السلام عليكم
بعدما اشتريت فيلا في الرياض بمبلغ (900.000) ريال اقساط من احدى الشركات العقارية بعد خدمة 20 سنة عسكري
كان معي سيارة يوكن جمس موديل 89 والصراحة يوم طرمبة بنزين ويوم كمبرسر مكيف ووو
مالكم بالطويله
قررت شراء سيارة جديدة .. وفعلاً وقع الاختيار على (تاهو) 2010 في رمضان العشر الأواخر
، رحت لشركة اليسر ودفعت قيمت السيارة القديمة بعد ما بعتها 16000 ريال دفعه أولى وشريت السيارة ، بعد أسبوع كني نقدت على السيارة صوت ، وتفتفه ، قلت أوديها لمركز حول البيت أشوف وش المشكلة اذا كانت بسيطة سويتها واذا كانت كبيرة وديتها للوكالة علماً أنها تحت الضمان ما مشت إلا 500 كيلو لأني سمعت الوكالة حجز وغثى، المهم دخلتها المركز وقال الميكانيكي ومدير المركز (أنت متأكد أن السيارة جديدة 2010) قلت نعم وش فيه قال (السيارة مصدومة ، وراني على جهاز توضيح السمكرة وأسفل السيارة .
الناس تصلي القيام في العشر وأنا واقف أهوجس في السيارة (حسبي الله عليهم) ، اليوم التالي وديتها للوكالة (العيسى) على الدائري الشمالي قبل العيد بخمس أيام ، قلت للموظف الطريقة كذا وكذا وكذا ، قال دخلها للصيانة ، حصلت فلبيني فحص السيارة وقال : معقول هاذي سيارة جديدة هذا (بروبلم) مشكلة ، قلت سوي تقرير قال : بعدين مشكلة ، أنا بعدين فصل (طرد) من الوكالة ، رحت للموظف وقلت يقول كبير الفنيين كيت وكيت ، قال الموظف اللبناني بنسوي (هستري) يعني تاريخ السيارة من الشركة الأم ، وطلع معلومات أن السيارة سليمه .
قلت له : ممكن صحيح السيارة طلعت من الشركة الأم في أمريكا جديدة وشحنت جديدة ، ولكن صابها في الميناء حادث أو عند نقلها من جدة أو الدمام بالتريلا أو في مستودعاتكم أحد صدم بها وبعتوها لي بعد إصلاحها على أنها جديدة .
قال : لا غير ممكن .
قلت : يعني أنا اللي صدمت بها ، لوصدمت بها يحتاج ورقة اصلاح والاستمارة عندكم ما راح يعطيني المرور ورقة الا بالاستمارة ، واذا تبغون سوي تعميم واستفسار من أقسام المملكة جميعها .
قال : راح نرسل لإدارة الشرق الأوسط في دبي وراح يجي مندوب منها يشوف الموضوع ، أعطوني سيارة بديلة تاهو 2009 اللي بعد ما سقتها حسيت بفرق كبير بينها بين 2010 لصالح 2009 (وهذا دليل واضح على تورطهم) وبعد 3 أيام اتصلوا علي وقالوا سلم السيارة اللي معك 2009 سلمتها ، واستئجرت سيارة على حسابي .
متى جاء المندوب حقهم (بعد عيد الأضحى) وهم يقولون بعد عيد الفطر .
طبعاً امتنعت عن سداد الاقساط لشركة اليسر حتى تنحل المشكلة .
جاء المندوب : وقال السيارة مافيها شيء (يعني وش بيقول)
رحت للوكالة وقالوا سيارتك 2010 أستلمها بحالتها ولا ما حنا مسئولين عنها .
أخذتها ورحت .
ذكرت هذه القصة للعبرة والعظة وليس للشكوى ، فالشكوى على الله وحده
(حسبي الله على العيسى .. حسبي الله على العيسى .. حسبي الله على العيسى)
الله يجعله يفقد صالته بالكامل وليس بعزيز على الله
وأسال الله أن كان كلامي كذب أو افترأ أن يحرق سيارتي ما طلعت عليها الشمس
05-12-2010, 09:13 PM
نصب شركة العيسى للسيارات . . غبن .. قهر .. حرام
العرض الشجري