السلام عليكم ورحمة الله

حابه اشرح لك حالة بنتي عشان توجهني للبدايه من وين تكون وبأي طبيب ومستشفى

بنتي الصغيره لينا عمرها سنتين
ترتيبها الخامسه بين اخوانها واخواتها

تقول ماما بابا بيبي " حبيبي" فقط
طبعا ماما وبابا بأي وقت مو بقصد لنا
كانت ماتلتفت نهائي اذا احد ناداها الان مره تلتفت وعشرين لا
ماتنادي اي احد من اخوانها
تردد الاناشيد وتحفظها بشكل متقن لكن بدون اي كلمات مفهومه نعرف الانشوده من اللحن وممكن احنا نختار اي بيت من الانشوده وننشدها وهيه تكمل البيت الثاني صحيح

تردد احيانا زي من واحد لثلاثه ومن ون لفور وكمان مو ممكن احد يفهمها غيرنا

تضحك احيانا لحالها بشكل هستيري وبدون سبب وتطالع لجهه محدده كأنها تشوف شي
اذا زعلت او عصبت تشد نفسها وتحرك يدينها بزي الرجفه "اختياريه الحركه مو لاارادي"
وساعات تعض اصابيعها ومن كم يوم تخبط راسها بالجدار

تحب انا نشيلها ونضمها
اذا رحنا مكان عام لازم نشيلها او نمسكها لانها ممكن تنطلق ولاتلتفت لنا

تعاني من اسهال وامساك "الله يكرمك" بشكل متناوب وبدون اي اسباب مرضيه او غذائيه

ماتفهم اي امر مهما كان بسيط تعالي روحي هاتي خذي

انا من جده وابغى ابدأ علاجها
اذا ممكن تشخص لي حالتها ومن وين ابدأ جزاك الله خير