابسهم عارية

نقدر ننزل صور بتضليل خفيف يكسر جرأة الأفخاذ والصدور اللي طالعة

---------
خلوا شعارنا

الرجوع عن الخطأ خير من التمادي فيه

---------

حقوق الطبع غير محفوظة أنشروا في المنتديات والمدونات والإيميلات

خلونا نرتقي بمجتمعنا خلي لك بصمة في الحياة

--------

يارب هذا أقل ما يمكن أسويه بس أتمنى أنك تعذرني به
أنا وكل من خطت حروفها هنا إنكارا للواقع المرير
محاولة بسيطة للتصحيح.. تقبلها مننا يارب
--------
لا تقولين المجتمع كبير ومتنوع وصعب أصلحه
المجتمع هو أنا وأختي وأنتي واختك وهذي العضوة واختها وبنات خالاتنا وبنات عماتنا

والسلام عليكم

أصـدر المولـى بــيـانه . . . أيــن أنـتِي يـافــلانــه

إفــتحـوا ديـوانـها ولــ . . . تــنـظروا في كـل خـانه

موقــف صعـب رهـيب ... أسـأل الـله الإعانــــة

حيـــن أدنو من إلهي ... دون ستـر أو بطانـــة

يحاكيني جهارا ... كيف أديـت الأمـــــــــانة

حــيــنهــا تشـعر مـثـلي . . . أنهـا حقـا جَبَـانـه

كـم قـضـيت الـعـمـر هــدراً . . . بيـن غـيٍّ ومَـجَـانــه

يـا لـقـلـب الـسـوء أرخى . . . لــلـهـوى الــعَاتِـي عَـنَانَه

فــي متـاهـات الـمـعاصي . . . يــخـسر الــقلبُ رهــانَه

مـن يـجـيـب الله عنـي؟! . . . مــن سـيـعـطـيـنـي لــسـانـه

لـحـظـة مــن هـولـها لا . . . يـملــك الــعـقل اتــزانــه

ضــاع مفـتـاح الــنــهـى . . . واخــتَّـل مـيــزان الــرزانة

منقول من منتدى مشاكل ...

حروف من ذهب ..

ياليت قومي يعلمون..


جزاها الله عنا كل خير و جزى الله ناقل الموضوع أيضا كل خير.

ليت يتم توجيه دعوة لها للإنضمام لنا فمثل هذه العقول النيرة فخر لكل منتدى.

المشاركة الأصلية كتبت بواسطة abuhisham

حروف من ذهب ..

المشاركة الأصلية كتبت بواسطة abuhisham

ياليت قومي يعلمون..

.

هلا .. ابوهشام

وتسلم على المرور والرد الطيب
----------
فــي متـاهـات الـمـعاصي . . يــخـسر الــقلبُ رهــانَه

مـن يـجـيـب الله عنـي؟! . . مــن سـيـعـطـيـنـي لــسـانـه

الله يكون بالعون

مقال كافي وافي عن فتاة اليوم للأسف تفسخ الأخلاق حالة ظاهرة بوضوح عندهم والسبب الـفضائيات اللي لعبت دورها بجدارة بألأضافة الى اهمال الأهل لدورهم في المراقبة والتربية الله يصلح حالهم .

حياك خالد .

لا ننكر ان المجتمع تغير ولكن بنا الخير الكثير ..ولسنا كما وصفنا بهذا المقال ..
اقول هذا ولي الحق بالرد .. فالمقال خُص به الفتاة السعودية .. فتاة عرفت بين المجتمعات بالدين والطهارة ومازالت على ما عهدناها ..وبهذا المقال كيل عليها كثيرا .. ولم يتبقى الا ان تُخرج من الملة !



مانمتاز به : تُجلد ذاتنا ونتقبل هذا بتراحب ,, بل نسعى خلف من يجلدنا بدعوى انه السعى لاصلاح عيوبنا
المقال هذا قريته من فترة طويلة ..
وكل ماله يطول ! ويغير في مضمونه ..وكل ماله يشوه المجتمع السعودي ..

ممكن تتطلعون على هذا الرابط .. وتلقون نفس المقال ولكن ستجدون ان المحتوى عدل مابين الاضافة والحذف حتى سنوات عيشها في الخارج مختلفة
https://www.mqataa.co/vb/showthread.p...413#post150413

وابحثوا بقوقل وستجدون نفس المقال ولكن بطبعات عديدة ,, مرت بجلاديين كثر فغذوه بالمزيد من الجلد والمزيد من التشويه ,, ليخرج المجتمع بصورة بشعه كبشاعه ارواحهم .


