على فكرة الاتهام للهندي بالنصب والدعوى عليه بذلك من اختصاص المحكمة
وش دخل الشرطة ، الشرطة ليست جهة محاكمة ، بل جهة تنفيذية
فالإتهام هنا : بالنصب و الاحتيال
*
*
الأمر الثاني
أثناء سماع أقوال الأطراف لا يحق لسامع الأقوال الضرب بالكفوف ، فتكون الافادة تحت التهديد وهذا مخالف للنظام
7
7
شكلي قلبتها جد
لكن للفائدة
7
7
7
موفق يا أبو علي
بس
لا تسرح في الصلاة وأنت تحضر للسيناريو

مملوح ماقلنا شيء.

لكن محامي ومستشار قانوني برضه ماقلنا شيء

"اخوك الصغير ابوعلي يتعلم منك "

ج6


ابوعلي : نعم , من معي ؟
المتصل : الوو, "صوت نسائي ", الوو , سلام عليكم ورحمة الله وبركاته ,لوسمحت اخوي ممكن اخذ من وقتك شوي
ابوعلي : ايش , أم علي , شوفي الظاهر انه صوت .
المتصل :الو , اقول يااختي , ممكن تسمعيني الله يجزاك بالخير.
ام علي :تفضلي .
المتصل: انا , وانا اختس سعودية فقيرة مسكينة من اسرة معروفة بالرياض , ام ايتام وزوجي توفي و ماله تقاعد ,ساكنة في بيت وسط البلد ,و بجنبنا بيتنا عمال باكستانيين عزوبيه . والحال مايعلم بها الا الله
ام علي : من سمح لهم يسكنون ؟؟
المتصل : تكفين اسمعي مني ولاتقاطعيني لين اكملس قصتي .
ام علي : كملي , كملي , انا اتوحى

المتصل : تصدقين ان بيتنا مافيه مثل بيوت الناس , والله مانذوق الا من العيد اليه , ولولا الله ثم صدقات المحسنين
برمضان كان رحت انا وبنياتي الخمس ووليدي الوحيد نشحذ بالشوارع عند, وفي مرة من المرات قلت اروح اشتغل عند حمولة سعودية الله منعم عليها اترزق الله وحط البنات بـ , تخبرين البنات اخاف عليهن من الخطف وأصحاب .حتى لو نفخوا عليّ اللي اشتغل عندهم وتفلوا بوجهي قابله ,ولوتشوهت سمعتي المهم اجيب لليتامي العيش .
ياختي حنا ناس متعففين ولولا الحاجة مزهمت عليس , اذا عندس بقايا

او اجي اخذهن منس ,لاتنسيني حطين على بالس , الله يرحم والديس ويدخلس الجنة.
ثم سكتت فجأة وجلست تبكي بحرقة وصوت مبحوح يقطع السبد.
وسكرت

ام علي : وهي متأثرة جداا, لاحول ولاقوة الابالله العلي العظيم , انا لله وإانا اليه راجعون ,عليس بالصبر, والدعاء , الله يفرجها من عنده , اطلبي الكريم .الله ماينسى عباده , وماتضيق الاتفرج .
الو لووو, الظاهر انه طبقت السماعة .
ابوعلي : وش السالفة يا ام علي ؟؟
ام علي :المشكلة اني ماسمعته زين , تقول انه محتاجة وام ايتام وساكنه بالإيجار,
وجلست تبكي وسكرت التلفون .
ابوعلي : طيب ماسجلتي رقمه بــــ ؟
ام علي : يابن الحلال ماجاء على بالي , وهي ماتركت لي فرصة .
ابوعلي : اسمعي يا ام علي انا متاكد انه تبي تزهم ثانيه حطي بالس .
قومي اجمعي له من خلاقين البيت واذكر اننا شارين قطمة وكيس اول مارفعوا الاسعار, روحي انت والشغاله نزلوهن بالحوش مع الثياب .


ام علي : صدقت يبوعلي , لازم نتصدق وندفع البلاء عنا وعن عيالنا , الواحد يجمع الدراهم ومايدري يمكن يجي وقت يجمعون لحمه وعظامه

ويحطونه بـ ماعنده انيس الا عمله من

او قراءة او او
ابوعلي : لا, واذا مات الواحد توازعوا قروشه و نسوه , والجيد منهم يقضي دينه .
ام علي : اخاف ماتجي ؟؟
ابوعلي : جاس الشيطان , بدا يوسوس لس , الحرمه محتاجه . وماطلبت دراهم , طلبت اكل وملابس .


