الخميس اللي راح صحيت بدري قلت ياولد ورا ماأروح وأطلع للبر وابعد عن جو الرياض وصخبه وزحمته
كنت مشتهي اشوف الخرفان والابل في البر وهي ترعى اخذت اغراضي وقررت التوجه لروضة التنهاة ولمن لايعرفها هي روضه تقع شمال شرق الرياض وتبعد عنه حوالي 200 كم تحركت الصباح ووصلت قبل الظهر
بس الصراحه الجو كان دافي وهواء شديد شوي وحارد(يعني حار وبارد) والبر اذا هواْء ماش مايسوى بيزه ولان الطلعة بخاطري قلت بتحمل وش اسوي داق مشوا
طبعا لعلمي ان الروضه محجوزة بمواسير حتى لاتدخلهاالسيارات وتخرب لذا لابد ان اقف بجوارها حتى استضل بالسيارة وتكون مصدة عن الهواء،، واذا برد الجو وتغديت اروح الروضه واتكي بالربيع واصلح قهوتي هناك


السيارة بالقرب من الروضة






الهواء كان شديد فحولت السيارة الى مطبخ وغرفة طعام


وانا اتغدا جلست اطالع في الزهور وطبيعة المكان الجميلة

لمن خفت الشمس دخلت الروضه وفعلا تفاجأت بربيعها الاخاذ
وتذكرت الايه الكريمة واذا انزلنا عليها الماء اهتزت وربت











صورة علويه لجزء من الروضه من جهة الشرق

اتمنى انكم تكونوا استمتعتوا بالصور مع قلتها لاني ماحضرتها
لاجل تقرير ولا كان صورت التفاصيل ومنها الهوشه اللي صارت بين قبون وكتيبة نمل ساعه علشان أفكهم

اعوذ بالله ما احد يتحمل احد

خسارة .. فاتتني الهوشة.

من جد فات علي اصورها فيديو عموما انتهت الهوشة بانتصار النمل وهذا متو قع والكثرة تغلب الشجاعة مصير القبون كان بتمثيل النمل فيه وتقطيعه وارساله لثلاجات مملكتهم حيث سيتم توزيعه على فقراء النمل من ضحايا الاسهم وتجار العقار
سبحان الله النمل طلع احن واكرم من البشر

على كده ما كانت هوشة ..

كانت رحلة صيد نملية.

المناظر رائعة جدا

احسن من بحرنا كله مجاري الله يكرمكم