السلام عليكم ورحمة الله وبركاته

طبعا اعجبت بالمنتدى وانا من المتابعين له من بداية افتتاحة

عندي حدث صار معي اليوم

بدون مقدمات

اليوم رحت الحلاق طبعا العيد بكره وقلت بحلق خشتي

المهم انا عندي عدة كامله للحلاقه

دخلت الحلاق وهنا بدأت التفاصيل

انتهيت من الحلاقه ثم سألت عن السعر طلب مني مدير الصالون مبلغ 15 ريال

مع العلم اني كنت احلق عنده من اول وكانت الحلاقه ب 10 ريال

لكن سألت عن سبب الزياده واوضحت له ان فئة الحلاق من الفئه ج وتسعيره الامانه
تقرر ان حلاقه الذقن 6 ريال ان كان في عدة خاصه فيك وان كان بدونها 8 ريال
المهم قال لي

بهذه الصيغه تبي تحلق ادفع وانت حلقت ومجبور تدفع غصب ادفع وبعدها اشتكي ولا راح يردوا عليك ويطنشوك دفعت وامري لله

واتصلت على حماية المستهلك ولا ردوا علي
بعدها اتصلت بهاتف الامانه وبصراحه كان تجاوبهم ايجابي
ووقلت له اني اسجل المكالمه اللي تدور بيني وبينهم
واني راح انزل موضوع عن الامر بمنتدى المقاطعه ووضحت له هدف المنتدى
وان كان مافي تجاوب راح انزل التسجيلات والكلام اللي دار بيننا

المهم ما اخذت 10 دقايق الا اتصل على مدير الاشتراطات الصحيه والاسعار بالامانه

وقلت له عندي عدد معين من صالونات الحلاقه اللي تسرق المواطن
وفعلا نصف ساعه ارسلوا لي موظف من الامانه وهي فرقه جواله على المحالات

المهم رحنا للصالون اللي تكلمت عنده

وطلب شهادات الصحيه ,, وسأل لم لم تعلق لائحة الاسعار.. وعن الادوات الغير صحيه واللي شافها بعينه .. الموس يحلق فيه اكثر من 1000 ولازال مستخدم .. الاسعار مبالغ فيها ومخالفه للنظام..

والمفاجأه كان الموس مصدئ واحد العماله لا يملك شهادة صحيه و رخصه للمارسة الحلاقه

كتب عليهم عدد من المخالفات .. وسحب رخصهم وطلب منهم مراجعة الاداره المختصه بذلك

رحنا الصالون الثاني وكان رافع الاسعار بشكل مبالغ فيه ... وعنده اكثر من مخالفات الاول



الزبده


السعودي يدفع للحلاق مبلغ يعتبره بسيط
لكن بحسبه بسيطه

15 ظرب 500 شخص حلقوا بيوم واحد حلاقة ذقن = 7500
30 ظرب 100 صنفره وبخار وغيره =3000
10 ظرب 100 حلاقة شعر = 1000

المبلغ الاجمالي للسرقه 11500
لو قلنا ان 50 حلاق استخدم نفس آلية السرقه كم تكون نتيجة المسروقات

575000 الف ريال
فهل ياترى كم المبلغ لو صار في كل مدينه كبرى في المملكه 50 حلاق بنفس السرقه

من احوج في هالمبالغ فقراء السعوديه ام الحلاقين الحراميه

بيطلع اكثر من 5 مليون ريال

المهم والله ان تعامل الامانه العامه بالرياض ممتاز ونسبة تفاعلهم مع الشكاوي كبيره
فقط انت سوا الازم عليك واشتكي على الحراميه
صدقني راح يكون اللي يسرك

رقم الشكاوي

940

وهم يقوموا بالازم