بسم الله الرحمن الرحيم
السلام عليكم ورحمة الله وبركاته
طبعا راح ادخل في الموضوع على طول كلكم سمع وشاف في الصحف حملة إرضاء مالكي تويوتا ومن ضمنها الأفالون طبعا الأخوان في المنتدى ماقصروا وزودونا بكل التقارير من صور وتجارب وغيرها فأنا قررت أني أخذ سيارتي في أسرع وقت حرصا على تفادي أي مشكله يمكن تصير .
طبعا قبل ما أودي سيارتي للوكالة قمت بوضع علامة على القطعة الي راح تتغير وهي الجلبة السوداء عن طريق المزيل وقطعة الألمنيوم بقلم خط وبطريقة غير مرئية مباشرة
وفي يوم الأربعاء الموافق 5/2/1431هـ وبعد صلاة العصر مباشرة كنت عند المهندس طبعا بدون أي موعد مسبق
وقلت له عن موضوع الحملة واستقبلني بنفس أسلوبهم المصطنع من ابتسامه وترحيب المهم قال اليوم مراح تخلص السيارة أذا حاب تجيبها الخميس الصباح أو تتركها عادي لأن الشغلة ماتاخذر أكثر من ساعة قلت له خلها عندكم وحرصته على الإهتمام بها على أن استلمها الساعة العاشرة من يوم الخميس
في يوم الخميس وفي نفس الوقت المحدد لاستلام السيارة كنت عند المهندس وأعطيته إيصال استلام السيارة طبعا قال السيارة خالصه وختم لي على الإيصال وقال رح استلم السيارة قلت طيب عطني برنت عن رقم القطعة والإصلاح قال لا لان سياسة الشركة في حال الشغل المجاني لايكون هناك أي نسخ للعميل قلت أكيد القطعه القديمه المستبدله راح تعطونيها قال لا راح ترجع للشركة الأساسية في اليابان بس كل الشغل والتغييرات موجوده بالسستم على الجهاز قلت الله يعين مو مشكله المهم راحت استلم سيارتي لقيتها ماغسلت قلت مو مشكله لاني بديت أطفش منهم .
المشكلة قلت خلني أشيك على سيارتي وأقوم أوقفها على جنب قبل لا أطلع بها من الوكاله ومثل ماقلت أنا حاط علامة على القطع الي راح تستبدل إلا وتكون المفاجئة وهي أن العلامات الي قمت بوضعها لاتزال موجوده والله على ما أقول شهيد بصراحه جتني صدمه يعني السيارة مصلحو فيها أي شي وفقدت ثقتي في الوكالة مع اني من الحريصين على الصيانة الدورية قمت وعصبت وعلى طول رحت للمهندس وقلت شوي أبيك تجي تشوف السيارة طبعا جاء معي وهو ساكت وقلت له وين القطع الي غيرتوا وأشر لي عليها كلت كذاب أنتوا ماغيرتوا شي قال مستحيل انا شيكت عن طريق الجهاز والسيارة مصلحة قلت شف اخوي انا قبل ما اجيب سيارتي لكم حاط على القطع الي راح تتغير علامات أنا أعرفها وشف العلامات ويوم شافها الى ووجه يقلب أسود وما عاد يعرف وش يقول وعلى طول اخذر سيارتي ودخلها للصيانة وقلت رجلي على رجلك لازم أشوف القطعه ونتوا تغيروها لان بصراحه ما عندكم أي مصداقيه وهو ساكت وما غير يتأسف ويقول يمكن الخطاء من العاملين بسبب الزحمة داخل الصيانة قلت هذي مو مسئوليتي مسئوليتكم المهم غيروا لي القطعه خلال نصف ساعه وطبعا القطعة المغيره هي الجلبة السوداء فقط وغسلوها غسيل مثل وجيهم وتوبه اذا انا غسلتها عندهم مره ثانية
حبيت أشاركم موضوعي لانه بصراحه شي يقهر يعني احنا نخسر وغيرنا مستهتر المفروض ماسوا الحملة مادام اهم مو قد المسئولية وطبعا الشكوى مراح تقدم ولا تأخر لان مافيه أحد يسمع لنا الي أشتغل على سيارتي هندي شكلهم جايبينه من الشارع
آسف على الإطالة مع تمنياتي لكم بالاهتمام والتوفيق
مصدر الموضوع
http://www.toyota4arab.com/forum/t106206.html
23-01-2010, 12:34 PM
مهم جدا بخصوص حملة إرضاء مالكي تويوتا
العرض الشجري