السلام عليكم .. صبحكم الله بالخير

في ظل غياب الرقابة الصارمة عن المحلات لدينا .. والدور المخجل للبلديات ومراقبي الأسعار في السيطرة على الأسعار ومراقبتها

أصبحت الأسعار كما نشاهد تتفاوت من محل لآخر .. ومن بائع لآخر .. وأصبح السعر خاضعا لمزاجية صاحب السلعة أو الخدمة .. وكلنا قد لاحظ اختلاف سعر خدمة أو سلعة معينة بين عشية وضحاها بدون مبررات .. وقد تكون تلك السلعة من نفس المحل ونفس البائع فيقدمها لك اليوم بسعر وغدا بسعر أعلى

جشع التاجر وبعض أصحاب المحلات لا نختلف عليه فقد استغلوا أزمة الغلاء وركبوا موجة رفع الأسعار لزيادة مكاسبهم بأي شكل .. لكن الذي يثير دهشتي هو صمت غالبيتنا وسلبيتهم أمام المتلاعبين والمغالين .. فتجد الواحد منا يرى التلاعب في السعر واضحا أمام عينية .. ويعلم يقينا بأن البائع محتال .. فلا يكون منه إلا أحد أمرين :

1- الاستسلام والشراء بدافع التكاسل عن البحث عن السعر الأفضل .. والاستهانة بالفرق البسيط الذي قد يكون بضعة ريالات
2- ترك السلعة والخروج بصمت من المحل دون إنكار التلاعب وتحذير البائع من الكذب والتلويح له برفع أمره للجهات المسؤولة عن ذلك .


تلك هي ردود أفعال 90% من المواطنين بصراحة .. وهذا مايشجع البائع والتاجر على التمادي في رفع الأسعار بالتدريج .. فلا عقاب سيطاله .. والشعب اتكالي إذا ماعجبه السعر فأقصى مالديه السكوت أو الاتكالية بأن يقوم مواطن آخر بالتبليغ عنه .


مادعاني لكتابة الموضوع هو مالاحظته على أحد محلات الحلاقة .. رحت له مرة وطلبت منه حلاقة دقن مع العلم بأنه صالون عادي وليس vip والعمالة هندية .. وبعد الحلاقة مديت له (خمسة ريال) فقال لي : حساب عشرة ريال !!!!

ليش يامحمد عشرة هذا دقن بس ؟؟!!
قال لي : أنا زبط سكسوكة كويس !!!!!!
قلت له : كل الحلاقين لازم يزبطون شغلهم .. يعني اللي يحلقون بخمسة ريال يزبطون نص الدقن كويس والنص الثاني أي كلام !!!

المهم قام يختلق المبررات ولاحظت عليه الارتباك ومايبغى الزباين يسمعون الجدال بيننا عشان مايسوون نفس موقفي ويرفضون الزيادة ... بالنهاية قلت له مالك إلا الخمسة ريال مثلك مثل أي حلاق ثاني ومشيت .

جلست عنه شهر ونسا شكلي .. وجيت مرة ثانية وكان قدامي اثنين يحلقون دقن .. انتهى واحد منهم وسأل عن الحساب وقالوا له ( عشرة ) !!! فاستغرب الرجال لكن أبو هنود جلس يقنعه بأن تعب في الزلوف وتضبيط العوارض .. فدفع صاحبنا العشرة !!


الزبون اللي بعده ايضا دفع عشرة بعد أخذ وعطى .. والمصيبة بأن تسعيرة البلدية معلقة ومبروزة بالمحل !!!! كل واحد مايبي يدخل بجدال أو حتى يكلف نفسه عن سبب الزيادة


أنا انتهيت ورفضت أدفع العشرة ريال .. معصي .. وعطيته خمسة أخذها وهو زعلان .. وبعدها بأسبوع جيت ولقيته يمارس نفس الدور على الزبائن .. الزبون الطيب يقتنع ويدفع .. واللي يرفض ياخذ منه الهندي التسعيرة الرسمية وهو زعلان .. يعني ( إن لقحت ولا ماظرها فحل )



المرة الأخيرة عرفني الرجال .. وقبل لا يبدأ قال لي عشرة .. أو مافيه حلاقة !!!
قلت له هل فيه تسعيرة جديدة من البلدية ؟؟ قال لي لا .. بس هذا سعرنا
فقلت له تسعر على كيفك أنت؟ شوف لوحة التسعيرة على الجدار ؟ هذي مخالفة وترى باعلم البلدية
قال لي رووووووح جيب بلدية .. إيش سوي بلدية أنا مافي خوف !!!!


ساعتها قفلت أخلاقي .. وأنا أطلع الجوال وأتوجه للرخصة تبع المحل معلقة بالجدار .. وأصورها بالكاميرا .. ثم أصور لوحة تسعيرة البلدية أيضا اللي بالمحل

ثم أوجه الكاميرا على الهندي وأبدأ أصورة فيديو وأقول له كم السعر دقن ؟؟
الهندي يوم شاف الشغلة توثيق .. وأن فيه من بيحاسبه ويوقفه عند حده قام يخمبق قدام التسجيل .. وماقدر يقول السعر المخالف لأنها بتثبت عليه .. خاصة بأني مهددة بأني سأوصل التصوير للبلدية

في النهاية يوم شافوا الهنود السالفة جد .. قاموا يعتذرون ويسحبون بيدي عشان يجلسوني على كرسي الحلاقة وهم يقولون خلاص تعال حلق بالسعر اللي تبي ورفضت مرررة .. إلا أستقعد لهم وأخليهم يتوبون عن الضحك على الناس

سويت لهم سالفة وفضحت أمرهم قدام الزباين الموجودين .. لكن تدرون وش اللي ضيق خاطري ؟؟؟ الزباين السعوديين كان موقفهم مررررة مرررررة سلبي ويحطم الواحد .. يعني اللي قدروا عليه بعد السالفة هذي هو إنهم جالسين يهونون الموقف بعيني ويبادروني بكلام مثل ( يارجال خمسة ريال ماتستاهل - أو ترى البلدية ماهيب نافعتك بس بتخسر وقتك - أو خلاص يارجال شف حلاق ثاني !!!!!! )


يالربع .. يا إخواااان .. يا أمة محمد ... كونوا أكثر ثقة وإيجابية في ردع المتلاعبين ولا تركنوا للاستسلام والاتكالية .. أغلبنا معه جوال كاميرا .. ويقدر يوثق التلاعب والمغالاة وإثباتها على التاجر أو البائع بالصور والفيديو .. شغل تسجيل الفيديو وأنت توجه الكاميرا عليه واسأله عن الثمن وساعتها بتشوف كيف يتحول موقفه ويدب الذعر في نفسه ... ويعرف بأن المواطن واعي وصاحب موقف ولا ينلعب عليه

إذا شايف بأن التصوير بالفيديو غير مناسب أو بيسبب لك إشكال .. كل ماعليك أن تواجهه وتقول له بالحرف الواحد بأنه نصاااااااااااااااب في التسعيرة وسترفع بذلك للجهات المسؤولة .. وبعدها تطلب منه ( فاتورة ) تثبت فيها المبلغ وشوف انتكاسة موقفه ساعتها .. لن يجرؤ على ذلك أو ستكون دليلا ضده .



أخيرا أترككم مع الفيديو تبع الحلاق :