ام علي :اجل ابروح ازهم الشغالة تنزل الارزاق من فوق , ياتوتو ... توتو.....
تعالي نزلي الرز والسكر من المستودع وحطيهن بالحوش .
ابوعلي : روحي لاتحط ولا ترا عيالس عايشين عليه .

ام علي : اللهم صلي على محمد , وش ذا الحرص توتو ماتعرف الاندومي من الرز ؟؟ لاتخاف عليه .

ابوعلي : تخبرين الكراتين فوق واجد , واخاف تلخبط .


مير افتحي نسمع اذان العصر , من بعد رمضان كل امامٍ له وقته الخاص الاماشاء الله معتمدين على البنقاليه.

ام علي : ابشر, اسمع هذا الوليد يذن يقولون اسمه دغريري من جيزان ليته زوج لبنيتي عالية .

ابوعلي : اسكتي خلينا نتوحى الأذان .

وبعد الفراغ من الأذان وذكر الله ..

ابوعلي :مع السلامه قومي العيال للصلاة لاتخلينهم .

ام علي : وانت ورا ماتقومهم , ولا حنا نخلف ونتعب , وكل شيء علينا حتى نسلمه لكم آخر كل شهر ,
قلي وش دورك بالبيت؟؟! لاتروح الاوانت ماخذهم معك .سمعت ؟؟

ابوعلي : مع السلامة نتفاهم بعد الصلاة , ولاتنسين العيال .

يدخل ابوعلي بدون عياله يجلس في طرف الصف الاول ويؤدي تحية المسجد, وبعد الانتهاء من الصلاة يسمع اثنين من جماعة المسجد يتهاوشون


الاول : يااخي كان ماتبي حنا نبيه.

الثاني : الجو تغير , ولا له داعي ترفعون التكييف .
والله اني اوجس البراد , حسبنا الله ونعم الوكيل
الاول : المهم شف لك ثوب صوف ولا يا اخي لاتصلي معنا , المساجد واجد .
ترانا خسنا حر.
يقطع الكلام صوت يقيم للصلاة .


