السلام عليكم ورحمة الله وبركاته
صبحكم الله بالخير

عندي موضوع محيرني وهو باختصار في الآتي :

انا شريت سيارة تأجير منتهي بتمليك من الراجحي قبل مدة وقدر الله علي ان فيه واحد قطع الاشاره ( الله يصلحه ) وكانت اشارتي خضراء المهم صدمته وانعدمت وجهية السيارة وطلعت علي الايرباقات ( حقت السواق وحقت الراكب ) المهم دعينا المرور وجا شرطي المرور وقلتله الي صار وان اشارتي كانت خضراء والثاني يقول ان الاشارة حقته خضراء فقال الشرطي عليكم كل واحد 50 % ( كل واحد عليه خمسين في الميه ) طبعاً اخوكم ارتفع ضغطه وبغيت اتظارب مع العسكري وقلت له هذا ظلم خاف الله ... زبدة الكلام قال وحدة من الثنتين يا أنكم تركبون معي وتنحبسون وتجيبون كفلا يكفلونكم وتجلس النسبة على ماهي عليه 50 % ولا يشملكم التأمين وبعدين نرفع معاملتكم للشيخ أو انكم تتنازلون الحين .. طبعاً تنازلنا.. رحت لهم ثاني وعطوني ورقة اصلاح فقط بدون تقرير للتأمين قلت لهم ليش قالوا لأنك تنازلت قلت طيب العسكري قال الخمسين في الميه وراك وراك وفوقها تنحبس قالولي عاد دبر عمرك..

المهم يالنشامى انا الآن في حيرة ( علماً انه عرض علي تقرير مختم وجاهر من المرور وذلك للذهاب به الى شركة التأمين ومن ثم ستدفع الشركة قيمة الاصلاح كاملة مقابل 500 ريال ) وأنا والله ما أبغى أغضب ربي وادخل في رشاوي وبلاوي وفي نفس الوقت عارف ان الشركة ما بترحمني فما العمل وفقكم الله لما يحب ويرضى