دخلت المربعانية قبل أمس ، فكان الخيار الأنسب لعشاء البارحة ( مريقيقات ) ، والله لنا فترة ما أكلناه ، والجو يساعد ، مع ان الفترة غلط ، لأنه المفروض كان غداء مهوب عشاء ، لكن قدر الله و ماشاء فعل .

السالفة باختصار شديد جداً ، حضر المرقوق وتجهزنا للغطس في أعماقه وناديت الصغار ياكلون فرفضوا رفضاً قاطعاً ، ما أعجبهم شكله بالمرة ، وفضلوا السندوتشات عليه ، بعد ما وصفوه بأسوأ الأوصاف (تكرم النعمة) أقلها اللي يمكن يقال هنا (مطاريس) . اييييييييييييييه ما علي منهم أنا دبيت فيه الين قلت بس ، استعنت بمن حولي عشان يوقفني أروح أغسل . رحت شفت شوي تلفزيون وبالصدفة لقيت عضوة مجلس بلدي في أحد البلدان الخليجية تتكلم عن ظهور فضيحة فساد في اللحوم وانهم يحققون في القضية وبيسوون كيت وكيت ....

المهم رحت ونمت ، وخذ أنواع وألوان الكوابيس ، وأشين كابوس فيهم ، كان فيه ناس يجروني لمركز انتخاب ويقولون لي انتخب عضو المجلس البلدي الخاص بمنطقتك ، وأنا أقول مابي مابي مابي ، قالوا انتخب غصب عليك هذا لمصلحتك ومصلحة مجتمعك ، المهم أصريت على الرفض وانحشت منهم ، وجلسوا يركضون وراي من حارة لحارة ، وملاحق وطردي ، الين الحمد لله صحيت من الغفوة وقمت من النوم والحمد لله افتكيت منهم .

اللهم اجعله خير ، اللهم اجعله خير .... المهم بعدها جلست أفكر: هل كان فعلاً عندنا شئ اسمه انتخابات مجالس بلدية قبل كم سنة ، واذا هالكابوس صحيح ، وين هذي المجالس، ووش سوت ، وليش عمرنا ما شفنا نتفة خبر عنهم ، وهل هم يستلمون رواتب ومكافآت اجتماعات بعد ؟ ولهم مكاتب ؟ ولهم مقار ؟ ليش ما عايدونا على الأقل يا كافي ؟

مدري بس الوكاد ابعدوا عن المرقوق بالليل وخلوه بالنهار وزاولوا شوي رياضة بالمغربية اذا غامرتوا فيه بالغدا ، فالنتائج قد لا تحمد عقباها .