عندي خط سوا استخدمه احيانا للمكالمات الغير هامه ، عشان ما اشغل جوالي الرئيسي بأرقام ما استخدمها الا نادراً . المهم ، تعرفون شريحة سوا تعطيك ملخص بعد أي مكالمة او رسالة بقيمة المكالمة او تكلفة الرسالة ، وقيمة الباقي في رصيدك .

عدة مرات ألاحظ ان قيمة الرصيد يتناقص بشكل غريب مع اني ما استخدم هذا الجوال الا نادراً ، لكن أمس ، سمعت نغمة الرسائل في هذا الجوال اللي راميه في الدرج ، ويوم شفت الشاشه ، لقيت الملخص طيب الذكر ، يقول آخر مكالمة كلفت 5.00 ريال ، وبعدين لقيت رسالة موجودة على شكل رابط انترنت وحذفتها على طول لأن المعروف ان مثل هذا الرسائل بمجرد محاولتك فتحها تخش فيك على الانترنت وعلى الرابط اللي فيها .

مش مشكله الرسالة ، نقول مثل باقي رسائل الدعايات ، لكن اللي استغربت منه هو وجود تكلفة الـ 5.00 ريال بالضبط ، وهذي مستحيل تكون بمكالمة عادية ، لابد من وجود كسور . واتذكر فعلاُ اني قد وجدت مثل هذي الملخصات تجي على الهاتف هذا كثير وهذا هو سبب تناقص الرصيد عندي بشكل ملحوظ . لكن امشيها لانشغالي بمكالمة او شئ وانساها .

طيب انا عمري ما اشتركت بأي خدمة من خدمات الشركات او الاعلانات كائناً من كانت ، من دخلت خدمة الجوال عندنا، ولا أراسلهم ولا أعرفهم ، فكيف يتم استقطاع هذه المبالغ والجوال معشش في الدرج لأسابيع .

طبعاً في الجوال العادي ، ما يطلع ملخص لاتصالاتك ، فعمرك ما راح تدري اذا كان يتم استقطاع 5 ريالات لهذه الرسائل .

طبعاً الشريحة اللي اتكلم عنها من سوا الاتصالات السعودية . قعدت افكر اذا كانوا يطبقون هذه الطريقة على جميع مشتركي سوا ، معناته بثانيه وحدة يدخلون مئات الملايين (اضرب 5 ريال بعدد شرايح سوا عند الناس) .

لكن رجعت وقلت في نفسي ، يمكن الجوال هذا اللي انا راميه في الدرج ونادر ما استخدمه ، يحس بالوحده من قل استخدامه ، وقال من أبسط حقوقي اني اسوي اتصالات من نفسي وكفيلي يدفع وهو ما يشوف الدرب .

يعني صرنا ننسرق حتى وحنا نايمين . وبالخمسات ، وليس الكسور .

لا تقولون اتصل على الاتصالات وقل لهم . هم ما عطونا حقنا الواضح ، عشان يتفاهمون بمثل هالاشياء . مع ان مقولتهم الشهيره (سدد وبعدين اشتكي) ما تصلح هنا ، لأني اصلاً خلاص سددت (انسرقت) من الرصيد .

الظاهر جماعة الاتصالات يعرفون مثل هذي الرسايل ومسمينها مكالمة (غصب) بتكلفة 5 ريال لكل مرة .

بصراحه شئ فيه من البجاحة وقلة الذمه وضياع الحقوق والاستهتار بعقول واموال المسلمين وغير المسلمين ..... ما لا يخطر على بال بشر .