ليه هذا التهجم على التجار عندنا ؟؟؟

توله عطر مركزه بـ 50 ريال بس ونحط منها نقطتين بقارورة عطر 100مل وتعطي الريحه وتروح ريحة الكحول ؟؟

طيب اصدقك واكذب العقل والمنطق والكيمياء وكل شي درسناه ؟؟؟

قزاز وغيرهم عندهم عطور ماركات وتجي من اصحاب الشركات وفي عندهم عطور تسمى ( شعبيه ) وهي خاصه بقزاز فقط وهذي انا اتفق معك انها تعبىء في دبي لكن في عطور فعلا جايه من اصحاب الوكالات ومصانعهم ومو قزاز ولاغيره يقدر يلعب فيها...

بالنسبه للملابس مثل السواني وغيره ترى هم يمسكوا ماركه معينه وهالماركه تنزل موضه صيفيه او شتويه وتكون بسعر غالي جدا وتمشي البضاعه قدام الناس فتره اربعه خمسه سته شهور ممكن توصل لسنه بعد كذا تنزل الموديلات الاحدث والباقي من القديم يرتفع للمخازن فيقوموا يصرفوه بعروض تخفيضات ويخلوا التخفيض شهر اثنين او حتى ثلاثه شهور بعد كذا يمسكوا الباقي وينزلوه في معرض معين لهم بحيث يجمعوا كل الاستوكات وينزلوها في هالمعرض بتخفيض اكبر من اول ( اخر تخفيض يكون 70% مثلا ) ومرحلة التصريف الاخيره بيصير التخفيض اكثر من 150% من سعرها الاساسي...

فتره معينه وخلاص تبقى مجموعه قطع ماتصرفت نهائيا يجمعوها فوق بعضها مع الباقي بمخازن الرياض والدمام وجده وتنزل على شكل كنتيرات تباع بالكامل على المحلات الاخرى مثل الهرم وتاج توج باسعار زهيده جدا...

فهمتي ازاي الشغلانه دي ماشيه ؟؟؟

تي شيرت تكلفته الاجماليه 25 ريال

اول ماينزل كموضه جديده سعره 200 ريال ( نيو فاشن )
فترة التخفيضات بالمحل يصير سعره 100 ريال ( تخفيض 50% ) بعد مرور سته الى 9 شهور..
التخفيضات بالمعارض المخفضه التابعه لنفس الشركه يصير سعر التي شيرت 50 ريال ( تخفيض 50% )
يباع الى تاج توج والهرم ويعرض هناك باسعار 15 الى 30 ريال...

الملاحظ هو ان البضاعه هي نفسها ماتتغير بالذات الملابس بس في ناس مصروعه تدور على الموضه بغباء وفي ناس تشوف الشي اللي يناسبها وتلبسه...

هالامور ترجع بصراحه الى الافراد ومانقدر نلزم التجار باسعار محدده لان ببالكم لو صار سعر برمود او اتام مثلا بنفس اسعار تاج توج او الهرم هل تتوقعوا الناس بتروح لهم بنفس الشي والا بيقولوا عنهم ( low class ) ويتركوهم ؟؟؟

بامريكا واوروبا الاغنياء يشتروا الماركات وبعد فتره يبيعوها على محلات تتاجر بالمستعمل والناس تروح تشتري وهي عارفه ان هالملابس مستعمله وبعد فتره الزبون يبيع الملابس لمتاجر اكبر وارخص وهالمتاجر تنزل وتبيعها مستعمل المستعمل والشغلانه ماشيه على التمام والكمال لكن مشكلتنا هنا حتى بعض الفقراء لو قلت لهم خذوا الملابس هذي يردوها او يوزعوها على غيرهم مافي الا الاجانب مثل النيجيريين والبنغال هم اللي ياخذوها ويلبسوها اما اهل البلد يشوفوا الشي هذا عيب كبير..