افا ياهل الرياض ... تطفي عندكم الكهرباء بعز الظهر @ !!!!

**مقاطع من الجبيل** · 28-06-2009, 10:31 AM

بصراحه ........... صدمة

العاصمة .............. تطفي ظهراً ؟؟؟!!!!!!

ليش ياشركة الكهرباء هالقساوة على ابناء عاصمتنا الحبيبة ...

.... ماحدث .....

كنت هالخميس والجمعه الماضيه بالرياض وقعدت للسبت

المكان الروضه
تحديدا السبت ( امس ) ظهراً

الساعه الواحدة والنصف ظهرا ........ يعني عز الظهر عندما تكون الشمس عمودية وحرارة الطقس 46 درجة

وتوني حااااااااط راسي ابي انام عشان امشي العصر للشرقيه

واتفاجئ الا بصوووت الهدوء يخيم على الغرفه ...... طفاء المكيف .. لالالا مو معقول افتح الشباك اتسمع لصوت مكيفات الجيران ؟ مافيه ولا صوت .. هدوووء تام بالمنطقه ...

انا قمت وجبت قطعة كرتون لكي اعملها مهفه .. وماء بارد وشرشف لكي اعمل مكيف صحراوي وقمت اكلم نفسي ......... لا مو صحيح معقوله ياشركة الكهرب تطفونه هالوقت

واكيد لسان حال شركة الكهرباء يبي يرد ويقول ..... ايه معقوله .. ليه ياخي حالك حال المناطق الاخرى والحارات الثانيه .. انت اول مره تدري انه يطفي ؟

........ ولعلمك شعارنا الجديد ...........
ساعه عليك كل ظهريه
ومع الفاتورة الجايه سوف نزودكم بمهفة سعف مع كل فاتورة .

انا ...... بس انا بالعاصمة ياخي !!!! وجارنا طويل العمر
شركة الكهرباء ..... تحدث في احلى العواصم !

وبعدين وش دراك لو عنده محطات احتياطية ..؟

انا ....اكيد عنده احتياط ......
بس ماظنتي ببعض العواصم ينقطع الكهرب عن جيران الريس ... بلكي دئولو تلفون ...؟ وشرشح والديكم ....

المهم اسمع
بس مو وقته ياشيخ .. حرام عليك .. فيه اطفال ... فيه شيوخ .. فيه مرضى على بعض الاجهزه ... وفيه وفيه ....

الشركة .... انتم مو سعوديين .؟؟؟...
انا :..... بلا

الشركة ..... خلاص ياخي انتم تتحملوووووون بعدين تدري ان الضب يعيش في درجة حرارة فوق الخمسين ؟

انا ...... بس ماحنا ضبان حنا اوادم .. ومنتظمين بالدفع والبلد فيها خير والشركة ربحانه .. واخرتها خليتونا ضبان حسبي الله عليكم

الشركه ....عاد تحمل كلها ساعه ويفرجها ربك علينا ضغط....

انا .. يامال الضغط العالي قل امين

الشركة .. ليش ؟

انا : ياخي طالعين واكلين نازلين واكلين ... طبلون تاخذون عليه فلوس قبل التركيب .. وإذا اشتغل تاخذون فواتير بالهبل .. حتى لو كان راعي البيت مسافر والعداد طافي تاخذون رسوم ؟!!! ماعمرها صارت

الشركة : وش نسوي طيب

انا .... ياخي ابنوا محطات وضفواا ناس ....سوو توسعه واكبوا التطور العمراني ... ترى كلها توربينه ومولد كهرب من المانيا يعيش معكم عشرين سنة بدون صيانة وانتم تاكلون من خيره يعني تخسر مليار وتجني عشرين مليار

الشركة .... عاد هذا ماهو شغلك ... تبي تقطع ارزاق الهوامير اللي لاهفين خيرات الكهرباءءءءءء وتلغي بعض المميزات عنهم ؟

انا ......والله دامهم يقطعون الكهرب علينا الظهر ودي يحسون شوي .... لكن الشكوى لله .... ولغيره مذله

الشركة ... وهالحين وش تبي تراك ازعجتنا وقمت تطب بمسئولين الشركة المؤقرة

انا .... لا ياشيخ ؟!! مؤقرة ...تبيني اقول وإلا تشغل واسكت ؟

الشركة .. لا قول وش عندك ؟

انا : اخبار اللكزس اللي شراء المسؤل الفلاني من السيارات المستعملة ب 15 الف ريال وقيمتها بالسوق ب 150 الف ؟؟؟!!!!

