السلام عليكم ورحمة الله وبركاتة

اخواني وزير العمل الدكتور /غازي القصيبي انا عندي واقعة معة اول ما تخرجت من الجامعة ورجعت السعودية كنت متفائل تفائل مالة حدود على اساس اني عضو بعثة سابق على
حساب خادم الحرمين الشريفين / فهد بن عبدالعزيز ال سعود رحمة الله وجعل مثواة الجنة باذن الله

المهم بحثت عن عمل مدة تقارب 7 شهور ولم اجد حتى صدرت شهادة معدلة شهاداتي بالسعودية مع العلم اني كنت مبتعث!!!!
اجل كم ياخذ الخريج اللي درس على حسابة الى ان تعادل وزارة التعليم العالي السعودي شهاداتة ؟؟؟؟؟؟؟؟؟؟؟؟

المهم ارسلت فاكس الى وزير العمل د/ غازي القصيبي المحترم
شرحت فية كل معاناتي واني حصلت على شهاداتي هذي على حساب الوطن وابي اخدم هذا الوطن المهم جاني اتصال ثاني يوم الســــــ 9ــــــاعة صباح جاوب الهاتف كلمني شاب سعودي محترم يقولي سبق وارسلت لنا فاكس وشرحتلة الموضوع قالي طيب اخوي تقدر ترسلي صور بطاقة احوالك وشهاداتك قلتلة طيب المهم ارسلتها اسف نسيت اقولكم اللي اتصل علي يوم سالتة من معي قالي مكتب وزير العمل حسيت وقتها انة في امل في الحياة

المهم انتظرت اسبوع ولا فية اي رد رجعت كلمت الشخص هذا على الثابت اللي كلمني منة اتصلت 32 مرة الين في المرة الـــ 34 كلمني نفس الشخص وبكل احترام وهدوء قالي اخوي نصيحة الى وجه الله تعالى الوظايف اللي عندهم لو اخوي معة نص شهاداتك استحي اتصل علية اقولة توظفها وانا انحرجت معك اذا ودك تعال وانا اعطيك خطاب لهم قلتلة ابي اعرف افضل وظيفة قالي كاشير في هارديز ههههههههههههههههههه 2000 ريال

انا حاصل على بكالوريوس ادارة اعمال 76% & حاصل على التوفل & معي ثلاث دورات تدعم تخصصي

المهم قلتلة جزاك الله خير وما تقصر والله يوفقك على النصيحة اخوي

المهم لي زملاء دراسة من الامارات وقطر والكويت كلمتهم وقلتلهم معاناتي وما قصروا صراحة وفي خلال شهر كنت سافرت الى دولة الامارات العربية المتحدة الشقيقة والناس هنا اهل كرم وما قصروا توظفت وعطوني بدل سكن والحمدلله على كل حال لا ووظيفة ما كنت احلم بنصها في وطني للأسف والحمدلله على كل حال

فانا اقول قصتي هذي لان الوظيفة اللي حصلت علية في ديرة الجيران دار زايد الخير كان ممكن احصلها في ديرتي دار ابو متعب صقر العروبة لاكن الفرق انة هنا مافية فساد مقارنة بالفساد في ديرتنا

ملاحظة الوظيفة اللي حصلت علية كانت عن طريق تقديم حالي حالي الناس ولا كان فيها اي تدخل بشري القبول والرفض عن طريق الكمبيوتر

والله على ما اقول شهيد وهذي معاناتي في وطني الحبيب والسلام ختام

اخوكم مواطن سعودي منبوذ/الدوسري 512

وإذا رأيت الرزق ضاق ببلدة ....
وخشيت فيها أن يضيق المكسب
فأرحل فأرض الله واسعة الفضا .....
طولا وعرضا شرقها والمغرب

شي محزن ان تعمل في مطعم
وذو الواسطة العامل الاجنبي يتمتع بالوظيفة ,,بدعوى السعودة المكذوبة
لكن أهذه الدنيا الكل يبني مستقبله خارج وطنه !!!

حياك يا الدوسري
هذا اللي نقوله يا قصيبي السعودي صار غريب غريب وترك البلد غصب عنه
بدل ما يخدم ديرته و يتوظف هنا صار يدور العيشة برا
هذي نتيجة سعودة القصيبي النادل
والاجنبي متربع على عرش الوطنية هنا
يمنح افضل الوظائف حتى بدون مؤهلات تشفع له
معقول مبتعث يرسل من قبل الدولة وتصرف عليه واخرتها في مطعم !!!!!!!
وش معناه ان برنامج الابتعاث فيه خلل او التوظيف فيه الخلل !!!
لكن ما دام لقيت وظيفة في بلد مجاور اذا الخلل في التوظيف ووزيره الفلته

الحمد لله على سلامة العودة الى ارض الوطن بالسلامة اولا

ثانيا آلمنا ماحصل معك اخي الكريم واعتقد ان نفس الشيء حصل مع الكثيرين امثالك والذين لايملكون المؤهل المطلوب بكثرة عندنا ( و)

ثالثا اتمنى عودتك قريبا الى ارض الوطن وفي افضل الوظائف التي تليق بشهاداتك ودراستك

حسبنا الله ونعم الوكيل

نعم هذا حال الكثير من شبابنا الطموح متى بس يقال كل من أفسد أولهم القصيبي..................

