تم إفتتاح فرع جديد لبن داود في آية مول في نهاية شارع الأمير سلطان بجده قبل كم يوم.

مريت اليوم بقربه و قلت خليني أشوف إيش فيه عروض ..

إليكم مشاهداتي:

أولا .. أنفقع قلبي من الزحام و الحر و خرجت.

زحمة و هيصة ولا تقول إلا إنه بيوزع منتجاته ببلاش ..

ثانيا .. و نكمل من هنا .. من قوة الزحمة العاملين في المركز ماهم ملحقين على ترتيب البضائع و تنظيف الممرات (حاولت أصور لكن زحمة و حريم مالين المكان ترددت في الأمر لا يتلبشني أحد).

بضائع طايحة في الممرات .. أوساخ و بقايا كراتين البضائع و أشياء مكبوبة هنا و هناك.

بس أخطر شيء في الموضوع .. الفريزرات .. من كثر الزحام و إقبال الناس على شراء المجمدات العمال ماهم ملحقين على حفظ الفريزرات مليانة .. كل شوية يجيبوا أشياء من المستودع و يعيدوا تعبئة الفريزرات .. إلى هنا الموضوع حلو و ما فيه شي .. المشكلة إن الحرارة و الرطوبة في المكان عالية و الجو في جده لا يطاق و الظاهر إن المسافة بين المستودع أو رصيف التحميل و الفريزرات طويلة شوية فتجد المجمدات تصل للفريزرات و قد بدأت تفك من التجميد.

هذا غير رمي المنتجات فوق بعضها فوق مستوى التجميد مما يؤدي الى فك التجمد منها:




لاحظت شيء في رفوف الألبان .. منتجات الصافي و المراعي مليانة و مرصوصة بحيث تظهر على مساحة كبيرة و تغطي معظم الرفوف رغم إنها لاتزيد عن صف أو صفين في بعض الأماكن ..



لكن .. منتجات نادك محصورة في نطاق ضيق و بكمية قليلة جدا .. التفسير الوحيد لما رأيت هو نفاذ أو قرب نفاذ منتجات نادك وقيام المسؤولين في المركز بإعادة توزيع منتجات المراعي و الصافي لتغطية الفراغ الذي تركته نادك.




من الأمور التي تسر .. عروض على الدجاج المبرد كانت مررررة حلوة .. المهم تستمر:

حجم 1000 جرام من ساديا..


و 900 جرام من برديكس..


و دو 800 جرام



أخيرا .. زعلت من شيء أخر .. في خضم << متعوب عليها خضم هذي >> الزحمة و حرارة المكان و الحوسة لاحظت إن برادات الأجبان (اللي بالكيلو) مكسورة منها بعض الأغطية الزجاجية .. دخلت يدي جوة الثلاجة لقيتها حارة و الأجبان بدأت روايحها تفوح .. نبهت المسؤول عن المكان عن ضرورة محاولة تغطية مكان الكسر بنايلون أو أي شيء لحفظ برودة المنتجات و حمايتها من عبث الأطفال .. بعض أقراص الجبن واضح عليها إنها طاحت على الأرض و تشققت .. كما أني لاحظت بقايا حلويات أطفال مرمية داخل الثلاجة في المنطقة الأخرى المكسورة من الثلاجة (ما جاء في بالي أصورها)..


المهم .. رد علي المسؤول (مصري) حاضر و هنعمل كده بكل بروووود و لكنه بعد ثواني قفز من مكانه بحرارة و حماس مرحبا بأحد أبناء جلدته (الظاهر جاي من سفر) .. تضايقت من أسلوبه و بلغت خدمة العملاء في طريق خروجي و وعدوني يهتموا بالأمر (شاب سعودي).

بس بصراحة .. مع الزحمة و الحر أعصابي راحت فيها .. و لاحظت إن العاملين في المركز أعصابهم تلفانه و أخلاقهم في أخشامهم ..

عذرتهم .. لأن المركز رغم كبره وجماله كان يفتقر للتبريد المناسب و الترتيب .. يمكن الزحمة لها دور كبير في الحوسة لكن يفترض إنها فترة إفتتاح تزامن مع موسم الإستعداد لرمضان و المفروض إنهم عاملين حسابهم.

ملاحظة أخيرة .. نادك غيروا شكل عبوات العصير الحجم العائلي لشكل جذاب و حلو جديد .. لكنهم خفضوا الكمية شوووييييية .. الحجم القديم 1.8 لتر و الحجم القديم 1.75 لتر.
معليش .. الصورة مهي واضحة كثير لكن حجم العبوة مقروء..