مقالات .. سندوتـش مـن غـيـر قـوطـة >> فتحي حلواني

abuhisham · 03-12-2013, 10:06 AM

سندوتـش مـن غـيـر قـوطـة

فتحي حلواني

دخلت البيت وفي يدي شويـة سندوتشات عشان أفطر أنا والحرمة، المهـم جلسنا على السفرة وجبنا بـراد الشاهي المنعنش وجلست الحرمة تفتش في السندوتشات عشان تاخد النوع اللي تحبه، وفجأة بقت في وجهي ليش ما حطيت قوطة في السندوتش؟
بسم الله الرحمن الرحيم، يا بنت الحلال صلي على النبي واستهدي بالله ربشتيني وشعترتيني، وبعدين الراجل ما حط قوطة في السندوتش لأنه القوطة هادي الأيام سعرها غالي زي كل سنة لما يجي موسم الحج تلاقي تجار القوطة يستغلوا الموسم ويحتكروها ويبيعوها بالسعر اللي يعجبهم!؟
لأنه يا ستي وزارة التجارة تطالب بحماية المستهلك، وبالبلدي كده (ما عندك أحد) ونحنا تعبنا ونحنا نتكلم، صوتـنا انشقـر ونحنا بنهـرج ونقول يا هووه ياناس شوفوا حل لغلاء الأسعار اللي بتهـل علينا كل يوم لكن ما في فايدة مغني جنب أصنج، الأسعار مختلفة ما بين كل سوبر ماركت والتاني وحلقـة الخضار فوضى في فوضى وكلوو من تحت راس المحرجين وأصحاب البرادات. هدا غير العمالة الوافدة اللي جالسين يلعبوا في حلقة الخضار بكيـفـهـم كل واحد منهـم محتكر السوق في الخضار وفي الفواكه لأنه ما في رقابة عليهـم، وكلهـم شغالين سلخ في عباد الله ما عندهم رحمة ولا شفقه في عباد اللـه، والمصيبة مو هنا المصيبة انه القوطة متوفرة في حلقة الخضار..

طيب يا سيدي طالما القوطة متوفرة بالشكل ده في حلقة الخضار ليه كده سعرها غالي؟،
لأنه يا ستي ما في رقابة مشددة على دول التجار اللي جالسين يلعبوا في السوق على هواهم، لكن لو في رقابة وغرامات وتشهـير لهـم بالاسم والصورة أتحدى أي واحد فيهـم انه يرفـع في سعـر العازة اللي يحتاجها المستهلك ريال واحد، لكن ما في لا رقابة ولا نظام ولا قانون يحمي هدا المستهلك ، كلوو فوضى في فوضى ونحنا الغلابى نروح في خرخر..

بس اللي يرفـع الضغط ويجيب السكر ويوجـع المصاريـن انك ما تعرف ليش تكون أسعار القوطة غالية كده؟، رغـم انه القوطة متوفرة في حلقة الخضار عمرها ما صارت انه يوصل سعر كيلو القوطة 18 ريال، وبعدين يا ريـتها جات على القوطة..
كل الخضروات في محلات بيـع الخضار ارتفع سعرها فوق ما تـتخيلوا ولا رقابة ولا يحزنون، واللـه مصيبة كبيرة ده اللي جالس بيصير في سوق الخضار، ولمن تجي تسأل أصحاب الخضار ليه كده أسعاركم غالية يجيك الرد انه في حركة تصديـر لأوروبا، والا يجي يقول لك انه القوطة خربت من كتر قوة حرارة الشمس..
شوف البكاشين برادات يا كبرها مكيفة آخر تكييف ويجي يقول لك حرارة الشمس هيه السبب عشان كده ارتفع سعر كيلو القوطة...
آآآآآآه منكم يا تجار ما يقدر عليكم إلا القوي جل جلاله، عشان كده بقول يا تجار الخضار، يا تجار المواد الغذائية، يا تجار الدواء، يا تجار مواد البناء، يا تجار الحديد، يا تجار الاسمنت، يا تجار الأواني المنزلية، يا تجار الشعـير، يا تجار قطـع الغيار، يا تجار الأراضي، يا تجار شقـق التمليك، يا تجار الكفـرات، يا تجار زيوت السيارات، يا تجار الأدوات المكتبـية، يا تجار السيارات، خافوا اللـه في عباد اللـه ترى نهايتها مـتر قماش وحفرة وقطنة وكل واحد وعمله... وعيشوا كتيييير تشوفوا كتيييير.

http://www.okaz.com.sa/new/Issues/20...1101651111.htm

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحث المتقدم
انواع عرض الموضوع
العرض العادي الانتقال إلى العرض المتطور الانتقال إلى العرض الشجري