ممكن الخبر في الصحف المحلية يكون كالتالي :

تفاجأ أحد المواطنين عند شراؤه كرتون برتقال من أحد الأسواق المعروفة بمدينة الرياض بتعفن البرتقال وعندما أرجعه وتجادل مع مسؤولي المبيعات وهم من جنسية عربية ..... الخ

لكن هنا في منتدى مقاطعة نقول :

أنا اللي شريت صندوق البرتقال هذا امس من أسواق السدحان بالصحافة اللي على طريق الملك فهد مع أنس بن مالك. وقمت بارجاعه ومسئولي المبيعات واحد سعودي وواحد ما نطق بكلمة لكن شكله اجنبي ، وبّختهم وأمرتهم بإزالة جميع الصناديق . لأنها شكلها كان عليها تخفيض لكن بدون ما يحطون السعر ، طبعاً هذا بعد ما كلمت حماية المستهلك اللي حضروا خلال ساعة ونصف وعاينو الصناديق ولقوا المعفنات وأخذوا عينات وطلبوهم للاستدعاء .

طبعاً ما له داعي ذكر مبررات المدير السعودي اللي يقول لي شكلهم مطلعهم من وسط الصندوق لأنهم لو كانوا فوق كان ما سمحنا بوضعهم . قلت له جعلك للبخاز اللي يبخز عيونك ، وأنا لو شايفهم فوق ... كنت أباخذهم يعني ؟؟ مشكلتنا بالمستخبي . ولا البيعة تشمل السطر اللي فوق بس ! مهو الباقي مغطى بأوراق ، ولا ابقعد أحفر ارتوازات بصناديق البرتقال . وقال لي اننا أزلنا التالف . وبعدين أمر الموظف الاجنبي باحضار صندوق عينة لإثبات النقاوة ، قلت له يالأخو : أنت قلت أزلتوا التالف . وعينة التالف هذي اللي قدامك اللي جبتها لك . قال ايه صح ، لكن أبغى أثبت لك اننا مهتمين !!!!

المشكلة كنت دايم انحاش من البرتقال المصري لرداءة طعمه واتجة للبناني عشان العصير للأطفال وليس الأكل . وش وجيهنا قدام من كنا نتصدق عليهم من الفقراء ، يعني هم عارفين من وين جت الصناديق أصلاً ؟؟؟

طيب تخيل ان الخادمة رمتهم بدون ما تقول لي وخلت الباقي عصير للأطفال... برضه حيكون متسمم ، لأن العفن يبدأ بدري ... وينتهي بالظهور علنياً على السطح .











قد يكون الموضوع برمته ما يستاهل مقارنة بما يجري عندنا من غش . لكن قلنا للتنبيه ... والله يحفظ الجميع .