الشركة ... هاه ؟ وش تقول ؟ اممممممم ماهو بشغلك اعجبته وشراها احسن من انه ياخذها ببلاش مثل بعض الشركات

انا ... ابتسامه .... يعني بس عشان تحلفون انكم بعتوها

اخر صرخه في عالم السرقه

الشركة .... ياخي شكلك اذا طولت بالسوالف تبي تطلع الفضايح كلها

انا ..... والله دام المهفه معي واترشرش بهالماء البارد وكهربكم طافي ويوميتكم محسوبه علي ماعندي مشكله اطلع كل الفضايح

الشركة ... شكلي بشغل كهرب الحاره اللي عندك عشان تفكنا .. وبطفيها على حاره ثانيه وبدور احد هالحارات اللي مهظوم حقهم ولايطالبون

انا .. والله يابو يالمؤقرة انا ماني من المنطقة انا زائر من الشرقيه وماشي اليوم

الشركة .. انا اقول دايم نقطع عن هالحارات ومحد يتكلم .. نقول عطل فني ويصدقون من وين طلعت لنا انت

انا ...... من المصباح السحري .. .. المهم شغل الكهرب وخل عن البربسه اللي مالها داعي وعطني مسئولك

وقله ترى بالشرقيه نادر ماتنقطع الكهرب عندنا بالجبيل .. وإذا بغوا يطفونها دايم الساعه سبع الصبح ويرسلون لك اشعار قبلها بيومين ...
وإذا اهل الرياض ناويين يصيفون عندنا حياهم الله لحتى ينتهي الصيف
ويجي الشتاء هههههههههههههههههه

يعني مايستخدمون الا اللمبات طوال السنه

،،،،،،

**لاتدف** · 28-06-2009, 10:50 AM

مسلسل الإنقطاعات يواصل عروضه ..الكهرباء السعودية "نجمة الصيف " بلا منازع

الليث : الوئام - عاتق الزنبحي :

لازالت الشركة السعودية للكهرباء تواصل عرض مسرحيتها المتجددة " الانقطاعات " والتي تجد موجة سخط عارمة من قبل مشاهديها المغلوبين على أمرهم ،

حيث شهدت ثلاثة أحياء بالليث انقطاعاً متكرراً للكهرباء استمر زهاء ستة ساعات بسبب احتراق المحول وضعف الصيانة جعلت البعض منهم يغادر إلى القرى المجاورة بحثا عن طوق النجاة من شدة حرارة الجو فيما توجه البعض منهم الى بعض الأقارب مما سبب لهم معاناة وحرجاً كبيرين .

و أوضح عدد من المواطنين لـ"الوئام" أنهم عاشوا فصول مسرحية انقطاع التيار الكهربائي منذ الساعة الحادية عشر صباحا حتى الساعة الخامسة عصرا ،

وقال علي الحرقاني واحمد القوزي ويحي محفوظ من سكان حي الغربية أن طوارئ الكهرباء (٩٣٣) لا يتجاوبون معهم معللين ذلك بعطل (الكيبل) أو المحول أو التمديدات ،

وكالعادة أوضح مصدر مسؤول في شركة الكهرباء أن سبب انقطاع التيار الكهربائي بسبب زيادة الأحمال مشيرا إلى أنه قد يستمر انقطاع الكهربائي خلال الأيام المقبلة على عدد من الأحياء.
http://www.alweeam.com/news/news-act...w-id-11125.htm

**جمرة غضا** · 28-06-2009, 11:37 AM

هالشركة تبي ضرة لها عشان تعتدل وتسنع مع حمولتها

إحتكارها لنا اجبرها على عدم الحرص على تطوير وتحسين خدماتها .... إذا الرياض العاصمة تطفي الكهرب أجل البقية السعودية

ويخرج مسؤول ويرمي السبب علينا يقول رشدوا

نرشد بالقايله

**مقاطع من الجبيل** · 28-06-2009, 12:45 PM

اقتباس:

المشاركة الأصلية كتبت بواسطة جمرة غضا

هالشركة تبي ضرة لها عشان تعتدل وتسنع مع حمولتها

إحتكارها لنا اجبرها على عدم الحرص على تطوير وتحسين خدماتها .... إذا الرياض العاصمة تطفي الكهرب أجل البقية السعودية

ويخرج مسؤول ويرمي السبب علينا يقول رشدوا

نرشد بالقايله

يعني الضراير نفعت مع شركات الاتصالات ...!!! من جرف بدحديره من اسواء للسيئ

على طاري الترشيد زين ذكرتيني

الظاهر المسئولين شافوا المشكله اللي بالكويت لها سنتين حملة ترشيد الكهرباء
_( نبيــه اخضر ) يقصدون مؤشر الكهرباء عشان مايطفي

واعتقد هالسنه حلو المشكلة وشروا مواطير اقصد محطات جديد

فحناااااااا لازم نواكب الدول المجاوره ونعتدي منهم بالسئ

يسلموو ع التعقيب جمره

**جمرة غضا** · 28-06-2009, 12:52 PM

اقتباس:

