السلام
عليكم
والله هو مشهد مصور ومع ايماني بان اهل الحجاز اهل شهامة وكرامة بس كركتر حلو زي عمنا فؤاد بطاش ما طاش ومرة ثانية اخواني ابائي من اهل الحجاز انتوا فوق راسي والمعذرة لكن حبيت نخش جو والجايات اكثر ان شاء الله
والله بصراحة منقول من الساحات الحرة بس والله قوية
ستهم " فتو " تتسبب في تأخير ترقية موظفين المملكة ..!!
ـ ألو ... السلام عليكم .
ـ وعليكم السلام..
ـ أديني مدير قسم الترقيات لو سمحت!
ـ أهوه معاك ..
ـ الأستاز هشام جاوي ؟!
ـ أيوه ؟
ـ كيف حالك يا سيدي ؟
ـ أهلاً حبيبي ... مين معايا ؟
ـ معاك باسم أبو سبيكة أستازي ؟!
ـ أهلاً يا باسم .. كيف حالك يا ولدي ؟!
ـ والله مش ولا بد يا أستازي!
ـ ليه يا حبيبي ؟ .. مو إنت كنت متخرج السنة اللي فاتت .. وكنت عاطل وتبحس عن وزيفة ، واخترناك من بين ملايين العاطلين .. و وزفناك لما كلمتني ستو " فتو " ؟!
ـ إلللا يا سيدي.. وأنا والله شايل لكم معروفكم على راسي من فوق ، ولا راح أنسى لكم هوّه طول عمري ، بس شرورة ... إيش أقولك يا عم هاشم .. والله المنطقة بالمرّة نائية !!
ـ معليش .. أصبُر يا حبيبي .. هانت .. أنا ما قلت لك .. كلها كم شهر واجيبك عندي فجدة ؟
ـ ايوه بس راح ستة شهور يا استازي ولا حد افتكرني ... أنا قلت الجماعة يمكنهم دفنوني بشرورة ونسيوني ولا حاجة!
ـ لا لا لا لا .. ما حبيتها منك هادي يا ولدي يا باسم .. شوف انت بتفكر بأيه وأنا بفكر بأيه ؟ .. أنا لسة كنت فسيرتك دحين مع سكرتيري ..
ـ معلش استازي .. لا تواخدني .. أنا بس من كـُتر الحرقة اللي فيّه..
ـ انتو كدة يا بيت أبو سبيكة .. ما يطمر فيكم الخير أبداً .. إنت عارف دحينا فكرتني بمين ؟ .. فكرتني .. بستك " سكينة " الله يرحمها... كانت دايماً كدة نياتها عواطلية..
ـ أباالله عليك أستازي ما تزعل عليّة ... أنا بس من اللي فيه .. وكمان شوفت النقل اللي وعدتوني هوّه من ستة شهور اتأخر قلت اللل...
ـ اسمع يا ولدي يا باسم ... أنا حقولك حاجة عمري ما قلتها لأحد .. إحنا جتنا مجموعة من الوزايف في بداية السنة من المالية .. في ميزانية هادي السنة ... والوزايف هادي موزعة على مناطق المملكة ومخصصة لترقية الموزفين المجمدين القـُدامى .... والوزيفة اللي حنقلك عليها يا ولدي فجدة ... هي أساساً لموزف قديم مجمد مستحق الترقية من زماااان .. من أيام الدنيا دنيا .. فأول ما يترقى يا ولدي وتشغر وزيفته أنقلك عليها طوالي ..
ـ طيّب ليه ما بترقيني عليها أنا يا سيدي ؟
ـ أرقيك عليها أيه ؟ .. شوف هادا كمان التاني يقولي رقيني عليها.. يا واد لا تصير بجح كدة مرة وحدة.. أتقـُل يا واد ..
ـ طيب يا أستازي ايش بتستنوا .. ليه ما بترقوهم .. ونُخلص من هادا الموال ؟!
ـ يا ولدي الله يرضى عليك أصبر .. لا تصير زي هدولا الموزفين القُدامى في المناطق النائية ... أهلكوا أهلي وهم بيسألوا عن سبب تأخر ترقياتهم...!!!
ـ صحيح استازي .. هي ليه أتأخرت كل هادي المدة .. مع إنها جايتكم من الديوان أو المالية من ستة شهور ؟!
ـ أرقيهم ؟ .. كدة بس أرقيهم ... يا سلام .... طيب وفريد ..؟؟!!
ـ فريد مين أستازي الفاضل ؟
ـ " فريد حنتش قلي " سكرتير مكتبي .. ما انت عارفو .. معقولة ما يترقى ؟! .. المسكين جا وأشتكى لي .. وفعلاً معاه حق .. معقولة ما يترقى ؟ يعني كل الموزفين في كل مناطق المملكة يترقوا .. وسكرتير مدير الترقيات ما يترقى ؟! ... فين أودي وجهي من ستو " فتو " ؟!
ـ طيّب ايش المشكلة .. رقوه .. ايش بتستنو كل هادي المدة ..؟
ـ هو ... اسمع يا ولدي حقولك حاجة .. وأصحك تقولها لأحد .. إحنا الحقيقة مشكلتنا الرئيسية في النـِـزام .. النزام يقول : الموزف ما يستحق الترقية إلا بعد ما يغلق في المرتبة اللي هو عليها أربع سنوات .. و" فريد " ما يغلق الأربع سنوات هادي إلا في شهر تمانية .. يعني في شعبان ...!!
ـ يعني هادا هو سبب التأخير ؟!
ـ طبعاً يا ولدي ..!
ـ والدُجاج اللي قاعدين بيستـنوا في المناطق .. كل واحد منهم يقول حاجة ، واللي يجيب إشاعة جديدة...
ـ أخصرك منهم .. هـُمّ على قولتك ( دُجاج ) .. فكرتني بالملك فيصل الله يرحمه كان بيسمينا ( دُجاج ومناقيرهم من دهب ) .. خليهم يشوفوا دحين مين هُم الدجاج ..!
ـ يعني في شعبان استازي .. ده آخر كلام ؟!
ـ طبعاً يا ولدي .. أول ما يترقى " فريد " طوالي .. وان شاء الله كدة كلنا هادي السنة نتجمع ونفطر مع بعض في الحرم من المطبقيات اللي بتبعتها .. ستو " سكينة " ، وستو " فتو " ، وستو " ملكة " ... يا واد رمضان السنة هادي انت حتتسحر " منتو " من يد ستك " فتو " .. بس الصبر ... فين اللي بيصبر ؟؟
مع السلامة .. محبكم / فليت بن قنه ...عليكم
20-06-2010, 07:17 PM
والله قوية بالمرة
العرض الشجري