المشاركة الأصلية كتبت بواسطة julina

لكن أهذه الدنيا الكل يبني مستقبله خارج وطنه !!!

هذا الدنيا الكل يبني مستقبلة خارج وطنة فعلا واكبر دليل الاجانب اللي عندنا وحنا السعوديين في الدول المجاورة الشقيقة يعني الحمدلله وانا ماني بالحالي معي اخوان سعوديين واجد واخوات سعوديات افاضل

واشكرك على التعقيب julina

المشاركة الأصلية كتبت بواسطة جمرة غضا

حياك يا الدوسري
هذا اللي نقوله يا قصيبي السعودي صار غريب غريب وترك البلد غصب عنه

يبي يجي الوقت اللي يتمنى فية الدكتور / غازي القصيبي انة نصف ابناء وطنة على الغريب

على ان القصيبي موب غريب علية حبه للأجانب فهوا متزوج من المانية !! وابنة الكبير متزوج من حبشية وهوا اصلا من دولة البحرين الشقيقة يعني الوطنية عندة موب منعدمة ولاكن متخبطة

وانا كنت خايف من العيشة برا قبل لا ادرس بالخارج بس الأن اقدر اقول لاخواني دول الخليج اذا يبون يعطونكم بدل سكن يوفر سكن لكم فالهجرة الى هناك افضل والحياة ولله الحمد ممتازة ومثل ما عندنا دين وتقوى اخوانا بالخليج نفس الشي


وشكرا على تعقيبك جمرة غضا

المشاركة الأصلية كتبت بواسطة مقاطعهم&حارقهم

ثالثا اتمنى عودتك قريبا الى ارض الوطن وفي افضل الوظائف التي تليق بشهاداتك ودراستك

حسبنا الله ونعم الوكيل

عائدون باذن الله بس خلني احصل الجنسية الاماراتية اول لاني صراحة ودي ارد اشوف هلي وانا اماراتي باذن الله وما عاد نبي من السعودية الا سلامة الاهل وعيال الديرة والحج والعمرة باذن الله تعال ولا الوظايف خلها لهم ولعيالهم ............... نحتسبها بالاخرة وكل راعي مسؤل عن رعيتة

ويعطيك العافية مقاطعهم&حارقهم

المشاركة الأصلية كتبت بواسطة بئا سذا

نعم هذا حال الكثير من شبابنا الطموح متى بس يقال كل من أفسد أولهم القصيبي..................

يقال !!!! ليش بالعكس هوا مسوي اسمى وظيفة في الوطن الحبيب تحمل كامل المسؤلية على اني اشوفها كبيرة علية

تريد تتطبق نظام السعودة وتضمن نجاحها اقولك كيف

1- ايقاف الاستقدام من الخارج خاصة اصحاب المؤهلات نبدأ من اعلا شي الى اسفل وليس العكس ..........
2- الشركات التي لا تحقق نسبة سعودة فوق 75% تحرم من المناقصات الحكومية لانهم يكسبون واجد منها هالمناقصات صحيح ان اغلب هالشركات يملكها في الأصل ......................ولاكن اسمنا سوينا شي
3-تحديد مدة بقاء الاجانب ذوي المناصب العليا داخل المملكة وفق قيود وشروط
4- جلب افضل الكوادر التدريبية من الخارج وعمل برنامج زمني خاصة بالحكومة وعلى ضوئة يتم التوظيف اجباري في القطاعات الخاصة وتحديد الرولاتب عن طريق المؤهلات
5- تقديم تسهيلات الى جميع من يقوم على زيادة السعودة لدية مقابل الاجانب وخاصة في المناصب العليا وتكون مساعدات فعلية وليس شكر في جريدة او شهادة تقدير لان الشركات تبحث عن الربحية وبالتالي الجزاء يكون ربحي من منح اراضي خاصة للشركة لانشاء مصنع جديد مثلا او تقليل الرسوم الجمركية للشركة في موادها الاولية اللتي تستوردها وبالتالي حققت الشركة تخفيض بالربح وبالتالي يتشجع غيرهامن الشركات بزيادة نسبة السعودة للحصول على هذي المميزات والحوافز
6-انشاء مشاريع حكومية لاجل توظيف العاطلين وتخصيص ميزانية ضخمة لها .
لماذا ؟ لما للبطالة من اثار سلبية على المجتمع وقد تكون قاتلة بل هي قنبلة موقوتة وايضا كلما زادت البطالة زادت ارضها خصوبة لاعدائها لاجل زرع الفتن وتجنيد شباب الوطن في امور لا يحمد عقباها وبالتالي اذا نظرنا لما قد يحدث من سلبيات بالتالي محاربة البطالة ولو بميزانية ضخمة بداية وتكون مدتها عشر سنوات قادمة تكون وقاية على المدى القصير جيدة

ويعطيك العافية بئا سذا

مسكين انت ايها الشاب السعودي قدر الله لك ان تكون سعوديا فأصبر تؤجر