السلام عليكم ورحمة الله وبركاته ..

اولا والله من كل قلبي ادعي للي فتح المنتدى وجزاه الله الجنة اللي خلانا نفش غلنا شوي من غلاء الاسعار ..


ما ابي اطول عليكم يا جماعة وخير الكلام ما قل ودل ..


غلاء الاسعار انا ابصم بالعشرة انه مهوب من المصدر حتى لو كان المصدر رافع السعر مهوب رافعه لهالدرجة لكن الوزارة النايمة اللي عندنا ( وزارة التجارة ) وحماية المهلك ( حماية المستهلك ) والله انهم طقها والحقها ...


ابو متعب الله يطول في عمره رفع لنا الرواتب ولكن الفجوة اللي صارت بين الرواتب واسعار السلع استاسعت بحجة وبدون حجة واقتصاديا اذا رفع الراتب لازم يكون فيه مراقبة للسلع بانها ما تزيد اسعارها ابدا ..

عموما اللي ابي آصل له في هالموضوع انك يالمستهلك تجمع نشرات العروض اللي يوزعونها المحلات التجارية وتروح للمحل اللي مسوي العرض وتاخذ منه السلع اللي مرخصة فقط .. صح ان العملية يمكن تكون طويلة لكن منتب مستفيد توفير كذا ريال فقط ، لا بنستفيد ان المحلات الكبيرة هذي بتاكل هوا ... ليش؟ لانهم يطبقون طريقة تسمى الاسعار الرائدة اللي هي يرخصون سلع معينة ويغلون سلع ثانية عشان يكون فيه توازن ويربحون شلقة دراهم وحنا اذا سوينا حركة تجميع العروض يمكن يتخسرون او بالاحرى مايربحون واجد لانهم والله ماظنيت يخسرون ابد!!!!!!



ثانيا ياخي ليش حنا اذا جينا نشتري اي سلعة غذائية نشتري ماركة معروفة؟؟؟ والله ياجماعة الطعم مايختلف واجد فجوة السعر في شهرة الماركة فقط ياخي خلونا نشتري السلع الرخيصة وما عليش اذا كان طعمها اقل لذة شوي .... والله ياجماعة باذن واحد احد اذا اجتمعنا على مقاطعة السلع الغالية صدقوني بنطلع بنتيجة لاننا بنقلل الطلب وبيزيد العرض وبيضطرون غصب ينزلون في الاسعار عشان ماتنتهي صلاحيتها !!!!


ولا يجي واحد يقول حنا ماغير 200 واحد مانقدر نسوي شي .. لا حنا من خلال هالمنتدى الجبار بنحاول ننشره لكل ايميلات العالم ناهيك عن السوالف نبدا سوالفنا بهالموضوع ونذكر بعض دايم بمقاطعة الغلاء ..



والله العظيم اني متفائل جدا جدا تكفون يا جماعة خل يكون شعارنا ( يدا بيد نحو مقاطعة الغلاء ) ..

وفيه حركة اللي عنده محل زينة يظبط لنا ملصق يكتب فيه (حاربوا الغلاء) ومهيب مشكلة يحط كم ماركة مبالغ في اسعارها ... وكلها كم يوم وتنتشر هالملصقات على السيارات ربعنا هنا مايصدقون يلقون شي يلصقونه على سياراتهم ...


عذرا على الاطالة ...