السلام عليكم
والله الوضع من سيئ لاسوء للاسف بس لازم نحمد ونشكر الله على كل شي
اول شي انا وضعي المادي مستور والحمدلله ودخلنا حدود العشره الاف شهريا ومع كذا ماعندنا بيت ملك
نبغا نوفر نشتري ارض ونبني فوقها بيت يحمينا من غدر الزمن بس اتوقع مستحيل في ظل هذا الغلاء الفاحش في كل شي
تروح اي مكان اي مكان حتى لو بس اتمشيت بالسياره في الشارع لازم تصرف مبلغ وقدره
ترجع البيت وتحسبها تلاقي انك صرفت فوق المية ريال في ساعة زمان
والله فلوس كثيره بتطير مننا من غير مانحس
مو معقوله الوضع الي احنا فيه
ليش؟؟؟
لاننا نعتبر من الدول الغنيه في العالم
احنا اصحاب البترول وحالنا كذا
والكل يستغلنا ويطمع فينا ويفتكرونا قاعدين على تل فلوس
لما تجي تسافر لدولة عربيه قريبه تستغرب من طريقة تعامل الناس هناك
الكل يطلب فلوس منك واذا مااعطيتو يقلك انت سعودي انت عندك بئر بترول
والله صرنا نكره نسافر برا
وطبعا حدث ولا حرج اذا جيت تفكر بمصايفنا الجميله والاستغلال الي حاصل فيها
تنزل السوق تتفاجئ باسعار زي النار وياريت يكتفو الا بالعكس اسعارهم في زياده على طول
الى متى؟؟
الى متى يستحمرونا ويستغلونا ؟؟
الى متى؟؟
صار السعودي اكبر همو بس قطعة ارض يبني عليها بيت صغير يلمه هو واهله!! بس مو لاقي
ما كنا كذا والله!!
وماننسى كمان المستشفيات واسعار الادويه
يعني الي مريض بالسكر عفانا الله ولا عندو احد في العيله مريض بهذا المرض الي ثلث سكان الممكله يعانو منه وطبعا اكيد كلنا عارفين قديش بتكلف ادوية علاج السكر ومتابعة هذا المرض في المستشفيات .....او مرضى الفشل الكلوي عفاهم الله والي عندهم غسيل كلوي كل اسبوع..... او الي عندو طفل مريض بامراض ميؤؤس منها عافانا الله واياكم وابعد عنا كل الشر والمكروه
هذولا ايش يسووا مساكيين
ياربي والله قلبي يتقطع واحس بمدى النعمه الي انا عايشه فيها لما اشوف صفحة عكاظ الانسانيه والي فيها من بلاوي ومصايب
وطبعا انت بتستغرب لما تجي تقارن بين السعودي وبين الاجنبي
والله اني استغرب من الاجانب الي هنا عايشين في عز ويمتلكو سيارات فارهه وفلل فخمه
وبعض السعوديين المساكيين الي يدوروا بس قوت يومهم
شي عجيب غريب لما تشوف وحده من دوله عربيه تمتلك 3 صوالين تجميل في المنطقه الغربيه
وبنات البلد قاعدين يندبوا حظهم ولما تجي الوحده تفكرلها في مشروع لازم يكون عندها راس مال جدا عالي عشان تبدأ فيه ...
وحتى المعاهد العلميه الاهليه حسبي الله عليهم
الي ماقدرو يسجلو في الجامعه بيلجأوا لهذي المعاهد على امل يدرسوا ويحصلوا وظيفه يعيشوا منها
تلاقي الواحد يسجل في هذا المعهد ويدفع دم قلبو وبعض الاهالي تحط الي وراها والي قدامها بس عشان ولدها ولا بنتها يتسجلوا في المعهد الفلاني
وطبعا بعد التخرج والتعب وسهر الليالي
يقدموا على وظيفه ....يجيهم الرد انو المعهد الي دارس فيه غير معترف به من وزارة الخدمه المدنيه
بالرغم انو المعهد يوريك شهادة انو معترف فيه من وزارة الخدمه المدنيه
وقبل ماانسى بقلكم على شي هههه يضحك
اخويا قبل فتره اتعرف على واحد سوري عن طريق النت
وهذا السوري يبغا يجي يشتغل هنا في السعوديه وطالب فيزا
المهم السوري قال لاخويا حكيني عن الوضع عندكم كيف
وطبعا اخويا صار يحكيه عن الوضع المأساوي هنا
فقالو عن موقف صار لاخويا
قلو مره كنت واقف عند اشاره وكنت مشتري اكل من المطعم وحاطه على المقعده الي جنبي
المهم يقول جاني ولد عمره 10 سنوات تقريبا يطلب من هذا الاكل ويقولو الله يخليك اكلني الله يخليك اعطيني اكل
قام السوري اتفاجئ وقال معقوووووله يكون عندكم ناس يشحتو اكل؟؟؟
ماصدق السوري الي سمعه من اخويا
والله اني سمعت من ناس ثقه انو فيه وحده تدور على اكل لاولادها من قمايم الناس
كل يوم تنزل الشارع اخر الليل طبعا تدور في القمامه على اكل صالح للاستخدام الادمي
على سيرة القمامه يقولو لو تبغى تعرف مستوى الناس الي عايشه في حي معين من الاحياء شوف بسسهم الي في الشارع اذا كانت من النوع السمين معناته اصحاب هذا الحي من الناس المبسوطين
واذا كانت من النوع الهزيل معناته العكس
طبعا هذا الكلام موجه للناس الي بتسرف من غير حساب او خوف من الله وناسيه انو فيه ناس مو لاقيه لقمه
وطبعا انا ماراح اتكلم عن الوظائف وندرتها لانكم عارفين وضعها مزبوط
وعلى فكره الكلام الي قلته كله من اوله لاخره مايشمل كل السعوديين
فيه كثير سعوديين عايشين في نعيم وعز والله يزيدهم ويعطينا يارب
واسفه ع الاطاله بس حبيت اتكلم واطلع الي في قلبي من الي شفته وعايشته من بعض الناس الي على قد حالهم
واخيرا انا كتبت هذا الكلام كله عشان سؤال جدا وجيه
ياترى من المسؤؤل عن كل هذا؟؟؟
تتوقعوا مين المــــــــســـــــــؤؤل؟؟؟
:co nfused:
10-11-2007, 11:59 AM
سعودي ولكن !!
العرض الشجري