المشاركة الأصلية كتبت بواسطة الطيرالحر

تبغى مكيف مثل تويوتا هايلكس

عليك بالزامل كلاسيك 24 وحدة كمبروسر كبير

انا عندي 9
وماشاء الله تبارك الله القوووووووووووووووووووووووووووووووووة

متى اشتريته ؟ وبكم
الان الزامل الكمبرسر الكبير يجي هندي مو امريكي
لكنه على حسب كلام الكثيرين نفس الامريكي بالجوده !

السلام عليكم
والله يأخي موضوعك قديم لكن أحب أن أشاركم بالرأي
أفضل شي من وجهة نظري المتواضعة طبعا Mitsubishi لكن مشكلة مكيف ميتسوبيشي أول شي أنه نوعية قديمة ثانيا وكيلة تعبان وللمعلومية
وكيل مكيف ميتسوبيشي إلكتريك مو ميتسوبيشي دايا لا دايا وكيلة أبار وهذا شي ثاني
أنا أقصد
Mitsubishi Electric
مشكلتها يأخي أنه وكالتها تعبانة يعني نايمين بالعسل ومطنشين أي عروض أو تخفيضات أو إعلانات نهائيا وأسمها الشركة السعودية للإلكترونيات
صاحبها واحد من أبالخيل
كان لهم فرع بالشرقية وسكر ولم يتبقى إلا المستودع بالميناء بالدمام
أما إذا أنت بالرياض فأنا بنفسي جيتهم
مكانهم يا دافع البلاء بعيد جدا وغير كذا بمكان نائي ومنعزل عن الناس
حصلته بالمستودعات اللي جهة مصنع السمنت قريب من مصانع الغلال هناك
مستودعات كثير للإلكترونيات
مستودعهم كئيب فعلا تقول مبنى مهجور
لكن شهادة لله كل اللي عندهم أصلي بأصلي ياباني ياباني من النوع القديم بكرتونه
وأسعارهم غاليه عندهم طن ونص 18000 يعني تقريبا 3800 ريال بارد فقط
24000 وحدة يعني طنين تقريبا حول ستة وخمس إذا ماخاب ظني
أما 30000 يعني طنين ونص حول سبعة وميتين إذا ماخاب ظني
لكن عزالله ركب وأرقد وأمن لمدة عشرين سنة أو يمكن أكثر قدام إنسى شي أسمة صيانة اللهم تنظيف فلتر وبس أما غيرة كبر المخدة
لأن هذا يجي ياباني ياباني أصلي مو لعب مو صيني أو ماليزي أو تايواني
عندهم الدرجة الأولى ياباني ياباني
وعندهم ياباني تجميع بريطاني U.K
وعندهم ياباني تجميع تايلندي
وأغلي شي ياباني صحيح غالي لكن لك وللزمن كد ومد زي مايقولون
لأن هذا ميتسوبيشي أصلي وأعتقد الأعضاء يفيدونك
بالنسبة لي أخذت واحد 24000 يعني طنين
صحيح شكلة ومنظرة قديم والريش لعلمك مافيها إكتروني لا توجيها كله يدوي وريموت أبوسلك القديم يعني ريموت إلى المكيف مرتبط بسلك لكن يكفيك جودته وقوة ماطورة مو مثل اللي منتشر بالسوق أغلبها طبعا يا صيني يا ماليزي يا هندي أو غيرة من نوعية مشي حالك هذا شي لك وللزمن ركب وإنسى مرة وحدة
أما إذا تبي أنت أو أحد الإخوان موقعهم أو وصفهم أنا مستعد أوصف لك موقعهم
وأي سؤال أو أستفسار أنا حاضر لك وللإخوان
وأسئل الله لي ولك ولكل الأعضاء التوفيق

المشراق انت تتكلم عن مكيف اسبلت ولا شباك؟؟ مانيب خابر مكيف شباك بريموت

على كل حال مالله بحادنا نشتري بهالسعر الخرافي وهو مجرد فرق العملة بين الريال والين .. انا عندي مكيف جبسون امريكي تجميع سعودي ضمان خمس سنوات على الكمبروسر .. والحمدلله تبريده طيب . شاريه بسعر 1250 ريال .

