بسم الله الرحمن الرحيم

والله اني متوقع من هالعروض

السلام عليكم ورحمة الله وبركاتة

أخواني أنا من ملاك نيسان وبالاخص ألتيما 2010 سمعت عن عرض نيسان الخياااااالي استخدمها ثلاث سنوات واستمتع بنصف القيمة ( أو شيء زي كذا ) وبصراحة بمجرد التفكير به العرض خيالي ولاكن كان معي قريب لي وقال : ياخي مستحيل العرض يكون كذا بدون شروط لانه الحمراني هو الخسران في هالحالة ..

وكنا نلف في الرياض .. قال : عندك شيء .. قلت : لا والله قال خلنا

نمر الحمراني ونشوف وش السالفة ..


دخلنا وبعد ما سأل الموظف عن العرض وقال له : أنا بأشتري ألتيما ستاندر بكم تطلع علي ..

قال : تدفع دفعة أولى ما يقارب الـ 17000 وتقسط 820 شهريا لمدة ثلاث سنوات .. حسابيا تطلع عليك السيارة بـ 46500 ريال ولاكن ترجع السيارة لهم ( وهنا الزبدة ) فية شرط موب مذكور للعلن وهو أنه تكون السيارة ما تعدت الـ 90.000 كيلو وهو شيء شبة مستحيل للشخص الطبيعي وكل كيلو زيادة يحسب بـ 0,25 ريال .. وعليك الحساب ..

أو تدفع دفعة 38000 ريال وتأخذ السيارة ..

بالحساب الشخص الطبيعي راحي تعدى الـ 90.000 كيلو بكثييير فراح يقرر انه يشتريها لانه حرام يدفع فلوس ويعطيهم السيارة بعد ولاكنه بينصدم بالدفعة الاخيرة الكبيرة وهي 38000 ريال وحتى لو دفعت لهم الدفعة الاخيرة راح يكون سعرها 84500 ريال وهو بالظبط مثل سعر الالتيما بالتقسيط لمدة خمس سنوات ..




خلاصة القول إذا أنت راح تشتري السيارة وما راح تمشي كثير ..

يعني اقل من 30000 كيلو في السنة يعني 82 كيلو في اليوم (بس ) ..

العرض بيكون حلو لك ..

) وما أتوقع فيه أحد ما يتعدى الثلاثين الف في السنة )

أنا مثلا لي شاري السيارة ما يقارب اربع شهور وطبلوني 17500 كيلو

وإذا أنت تتوقع تتعدى الـ 30000 كيلو في السنة اببببعد عن العرض

ولا تخدعك كلمة نصف القيمة


ووالله ويعلم الله اني ماني حاقد على شركة الحمراني ولا الجبر أو سمسار لشكرة ثانية كل ما في الامر اني ابي النصح لأخواني المسلمين ولا ابي احد ينخدع بجشع التجار والي يبي يتأكد من كلامي يمر أقرب وكالة أو يدق عليهم ..

وأسف على الإطالة ولا تنسوني من صالح دعائكم

جزاك الله خييييييييييييييير ...... الاعلانات الترويجية مصممة للكذب والخداع ولا يكتشفها الناس الابعد مايكثر ضحاياهم وشكرا على فضحها وتوضيح الحقيقة ...

كل وكالات السيارات نصابين

هم مأعتبروا لضمان السيارة

ولايعترفون فية


ومع شركة نسيان عفوا نيسان سوف ينشف ريقك منهم

صحيح ذكر ذلك في المنتدى قبل فترة .. ذولا وكالائنا يبدعون بالعروض الكاذبة او المخادعة ,


هنا التوكيلات تمارس فن العروض !!!!!!!
احذروا كذب عرض التوكيلات العالمية الرمضاني