اذًا من كتبه ليس "شخص واحد " مدعية صلاح نفسها وفساد مجتمعها بل اشخاص جلادين ..
وهدف كل منهم تشويه مجتمعنا واحلال السوداوية به ..
بل بكل خبث صوبوا سهامهم على اساس المجتمع ...على من يقوم عليها المجتمع ,, على ام المستقبل ,, على مربية الاجيال ,, سلطوا اقلامهم على الفتاة السعودية ليخرجوها مجرده من الاخلاق والشرف والدين .. فاي مجتمع سيقوم اذا كانت امه منحطة الاخلاق .. هذا ما سعى اليه الجلاديين في كتابة هذا المقال الذي مازال يلد لنا بالمزيد من الاسطر حامله الطلاء الاسود ..
=============

ابو هشام هناك فرق بين انتقاد واصلاح المجتمع وبين جلد وتشويه المجتمع
فهل من جلد وكال على المجتمع اصبح ذا عقل نير !
العقول النيرة براءة من هذا المقال .. المقال هذا تابع للسوداويين الجلاديين بشعي الانفس ..
فليحمي الرب لنا اصحاب العقول النيرة من جرثومه السواد الفكري .
حماهم الله فهم من يكتب عن هذا المجتمع بهدف اصلاحه لاتشويه لكي يسهل هدمه ..

عيبنا يالعرب ما نحب الانتقاد من اول ما نسمع انتقاد نقول له هدف خبيث يحاول ويحاول ولا نريد الاعتراف بالخطاء.....

[quote=جمرة غضا التميمية;196826]
حياك خالد .
لا ننكر ان المجتمع تغير ولكن بنا الخير الكثير ..ولسنا كما وصفنا بهذا المقال ..
quote]
ياجمرة غضا .. حالنا تغير كثير وخصوصآ العنصر النسائي .
نلاحظ لبس الرجل أكثر احترامآ من لبس بعض النساء .
نلاحظ حب المظاهر والعرض والماركات اكثر من حبهم لاطفالهم.
نلاحظ كثرة الاسواق وكثرة الفتن بها من العنصر النسائي .
نلاحظ ونلاحظ ونلاحظ ونلاحظ ونلاحظ والله يستر على الجميع .
والمقال يعتبر صادق وصريح بغض النظر عن التعديل او النقل او كم شخص قام بكتابتها .

يمكن الكلام إللي ذكرتيه جمرة غضا ينطبق على الرياض و بعض المناطق الشبه منعزلة.

لكن ما ذُكر في المقال (سواء حقيقي أو محرف) ينطبق كثيرا على ما نراه رأي العين في جده و ما رأيته سابقا في زيارة لي للشرقية.

للأسف المقال حقيقي في الكثير مما ورد فيه .. خاصة مسألة التدهور و الإنحلال الحاصلين في بعض المناطق .. و لولا الخوف من الله و الخوف من أن يعتبر الأمر دعاية للفساد لقمت بتصوير بعض ما يحصل في الأسواق و الشاليهات و البحر بصفة عامة ... مهو ضروري أدخل شاليه خاص عشان أشوف الهوايل .. مجرد جلسة على الشاطيء المقابل في أبحر تكشف الكثير.

للأسف هناك خلل كبير حاصل .. و الله يستر من الأيام الجاية.

للاسف ليست السعودية فقط بل اغلب حال المجتمعات الاسلامية الا مارحم الله نذكر قضية الحجاب كمثال ورائ الائمة الاربعة ان الحجاب والنقاب فرض في زمن الفتنة والشافعي قال سنة في زمن غير زمن الفتنة وواحد اخر من الائمة رحمهم الله قال مثل قول الشافعي وها هو الان قليل من الفتيات يتنقبن عندنا في مصر وكذلك في دول الشام وبعض دول الخليج واذا احد تكلم وقال لابد ان تغطي وجهك قالت حرية شخصية وو من ما قاله الغرب وهذي اخرتها انتشار المعاصي والترقيم والمغازلات وتجي تنصح الشاب يقولك حرية شخصية مالك دخل الا مارحم الله