هذا ماحصل لي في أسواق العثيم بالرس

**قطمة رز** · 09-09-2007, 01:12 PM

بسم الله الرحمن الرحيم
هذه القصة حدثت اليوم صباحا لفرع العثيم بمحافظتنا الجميلة
ذهبت أولا إلى السوق التجاري من أجل أن أشتري بعض الأغراض الرمضانية واضعا أمام بؤبؤ عيني أن أكون الزوج المطيع الذي " يجيب " كل ما تطلبه حرمه المصون ..ورغبة في إستمرار الحياة الأسرية مستقرة << لايكثر بس وش عندك
اقول لكم ... اليوم رحت للسوق أشتري بعض الأغراض ...قهوة ... ملح ... سكر ...
أخذت القهوة والملح من أشهر محلات الرس لبيع القهوة ...قلت له والسكر بكم .. قال بـ 20 ريال
قلت في بالي "" لا .. السكر بالعثيم طايح أكثر "" وأنا اللي أشغل الموتر متجها من عند البخاري اللي بجانب الشرطة ومرورا بكنافة زمان مدري بلادي مارا بجانب مبنى الأمارة وعلى يساري محل أبو راكان .. توقفت عند الإشارة كأي مواطن صالح ... فتحت الإشارة ...وفتحت الأخرى... انعطفت يمينا ملبقا بموقاف العثيم بطريقة سلسة حضارية ..افتح الباب بكل تفاؤل بحياة أرخص وأقل تكلفة .. أدخل العثيم ...آخذ معي عربية ...أتجه إلى ركن السكر ..لقيت السكر ملبد فوق بعض وبعضه متنثر بالأرض .. آه.. هذا هو سكر الأسرة وهو المطلب .. يوجد منه خشن وناعم .. مطبلنا من النوع الناعم وسعر كلا منهما 17.95 ريال
أخذته وإتجهت بسرعة وبوسط الزحمة رغم إن الزبائن شويين بس فرع صغير وسئ وكل واحد معه عربية
وقفت عند المحاسب وبكل ثقة وأنفة .. جيت أبطلع البوك .. قال لا ياخوي اشتر شي ثاني معه ... وظهر فوق رأسي ثلاث وثلاين علامة تعجب وإستفهامين ونقطة آخر السطر لقيتها في مخباتي
قلت له وش لون يعني مافهمت كلامك
قال ياخوي السكر ماتشتريه لحاله ..لازم تشتري معه شي ثاني .. هذي تعليمات الإدارة
قلت له وش هالهرج ..؟؟؟؟؟؟؟؟
يعني أشتري قارورة ماء بريال ؟
قال لا تشتري مثلا أي شي ثاني بعشرة ريال
قال هذي تعليمات الإدارة ...
دفيت العربية لحد ماصار لي متسع أني أمر ولبقته على جنب هي والسكر وقلت له تعليمات قلة حيا وطلعت من عندهم من دون ما أشتري السكر ... الصراحة قلة حيا فعلا وإستغلال قبيح من العثيم ..وش اللي ما تشتري الصنف لحاله ولازم تشتري معه ثاني ؟؟
طلعت من عندهم للمحل اللي اشتريت منه القهوة واخذت السكر ب 20 ريال بعد أن شرحت له ما حصل لي بالعثيم .. .. وقال لي الرجل في المحل وهو ممن تبدو عليه علامات التدين والعلم ..لايجوز أن تربط سلعة بأخرى ...حرام شرعا
بالله وش رايكم مهوب شي يقهر فعلا ؟