انقل لك رد بعض الاخوة من منتدى اخر .......اتمنى الله ييسر امورك


ــــــــــــــــــــ
ناوي السوكبا
من خلال خبرتي المرورية

فاذا لا قدر الله أصاب شخص حادث لا يتنازل عن الشخص الثاني لين ما يستلم دراهمه

أو يجي أحد يكفله موظف ارامكو أو موظف حكومي

غير ذلك الفلوس تطير والمماطلة تستمر
ــــــــــــــــــــــــ
سعيد العيسى
خذ صورة تقرير الحادث
ودخلها على مدير المرور في منطقتك
اذا ما رد خلال اسبوع
صورة من التقرير مع معروض لـ أمارة المنطقة التابع لها
وفي نفس الوقت عندك محمد بن نايف يستقبل المواطنين سلام.. سلام
ادخل عليه بمعروض مختصر
والله ييسر امورك

جزاكم الله خير..والله اني بضيقة الله اعلم فيها لا وراي ولا قدامي
والطرف الثاني ماعنده تامين لكن المرور قال انت تامين شامل يعوضك وانا مدري وش السالفة قليل خبرة بهالامور..وانا اللي قاهرني الطرف الثاني يماني يعني لو طلع برا الديرة ماعاد اني شايف فلوسي وهي والله دين ولا اقدر اسددها
وبعدين الشركة حدتني ادفع النسبة اللي علية لاني رحت لجدة يومين بخلص اوراقي وارجع والشركة عيت تستلم السيارة الا لما ادفع فلوسهم الله لايسامحهم
يعني لو انتم مكاني وش بتسون
والصحف ارسلت لسبق ولعاجل ولا عندك احد شكلها حتى هي يبيلها واسطة..واليوم ارسلت لصحيفة طيبة الالكترونية عساهم يعطوني وجه

الله يعوضك خير مالها الا الله ثم صاحب السمو الملكي الامير نايف بن عبدالعزيز او ابنة محمد او صاحب السمو الملكي الامير خالد الفيصل ترى ابوابهم مفتوحه واي واحد منهم راح يرد لك حقك بإذن الله

يا اخوان انتبهوا من الفزعات وانت معك تأمين وانا مدري ايش تحملها

شف وانا اخوك الحين انت اللي انقلبت السالفه عليك واكلتها

مفترض من البدايه قول للمرور اذا الخطأ علي اكتبه وحقه يوصله
اذا على الطرف الثاني اكتبه عشان اضمن حقي وبس

معليش يمكن الوقت ماهو مناسب على اللوم بس اعانك الله وانا اخوك ولعله درس لنا جميعاً كفانا الله واياك الحوادث وشرها

السلام عليكم
اولآ اقول لك سلامات، وبعد، كل الحلول المقدمه من الاخوان جميله وممتازه وتوصل لنتائج باذن الله. ولكن هناك حل آخر (أو أخير) اذا لم تنفع الحلول السابقه، شوف لك مكتب محامات معروف بالنزاهه وعدم الطمع واستأجره بشرط ان يحصّل اتعابه من المدعى عليهم. وبعدها اتفرج كيف الجميع بيتجاوبون

أخوي بعد قلبي أكلمك من خبره لأني صارت معي مثل هالحاله مرتين :


أولاً : الحمد لله إنك سالم من الإصابات .

ثانياً : صارت معي مره ( أزفت ) من حالتك ولكن لو الله ثم ابن عمي في المرور كان ماأخذت حقي , اللي صادمني هو الغلطان ( أنت معي ) المهم إن المرور طلع الرجال بدون كفيل بسبب أقاربه اللي في المرور (البلد ماشيه بالواسطات حبيبي ما معك لا تتعب نفسك) .
وقامت الدنيا ولا جلست في المرور لأنهم عرفوا أن ابن عمي وجود في هذا المبنى وبعدين ضابط شعبة الحوادث لما عرف عن ابن عمي قال هذا الرجل يبي يفضحنا اللي هو أنا,حتى أحد الموظفين يقولي إن الضابط جمع أقارب الرجال وقالهم ليش تطلعون الرجال بدون كفاله ومرمطهم مرمطه هاهاهاه .

ثالثاً : لا تشتكي لأحد الشكوى لغير الله مذله .