يعني بهالسعر اقدر اشتري ثلاث مكيفات بدال مكيف واحد متسوبيشي !!

أهلين أخوي جو ساقان يامرحبا بك
نعم اللي أتكلم عنه هو سبيلت ميتسوبيشي
شباك لا لا يوجد عندهم شباك ميتسوبيشي إنتهى زمان منقطع من المصنع موقفينه
أنا أتكلم عن السبليت من النوع القديم سلمك الله أبو ريموت بسلك عندهم لهالحين يباع
أنا روحتي لهم كانت قبل رمضان بأسبوعين ثلاثه تقريبا
عندهم القديم الأصلي أبوريموت بسلك للمكيف يعني مرتبط بسلك مباشرة
وعندهم سلمك الله Mitsubishi mr.slim هذا يجي ياباني ياباني أصلي
هذا لأنه ماحد يجيهم يبي نوع قديم لكنه للأمانه أصلي لك وللزمن ركب وأنسى
ألحين زي ماقلت الناس تبي صيني أو ماليزي رخيص بألف وخمس إلى الألفين مشي حالك ماعاد الناس عندهم فلوس وطخطخة زي أول الناس تبي رخيص وزين
صحيح نعم أتفق معك سعرة غالي جدا ولذالك لعلمك ماعندهم محل يبيع مباشرة
يبيعون بالمستودع حقهم جهة مصنع الإسمنت
لأنه زبائنهم قليل جدا يجونهم يكشون الذبان على قولتهم

لأن سعرهم غالي ومكيفاتهم قديمة
أي إستفسار أنا حاضر وربي يوفقك

MR SLIM مكيف قوي ويستاهل بكم ارخص نوع منه

السلام عليكم
بالنسبة لسؤالك عن mr.slim
هذا سلمك الله ياخوي يجي ياباني ياباني
وفية يجي منه ياباني إنجليزي
اللي أذكرة أنه قالي يجي طن ونص مطور يعني
20.000 وحدة يعني أكثر من طن ونص وأقل من طنين
زي هذا اللي بالصورة
http://www.kalosflorida.com/service_ac_ductless.cfm
وشفت عندهم mr.slim يا طويل العمر طنين ونص يعني 30.000 وحدة

تقريبا قالي حوال الستة وخمس لكن أكيد حول الستة الالاف
وعندهم سلمك الله الدولابي زي اللي بالمساجد
وعندهم باكج Package يعني اللي يجي تمديد لكذا غرفة ويحط فوق السطح
وعندهم نوع يقاله سلينغ اللي يعلق بالسقف نفس النظام القديم ياباني اصلي

متوفر عندهم بأختصار
لكن مشكلتهم إدارة تعبانه جدا
مكان غلط عروض مافيه تخفيضات مافيه
ومكانهم صعب يدله الواحد بجانب مصانع الغلال اللي عند شركة السمنت
أصلا من يوم شفت لوحة محلهم وأنا غاسل يدي
حسيت أنها من أيام الثمانينات مصدية وأكثر الكتابات منمسحة
مكتوب عليها الشركة السعودية للإلكتروينات وعليها علامة الميستوبيشي
لكن كل اللي عندهم أصلي
MITSUBISHI
MADE IN JAPAN
MADE IN UK

ميتسوبيشي الشباك والله من الازعاج تحسفت اني شريته يا خسارة الواحد ب1920 ريال

ابو نواف
يارجال اهم شي البراد ثلج
لكن الي عندك 18 والا 24 ؟

هلا اخوي الركن اللي عندي 18 صحيح براد لا يعلى عليه بس مزعج شوي

جزاك الله خير يالمشراق ..