فين البحر

فتحي حلواني

كل عام وأنتو بخير وبصحة وسلامة أنتو وأهاليكم وأحبابكم وأسأل الله سبحانه وتعالى أنه يجعلها سنة صحة وعافية عليكم .. يللا ياحرمة لا تحيرينا ورانا مشوار طويل ولا تنسي تنزلي معاكي القهوة والمعمول والشاهي المنعنش والمكسرات ولا تنسي تحطي على المكسرات شوية (زورومباك) طيب ياسيدي حاضر.

بس ياسيدي أبغى أعرف هوه المكان اللي حنروحوا بعيد وإلا قريب؟ فيه خدمات زي البقالات والمطاعم وإلا مافي؟ يادين محمد دحين أنتي ما يعجبك الرغي إلا وقت الخروج سيبيكي دحين من الخيقي والبيقي حرام عليكي نشفتي ريقي البسي عبايتك والحقييني على السيارة خلينا نكسب وقت .. وركبنا السيارة ياحرمة كم مرة أقولك أول ماتركبي السيارة اربطي الحزام لا يروح يصيدنا ماهر اللي شغال في ساهر ويصقعنا بمخالفة وما تسمعي إلا الجوال يزغررط برسالة مبرووك عليك جاتك مخالفة وإذا تاخرت عن السداد حتتدبل المخالفة ونحنا مو ناقصين اللي فينا كافينا .. ياسيدي طيب ايشبها الإشارة كدا حتى دقيقة ما تقعد خضراء؟ يعني هيه جات على دي الإشارة أغلب الإشارات اللي في البلد بالشكل دا بعدين يجي يقولك ليش تقطع الإشارة أنا ماني عارف فين فرق الصيانة اللي ماسكة صيانة هادي الإشارات وعلى أي أساس حاسبين الوقت فيها أصحاب السيارات بيستنوا اكتر من ربع ساعة والإشارة حمراء ولمن تولع على الأخضر ما تقعد حتى دقيقة ياناس شوفوا حل لهادي الإشارات الكحيانة اللي رفعت ضغطنا وفقعت لنا مرارتنا.

يبو فتو متى حنوصل لنا ساعتين زمان ونحنا ماشين بالسيارة يعني تقريبا قطعنا 180 كيلو فين مكان البحر دا اللي بتقول عليه؟ اسكتي ياحرمة لا تجيبي سيرة أنه نحنا رايحين البحر لا يسمعوكي حقون الأمانة ويروحوا يأجروا الشاطي الجميل للهوامير والمستثمرين اللي ما تركوا للغلابا لا أخضر ولا يابس إلا وشفطوه وربنا يستر لا يكونوا مستثمرينوا من دحين ونحنا ما عندنا خبر .. ولو سمعوا أنه نحنا رايحين لهدا البحر البعيد ما حيصدقوا خبر على طول حتلاقيهم جهزوا المخططات والكروكيات ومافي إلا استثمار وكله ببركة الأمانة لأنه الأمانة تموت في حاجة اسمها استثمار حتى كوبري الستين ما عتقتوو صار تحتو دكاكين وحرمت الأهالي وأصحاب الدكاكين أنهم يوقفوا تحت الكوبري طالما الحكاية استثمار في استثمار .. بس الشي اللي لازم تعرفوا الأمانة أنه في قرارات صارمة تمنع أنه يكون في كباين وشاليهات في البحر وفوق دا ما يكفيها أنه الـ 30 سنة اللي فاتت استثمرت فيها أبحر ومنطقة الكورنيش وبعدين أي ضغوطات دي اللي بتمارس ضد الأمانة مو الأمانة جهة حكومية حطتها الحكومة عشان تخدم المواطن وهدا بيخلييني أقول طالما انتهت فترة الإيجار لازم تبلغ هادول المستثمرين عشان يشيلوا قشهم واللي بسببو حرموا الغلابا من شوفة البحر .. الغلابا اللي بيجووا بدلة قهوتهم وكيس الفصفص عشان يستمتعوا بشوفة البحر .. شي يحزن لما يكون حال بحرنا بالشكل دا كله كباين وشاليهات وعشان تشوف بحر ربي لازم تدفع فلوس .. ياريت المسؤولين اللي في الأمانة يصححوا أخطاء اللي قبلهم من الأمناء واللي حرمونا من شوفة البحر ياريت يشوفوا حل لموضوع البحر اللي انحرم من شوفته كل اللي يحب جدة من حبايبنا اللي في كل المدن شرقها وغربها وشمالها وجنوبها.

شي يقهر لما يكون حال بحرنا بالشكل دا .. في كل دول العالم البحر هوه واجهة البلد الناس هناك تحس بقيمة الشاطي والبحر وكل مشاريعهم بتكون في الجهة المقابلة للبحر تعرفوا ليش عشان هناك في ناس تخطط في ناس تعرف أنه البحر دا متنفس لكل مواطن عندها مو زي اللي عندنا كل ما شافوا بقعة فاضية حطوا فيها كباين وشاليهات ومافي إلا استثمار وامسك لي واقطع لك وحرموا الناس من البحر وجماله .. يامسؤولي أمانة جدة شوفوا لبحرنا حل وكفاية لحد كدا خلوا الغلابا يستمتعوا بالبحر ونسيمه وارحموا من في الأرض يرحمكم من في السماء وعيشوا كتيييير تشوفوا كتيييير.

مثل حجازي: يحسدوا الفقير على موتة الجمعة.


http://www.okaz.com.sa/new/Issues/20...1217388860.htm