يتبع غدا ,,,

بكرى نبغى تكملة القصة عبر الفديو

تامر امر وتاكل حلوى بالفستق والتمر

ج7



يقطع الكلام صوت المؤذن يقيم للصلاة
يؤدي ابوعلي الصلاة ويخرج الى البيت ويدخل على صوت ام علي تهاوش عيالها
ام علي :يروح ويتركني مع عياله , وانا ماغير اقوم الاول وروح اقوم الثاني ارجع للاول احصله يشخر من النوم
ماصارت , انا طفشت . اسمعوا ثلاث عدات مافي غيرهن ولاابرش عليكم مويه .
يدخل ابوعلي ويجلس بالصالة رجل على رجل .
ام علي : يااخي ماصارت , لاتروح للمسجد الا والعيال كلهم معك , انت المسؤول عنهم , مو معقول تعطلت اشغالي كن ماعندي شغل الا هم .
خل لك دور ؟؟ حس فيني !!
ابوعلي : حلو ذي , وانا وش انا مسوي , وش ذا الكلام , صراحة غريبة منس يا ام علي , وانا اقول انس الحرمة العاقلة الحكيمة ام عيالي , لا لا فيه شي ء , اكيد احد معبي راسس عليّ , هذولي الناس مايرحمون اذا شافوا واحد مبسوط مع زوجته ومتفاهمين حطوا عينهم عليه .
ام علي : اقول اسمع عاد بلا خرط وضرب فرش ملينا من هذا الكلام خط خطين وامسح الثالث حنا لازم نتفق على امور .
ابوعلي : "بصوت مرتفع جدا " قام منه الأبناء , اللي يسمع كلامس يقول اني ضاحك عليس , ولاصار بيني وبينس عشرة , صدق الرسول يوم يقول عليه الصلاة والسلام عن النساء انهن يكفرن العشير , والظاهر انس معلمة قديمه وتعرفين حقوق الزوج زين.
ام علي : ايه ارفع صوتك سمّع الجيران , من زمان ماسمعوا صوتك , انت ناسي كل اللي قدمته نسفته نسف , خلاص البيت باسمك وسيارة جديدة معك .وش يهمك , تقدر تكرشني انا وعيالي في أي لحظة.
ابوعلي : وش دعوى , ليه انا مااعرف الاصول , بعدين وش المطلوب اسويه؟؟
ام علي : نتفاهم .
ابوعلي :على ايش نتفاهم ؟؟
ام علي : اولا العيال مسؤوليتك مالي علاقة بهم .
ابوعلي : والبنات ؟؟
ام علي : ماعليك منهم .
ابوعلي : موافق , خلص كلامس ؟
ام علي : باقي , تكتب نصف البيت باسمي .
ابوعلي : معصي ,والظاهر انس انجنيتي . فوقي لنفسس ,خلاص اكثر من كذا ما عاد اتحمل .
ام علي : وليه اسم الله عليك , عسى ما انت مريض , انا ماطلبت الاحقي , بعدين نسيت مواعيدك لي يوم تروح للمحكمة وتقول " اوعدس ياعمري اني اذا عمرت الارض اكتب نصفها باسمس " ولاالواحد مو قد كلمته .
ابوعلي : وشلون انا ماني رجال عند كلمتي صحيح ماتربيتي ؟؟!!
ام علي : انا اللي ماتربيت ؟؟ واخذت تبكي ؟؟
ابوعلي : صيحي من اليوم الى بكره , معروف هذا الاسلوب , هذي نسميها دموع التماسيح , وانا انصحس لوجه الله انس تعقلين وتهتمين بنفسس وعيالس واتركي عنس السوالف والهواجيس وكلام الحريم اللي لايودي ولايجيب , ولاودي اضرس صعبة ام عيالي
ام علي : وش بقى , كمل , اصلا ظهرت على حقيقتك . انت انسان اناني وما تحب الا نفسك ,نسيت وش كنت يوم تاخذني من بيت اهلي ؟؟ ولا اذكرك ؟؟ عيشتني المر والفقر وصبرت عليك , يا اخي اعتبرني شغالة .
ابوعلي :وهو غضبان " اسكتي احسن لس " , الظاهر الأدب ماينفع معس .
ام علي : مقاطعة بشدة , وش ناوي عليه هذا الناقص , تبي ترفع ايدك عليّ , قم عطن طراق ورن اشوف .
ابوعلي : ملتزم الصمت .
ام علي : عطن قم قم عطن ان كانك رجال!!
ابوعلي يصفع ام علي على خدها , وهو يقول اهلس ماربوس انا اربيس , اطلعي عن بيتي , ضفي خلاقينس .
ام علي : وهي تصرخ وتتوعد يانذل ياحقير , ترفع ايدك عليّ , لكن شف اذا ماخليتك تندم ماكون انا بنت ابوي .
ابوعلي :الله يرحمه لوكان فيه ماتطاولتي على زوجس , اقول لايكثر , حرمه ماتعرف قدر زوجه , ماتستحق العيش معه , اطلعي بره ولاتنسين تضفين عيالس , انا ماني ناقص بزران .
ذهبت ام علي للغرفة ودموعها على خدها .وسحبت شنطة سفرها التي كانت تستخدمها اثناء السفر يوم كانت تسافر مع ابوعلي الى مكة لأداء العمرة وزيارة مسجد الرسول صلى الله عليه وسلم , وبدأت تصف ملابسها بشكل عشوائي وزفرات صدرها وقطرات دموعها تبلل كل زاوية من زوايا شنطتها , واخذت تحدث نفسها قالوا لي وانا ما اسمع الكلام اصلا الرجال مالهم امااااان, وين اروح مع بزارين , امي تعبانه وعاجزه عن نفسه واخوي ساكن في بيت صغير عسى يكفيه لا ومن زين نفيسته , واختي مسافره ولا ادري متى ترجع ؟
وين اروح , البيت باسمه ؟ حسبي الله عليه سته حطهم بحلقي . وش اقول للوالدة لو درت يمكن يرتفع ضغطها , وتصير عندي مشكلتين.
احسن شيء اسكت . وادبر حيلة منا ولامنا .دخل علي الغرفة وهو مضطرب , ويبدو عليه الارتباك
علي : يمه , انا شوف انس كبرتي الموضوع , ورفعتي صوتس على ابوي عشان كذا ,, عطاس طررر
وتقاطعه امه
اقول اطلع برا غرفتي , انقلع . لوكان فيك خير كان دافعت عن امك , رح لبوك ينفعك , انت ناسي ان ابوك ياخذ مصروف البيت مني
وفي هذه اللحظة يدخل ابوعلي ويقترب من ام علي ..
يتبع غدا ,,,,

لا لا ياابوعلي .. تكفى الا المشاكل الاسرية والطلاق تراها دمار للبيت .
أنشاءالله في ( ج 8 ) يهدء أبوعلي ويتنازل عن كلامه ويسامح أم علي .
لكن لاتكتب القصة الا وانت متقهوي .

يا ساتر الدعوى طراقات

و الله من جد صاير مسلسل بأسلوب تقفيل القصة في اللحظة الحرجة.

كني أتفرج على مسلسل "لوست" و إلا "24".

عبدالله بن علي