المشاركة الأصلية كتبت بواسطة مقاطع من الجبيل

يعني الضراير نفعة مع شركات الاتصالات ...!!! من جرف بدحديره من اسواء للسيئ

على طاري الترشيد زين ذكرتيني

الظاهر المسئولين شافوا المشكله اللي بالكويت لها سنتين حملة ترشيد الكهرباء
_( نبيــه اخضر ) يقصدون مؤشر الكهرباء عشان مايطفي

واعتقد هالسنه حلو المشكلة وشروا مواطير اقصد محطات جديد

فحناااااااا لازم نواكب الدول المجاوره ونعتدي منهم بالسئ

يسلموو ع التعقيب جمره

إلا الضرة عدلت العجوز

الإتصالات لو ما أن حط على راسها ضرتين ما كان خفضت سعر الجوال
"إشتراك +كلفة المكالمة" صحيح حتى الآن الخدمات لا توزاي ما ندفعه لكن أفضل من السابق
الكويت يعينهم ربي عايشين على المؤشر والترشيد وصرفوا أكثر من لو أنهم زادوا محولات كهربائية

===
إلا وش أخبار الربط الكهربائي بين دول الخليج

**مقاطع من الجبيل** · 28-06-2009, 12:57 PM

اقتباس:

المشاركة الأصلية كتبت بواسطة جمرة غضا

إلا الضرة عدلت العجوز

الإتصالات لو ما أن حط على راسها ضرتين ما كان خفضت سعر الجوال
"إشتراك +كلفة المكالمة" صحيح حتى الآن الخدمات لا توزاي ما ندفعه لكن أفضل من السابق
الكويت يعينهم ربي عايشين على المؤشر والترشيد وصرفوا أكثر من لو أنهم زادوا محولات كهربائية

===
إلا وش أخبار الربط الكهربائي بين دول الخليج

دامك تكلمتي على الاتصالات .... بنزل موضوع الان كنت مؤجله لغد .. لكن حار بحار بهالحر

،،،

مدري عن هالربط ومدري وش اخر تطوراته وبصراحه خليهم يربطون انفسهم اول ويضبطون محولاتهم والشعب اللي كل شوي يعاني وبعدين يطوروووووون
صايرين اوربا على غفله

برب بنزل موضوعي حق الاتصالات بس محتار بالعنوان بس الظاهر بخليه

الو ....... مرحبا ... تسمعني؟

**لاتدف** · 28-06-2009, 01:12 PM

صيفنااحلى

abuhisham · 28-06-2009, 01:20 PM

مالكم حل إلا مثل بعض الفقارى ما يسووا ..

عشان يوفروا فاتورة الكهرباء يطلعوا من بعد صلاة العصر على أقرب مول محترم يتمشون فيه (خاصة لو المول فيه ملاعب أو أماكن يمكن للعيال اللعب فيها ببلاش) .. ما يشترون ولا شيء .. معاهم ترمس القهوة أو الشاي و يختارولهم ركن هاديء كنهم يريحوا فيه لين العيال يخلصوا لعب و يتكُون فيه لين بعد صلاة العشاء .. و يقرب وقت نوم العيال يرجعوا بيوتهم.

**هدد** · 29-06-2009, 02:20 PM

حسبي لله عليهم

لوكان كل ديرة قدموا شكوا مثل ماتقدموا اهل بريدة الى شكوا الكهرباء

او مظاهرة يمكن يصير لها صدى ويمكن

هواميرها اللي ماغير نهب فلوسنا قاتلهم الله تعدلوا

الله لايوفقهم ويجعل كل مالهم سحت وسم في بطونهم

اجل مناوبين علينا كل يوم الساعة 2 الظهر والساعه 2 الليل يطفى من غير اي احساس بمسؤؤليه او شعور بذنب

ولا تقدير لكبير او مريض .. او اختبارات الطلاب ...

وتراني ساكن بالعريجاء ( الدخل المحدود) سابقاً حي ج .. وشركة الكهرباء لا تبعد عني 5 كيلو

حسبي الله عليهم مؤمنه الكهرب للرياض كلها ... وجيرانها يمسون الليل من غير كهرب او الظهر ..

انا وانا مسـتأجر وكلها سنه او اقل او اكثر بعلم الله ويجيني نقل واروح عن هالديرة الخايسة ..

المصيبة سكانها اللي متحملين الوضع لهم كم سنة

والله استهتار بعباد الله من هالشركة ومسؤلينها اسأل الله انه يصفقهم ضغط عالي قوة

600 فولت يعدمهم وتروح كل فلوسهم خساير وسحت

**السعاده في الدين** · 29-06-2009, 02:42 PM

ليه ما يتطورون ..؟

شوفو المانيا يستفيدون من طاقه " الرياح "

حنا عندنا كل هالشمس ومحد يستفيد منها ..؟؟ تطوروا يا مسؤولين .. ياللي ماليين كراسي على الفاضي ..

تطوروا يا غجر !!