مكاتب المحاماة والمستشيخيين !!!

بعد عناء دام اكثر من عشر سنوات في انتظار القرض العقاري .. واخيرا وصل ولله الحمد
اضطريت ان اشتري ارض وإلا راح علي القرض...... ولقلة خبرتي بالاراضي والعقار انضحك علي في ارض صايره مثلثه على شارعين ثلاثين وخمسطعش مساحتها 600 وللاسف بعدين اكتشفت انه الصالح للبناء 170


دريت عن هالعيب مباشرة بعد ماسلمت المبلغ للبائع بالمحكمه
لاني نزلت من المحكمه لمكتب هندسي واظهر لي العيوب قال هذه على شارع ثلاثين لازم ترجع 6 متر والشارع الثاني 15 ترجع 3 متر قلت مابقى شي من الارض لانها مثلثه وانحشرت في زاوية صغيرة قال ايش قال قانون البلديه .. ياخي مابي احطها تجاريه ابيها سكنية !!!


ودقيت على الرجال قلت هونت ( طبعا دقيت بعد البيعه بثلاث ساعات ) قال راحت عليك يابابا وانا صرفت الفلوس ... شكله داري عن عيب الارض حسبي الله عليه بعدين سكر جواله قال سو اللي تبي تسويه

المهم الا جنب المكتب الهندسي مكتب مكتوب عليه محامون واستشاريون قانونيون طبعا انا اول مره اشوف هالسوالف عندنا بالبلد لانها انتشرة مؤخرا وتلقاهم مقابلين المحاكم دايم .... وانتشرت بسبب الربح الوفير بجهد قليل وعدم الرقابه على الشهادات

رحت يمه ابي استشيرة

دخلت : السلام عليكم
قابلني مصري عليكم السلام ورحمة الله وبركاته اهلا يافندم

قلت عندي قضيه وابي اشوف الماحمي
قال الشيخ مش هنا بس انا حفيدك تفضل حضرتك

قلت جزاك الله خير وهذه جلسه بسم الله

قال: بص حضرتك الاستشارة ونطقك حيكلفك ميتين ريال

قلت ليش ؟؟؟
قال هو النزام كده ( النظام )

قلت ماشي الشكوى لله وعرضت عليه القضيه وهو يهز راسه وطلب لي شاي بعد ماوافقت على الميتين

ولما خلصت قال : بص انت حتكسب الاطيه ( القضيه ) ميه بالميه

وانا

قلت جزاك الله خير كلك خير وبركه وترجع لي فلوسي قال امااااااااال ايه

قال انا حئعرض قضيتك على ( الشيخ )
وانا اناظر مكتب الشيخ ا( فاضي ) إلا بشت معلقه قصدي بشتين كل وحده لون ومكتب كبير تحس انه تاعب على الديكور

كان بنفسي سؤال قلت هو شيخ وإلا محامي وإلا قاضي وإلا شوهو بالضبط

الظاهر من كثر مايقابلون الشيوخ صارو شيوخ ولابد من الشكليات والمظاهر

قلت مافيه مشكله طيب بكم التكلفه

قال اااااااااااااه هنا المهم حسئل الشيخ واتصل فيك بكره
وعطيته الميتين جابهن بثلاث دقايق ( خوش بزنس )

قلت ماشي

رحت للي جنبه ونفس الشي الاستشاره ب 200 وكذا مكتب بس قلت بشوف وش يقول بكره سعادة البيه

المهم بكره الا التلفون يدق
الو .... أهلا ياباشا

قال مبروك الشيخ وافق حيترافع عنك بالمحكمه
قلت كله خير وبركه ( اسلوبه يحسسك انك حتكسب القضيه وانه المنقذ الوحيد)

الزبده بكم يترافع قال لما ترجع لك فلوسك ياخذ الشيخ 30 بالميه من قيمة الارض

قلت انت تمزح ؟؟؟؟؟

وش يبقى لي ؟؟؟؟؟؟

قال مالناش دعوه
قلت هو وش يسوي بالضبط
قال يقدم على الشيخ ويشرح قضيتك له وبس
قلت هذه اانا اسويها واعرف اعبر احسن من مية شيخ من بتوعك ( قمت اهرج مثله )

قلت طيب لو خسر القضيه
قال انت تدفع مقدم عشرة الاف ريال وحنا نترافع ان خسرت ناخذ العشره وان ربحت ناخذ الثلث !!!!!!!!!!!!!

قلت تصدق انكم ماتستحون لانت ولا شيخك قلت انت لاطش مني 200 ريال مامداني اكمل بيالة الشاي
والشيخ يبي ياخذ ثلث حلالي بجلسه وتقديم اوراق باي حق هذااااااااااااا

انا ادل المحكمه واقدم بنفسي واقعد عند الشيخ واعلمه وهذه القصه
وسكرت السماعه منه



شوي الا يتصل

قلت نعم وش تبي بعد
قال اذا المبلغ كثير عليك عندنا ناس سعوديين متعاونين يروحون يقدمون عنك قلت بكم هذا يقدم ويترافع
قال هذا باربعة الاف ريال

قلت وش شهادته قال مدري يمكن ثانوي بس رجال ممتاز
قلت يعني معقب !!!!!!!!!!!!
قال تقريبا

قلت ياخي المعقب ياخذ 300ريال ويركض بكذا معاملة وهذا يبي اربعه توكل على الله

الظاهر انه الشيخ هو المعقب هو المحامي هو المستشيخ هو بتاع كلوووووووووووووووو

وبعدها حسيت انه ماعندك احد لارقيب ولاحسيب ولاتسعيره يتقيدون فيها ولا نظام مكتوب تقدر تمشي عليه ولاقانون اقتصادي واضح يجذب الشركات الاجنبية للايسثمار بالبلد

ويبقى الحكم بيد القاضي . انت وحظك او بمعنى اخر على حسب الشيخ

الله يعوضك والله البلد رايح فيها والدين ما حرك شي وانا اخوك اجل شيخ قل شيخ تسلاب ذا
والله عقب برنامج احمد الشقيري عن اليابان كرهت نفسي الصراحه

تصدق شفت برنامج اليابان صراحه كرهت العرب كلهم وتحطمت

مبدع هالرجال الله يجزاه خير

الله يعوضك اخوي
وبصراحة لاتزعل مني كان المفروض تسأل أكثر من مرة قبل لاتشتري الدنيا ماهي طايره ولو لك نصيب فيها والله لو مهما كان راح تكون لك وكان ماستعجلت وهذي أرض ويمكن تكون ارض العمر , المهم اصبر عليها لين تغلا وتقلل خسارتك او تستثمرها حدها على شوارع ثلاثين مدة وبعدين بيعها وقلل خسارتك .
وبالنسبة لليابان نعم قد يكونوا مثل ماذكر (وأنا معجب بحضارتهم وصمودهم وتطورهم) ولكن ماتزال أمتنا بخير , فاليابان فيها جرائم وسرقات وفساد وفحشاء وربما اكثر من بلادنا.

الله يعوضك يا مقاطع

وبالنسبة لليابان نعم قد يكونوا مثل ماذكر (وأنا معجب بحضارتهم وصمودهم وتطورهم) ولكن ماتزال أمتنا بخير , فاليابان فيها جرائم وسرقات وفساد وفحشاء وربما اكثر من بلادنا.

صح لسانك أبو جنى
كفانا اظهار الأخرين بأجمل صورة ومجردين من العيوب

ياباشا انا بستلم منك القظيه بعشرين وتقصيد بعد
الله يعوضك ورح لاتصالات والا موبيلي تراء يحنون هالحركات