قال ايش؟؟ قال حماية مستهلك!!

**دانه** · 24-08-2007, 12:35 PM

السلام عليكم ورحمة الله وبركاته

ماأبي اطول عليكم بقولة انا عضوة جديدة ورحبوا فيني بدخل بالسالفة على طول.

بس قبل لاأبدأ حبيت اشكر كل من فكر وخطط وساهم في انشاء هذا المنتدى الف شكر لكم

أعضاء المنتدى الأعزاء:
اكيد لاحظتوا الارتفاع الغير طبيعي بالأسعار واللي وصل الى100% حسب الاحصائيات المذكورة بالجرائد ومواقع الانترنت. والارتفاع هذا ماكان لسلعة معينة بل كان في أغلب السلع اذا ماكانت كلها وبصراحة الواحد تنسد نفسه اذا راح للأسواق علشان يشتري مقاضي للبيت.

انا عايشه مع عائلة استهلاكية درجة اولى يعني مافي اي شي بالبيت ممكن يقعد شهر على الأقل. 10 أشخاص بالبيت ومن كل الفئات العمرية اكيد يحتاجون اكل وشرب وملبس وغيره من( متطلبات الحياة المعيشية).

شي بسيط, الحليب البودرة(النيدو) مطلوب في بيتنا وبالذات في الصباح كبداية لليوم ومايكمل عندنا اكثر من 3أسابيع بالكثير قبل كم شهر كان الكرتون ب150 ريال وبعد هالكم شهر صار ب230ريال وبعدها بأسبوعين بس صار ب260ريال هذا حكي؟؟ معقولة؟؟ اضطرينا نستغني عن النيدو ومشينا على الحليب السائل (صافيو) واللي ب260 ريال اللي هي سعر (النيدو) نقدر نشتري 5كراتين حليب سائل.

كل يوم نقرأ بالجريدة عن ارتفاع اسعار الخضار وارتفاع اسعار الفواكه والألبان والأجبان والحليب والأرز.......وغيره وغيره على كذا بنعيش في( مجاعة) واعذروني على هالكلمة.

مسئول في وزارة التجارة ومن دون ذكر أسماء لما سألوه في برنامج مباشر عن الارتفاع رد وبكل برود وقال بما معنى كلامه:"أصلا الزيادة كانت 3أو 4ريال لاأكثر" ياسلام؟؟!! يعني ال4ريال هاذي ماتأثر على الشعب؟؟وش هالاستهتار؟؟ اذا كانت الزيادة على هاذي السلعه ب4ريال وهاذي ب4ريال وهاذيك ب3ريال اسمحوا لي يعني وش بيبقى للمواطن من الراتب؟؟ وللعلم معظم المواطنين السعوديين من ذوي الدخل المحدود.!!

مسئول آخر سألوه عن ارتفاع أسعار الأرز قال:"مو لازم تاكلون رز استبدلوه بجريش او قرصان"هذا أسلوب مسئول كبير في الرد على استفسار مثل هذا؟؟

أتمنى من المسئولين انهم يأخذون الوضع بكل جدية ويعيشون بهالدنيا ويشوفون وش اللي صاير ويعرفون انهم بيتحاسبون عن هالشئ أمام الله سبحانه.

وخلوا المسئولين على جنب شوي وخلنا نشوف حماية المستهلك يمكن أغلبكم شاف برنامج "عطفا على السؤال" حلقة يوم الثلاثاء اللي كانت عن ارتفاع اسعار الأرز انا اللي أبغى اركز عليه في نهاية الحلقة تقريبا لما المذيع اتصل ومن جواله الخاص على الرقم المجاني لحماية المستهلك 1616 124 800 وشلون كان رد الموظف؟؟ على عيني وعلى راسي؟؟ او ابشر؟؟ لأ رد بخوف وقال:انا موظف على باب الله وطااااااااخ بالسماعة مافيه أي أسلوب للاعتذار أبدا.

أنا اتصلت على حماية المستهلك رد علي موظف ماعنده اي فكرة عن شي اسمه أسلوب ولما طلبت منه انه يسجل شكوى طلب مني تسمية مكان واحد فقط وسلعة واحدة فقط لاغير؟؟ ماأدري وين عايش يمكن ماسمع ان السوق كله مرتفع والسلع كلها مرتفعة."الى الله المشتكى"

العذر والسموحة طولت عليكم أتمنى اني اكون وصلت رايي والله يفرج هالكربة.

والسلام عليكم ورحمة الله

دانه