رابعاً : مكتب تأجير سيارات أخذ مني فلوس(800ريال) مع إن الطرف الثاني والطرف الثالث هم الغلطانين كنت أنا بينهم عند الاشاره واحد أمامي (تاكسي)والثاني (دينا) خلفي قلت للمكتب وش دخلني أدفع 800 قال السياره جلست أسبوع في الورشه وقلتلهم أنا ماني غلطان قالوا أنت المستأجر , ولعلمك السياره جديده وعليها تأمين شامل حتى على الركاب والحمد لله أهين فلوسي ولا أهين نفسي , والله ينتقم منهم ( أحذرك من مكاتب الـتـأجـيـر لا تتعامل معهم أبد لو تمشي على رجليك لمدة سنه وتستعمل تاكسي يوديك ويجيبك اسمع نصيحت مجرب ..


خامساً : لاتتعب نفسك بالمرور ولا الوكاله ما دام عندك راتب الحمد لله , أنت تردد على هالوظيفه ( ودورلكمعقب ممتاز يعرف هالأمور واشرح له الموضوع واتفق معه على فلوس تعقيبه أولاً وضروري لا تطيح في مشكله ثانيه واكتب له توكيل محدد من كتابة العدل , ثم ابن عمك اللي في المرورلازم تتابع معه وتسأله عن الأشياء اللي ماتعرفها ولا تقدم على شيء وأنت ما تعرف فيه (وممكن محامي بعد ينفعك) .

سادساً :لاتضيق صدرك بعد قلبي خلك أبرد من البارد هذه دنيا وكلنا راح نموت , تغضب لحقك ولا ما تغضب اللي مكتوب لك يبي يصير .


سابعاً : خبرني وش يصير معك وأنا أخوك .


ثامناً :فيه قصه حصلت معي في أحد دول الاتحاد السوفيتي المنحل لكن طويله وما لك بالطويله وهي جريمة سطوا , والفلوس عادي عندي وسخ دنيا , لكن اللي قاهرني أن الجنات مسلمين ,,,واسلاماه,, أين المسلمين الحقيقيين,,, بس هذا اللي قاهرني .

ثامناً : أبشرك اتصل علي محامي السفارة السعودية هناك وبشرني بعد مضي( سنتين)

تاسعاً : (شفت محامي السفاره وش سوى) ما قلت لك شف لك معقب ولا محامي ممتاز وثقه يضبط لك وضعك .

والحمدلله رب العالمين

مشكورين ماقصرتم..يااخوان انا بالمدينة ابغى جهة اروحلها تاخذ حقي او ارسلهم وانا بالبيت..انا من امس ادور سيارة اجار مالقيت عشان كنت ناوي اروح اليوم ديوان المظالم..انا اللي قاهرني هاليماني باخذ حقي منه غصب هو اللي جاني ماجيتة..وفية حاجتين بفهمها:التامين الشامل يغطيني صادم او مصدوم(يعني هو اللي كان مفروض يدفع نسبة الطرف الثاني للشركة)والا اش معنى شامل....تاميني ملاذ
الثانية هل ديوان المظالم بيفيدني والا بس مرمطة عالفاضي..يعني راح يعمم عالرجال بجميع انحا المملكة..تحملوني بس الله يكفيكم شر هالدنيا تحس انك وحيد وانت عندك اهل ومعارف بس لانك بسيط لاوراك ولا قدامك لافلوس ولامنصب ..محد يعطيك وجه

أخي الحبيب .. الحمد لله على سلامتك

هل السيارة ايجار أو ايجار بالتمليك ؟
هل عندك صورة العقد ؟
اذا لم يكن لديك صورة اطلبها فمن حقك ذلك ودائما العقد له رقم و تاريخ ويكون مكتوب في التصريح المعطى لك لقيادة السيارة؟
هل وقعت أي ورقة ربما فيها تنازل عن الخصم ؟
اذا انك وقعت على الورقة ... عوضك على الله ...

اذا لم توقع تنازل فيمكنك مطالبة المرور الذي اطلق الخصم بدون كفيل برفع برقية الى سمو النائب الثاني وزير الداخلية ويجب انيكون لديك مستندات مثل صورة العقد و صورة من تقرير الحادث

حاول ان تقوم بذلك من مدينتك لكي لا تتعب بالسفر رايح جاي و اذكر في برقيتك انك غير قادر على مصاريف السفر لمتابعة قضيتك..


واخيرا وازن بين خسارتك لوقتك و مالك في متابعة قضيتك و المبلغ المطلوب وبالتوفيق .

الحمدلله على سلامتك

الله يعينك وياخذ بحقك

انا لي 7 شهور اثنين صدموا سيارة العائلة وكان مافيها الا السواق طالع يجيب الأهل وقاطعين الإشارة وبحالة غير طبيعية (سكرانين), حالة السيارة (تشليح) قيمها شيخ المعرض بـ 35 و 50 الف على الخصم وعجزت ابيع السيارة لأنه ماجابت الا 20 للأسف (ناقص 15 الف من تقييم شيخ المعارض) لأن شيخ المعارض حط قيمة عالية على السيارة حتى يخفف من المبلغ على الخصم! وش اللي صار لهم توقفوا يوم وكفلهم عسكري وطلعوا من ساعتها ولا أخذت حقي الى ساعتك ولا ادري متى آخذه و خصمي للأسف طالع ولا يحضر للمحكمة واللي يغبن مهوب معترف انه هو اللي يسوق !! حالتي معهم من جد حاله, وشلون سكارى وقاطعين اشارة و صادمين السيارة صدمة اعدمت السيارة ولا لها الا تشليح ونومت السواق 3 اسابيع بالمستشفى والحمدلله انه سالم الآن والحمدلله عيالي ماهم معه وطالعين كانهم ما عملوا شي؟.

نظام عجيب غريب والله العظيم هذا اللي حاصل معي! المشكلة ليش يطلع من التوقيف وعليه حق خاص والمصيبه انه هو واللي معه بحالة غير طبيعية وكل واحد يتهم الثاني انه اللي يسوق وبها الحركة طالت السالفة مرور حولوها الاماره حولتها الامارة لهيئة التحقيق حولوها للمحكمة وامس استدعوه المحكمة الجزئية ولا حضر, طبعا هذا كلام الشيخ لاني غير مطلوب للمتابعه او الحضور! طيب يا ابن الحلال وش الحل يقول طلبناهم بعد شهر! وانتظر.

اقدر اتصرف من نفسي و اكلم المعارف والزملاء واتلهم تل بالمباحث لكن ابي اشوف وش نهايتها مع هالبشرية وكيف يطلعون وهم بهالحالة و وش يبي يكون الحكم عليهم؟ والمشكلة اني ما نيب عجل على سجنهم لانهم ماهم دافعين وقالوها بالفم المليان يعني يعرفون شيء ما نعرفه! وهذا اللي يخلين انتظر وش النهاية لاني ابرفعها لأكبر جهة اذا كان الحكم سواليف و واسطة.

هذي قصتي باختصار عزيزي KING2011 والمشكلة شيخ المعارض قصته قصه بعد لكن ما ابي ادوشك فيها , والله يخلف علينا جميع , الحمدلله ان الأنفس سالمه والا الفلوس تروح وتجي والحق عند الله ما يضيع والعوض من الواحد الأحد عاجلا ام آجلا.

تعالو اضحكوا وابكوا على حالي
اولا اللي يسال,,انا سيارتي تاجير منتهي بالتمليك
ولا وقعت تنازل ولا شي العسكري من راسة طلعة مسوي فاهم وهو من جنبها
اما الشي اللي صارلي اليوم وعرفت اننا دجة بدجة
رحت لديوان المظالم وقالي روح اشتك بجدة مقدر افيدك (كان جدة دولو وحنا دولة ثانية)حاولت فية قال ابدا مقدر اقبل شكوتك
بعدين رحت لوزارة التجارة قال حنا بس نحاسب الغش قلتلة وهذا مو غش قال مانقبل شكوتك
بعدين رحت لمؤسسة النقد قالو مانقبل الشكوى لاننا ماندري التامين رد على الشركة والا لا(طيب اسال التامين وشوف)
حسبنا الله ونعم الوكيل فيهم كلهم الله حسيبهم والله لايسامحهم
بقى عندي اخر حل لكن اليوم تعبت من الفرفرة بشوف يوم ثاني
الحل هو اني برسل خطاب لامير المدينة لان هو مخصص رقم للمواطنين
واذا رزقني الله سيارة مستقبلا رحت لجدة
وهذ اللي عندي عطوني ماعندكم
وشكرا لكل واحد رد علي وكل واحد حس بمعاناتي