عيش هذه الفتره في لحظه تحولات عظيمه .. أحس أني في مفترق طرق تاريخي يقف عليه المجتمع وأنا شاهد على هذا العصر

لطالما بقي الشعب صامتاً .. ماشين نباري الساس فيما يتعلق بالسياسه الداخليه اللي احنا موضوعها .. فمابالك بالخارجيه ! ماشين .. يطلع في طريقنا قرار نوقف عشان نتلقى هالقرار ثم نمشي

يطلع في طريقك تحويله تقعد سنين كامله .. توقف شوي من الزحمه عند التحويله .. ثم تمشي

كل يوم يطلع في طريقك شبك جديد ! هنا انتبه توقف .. لازم تبلع و تمشي .. أولا حتى ماتتعرض للمساءله وثانيا : في الحقيقة مالك خيار إلا تمشي ..إذا وقفت "بتنصدم" لأن الطريق ماشي بل داعس .. ملايين المواطنين الصالحين كادحين معك

هالأيام غير ...

الناس صارت تتكلم .. بل صارت تفعل ..

شعب كان ماله حق يتكلم في القرار ... مما يعني انه ما يحلم يكون شريك في اتخاذ القرار ... لكنه صار الآن قادر على انه يتخذ قرار بل وينفذ .. حتى لو كان الأثر غير ملموس أو غير معلن ... المهم المبادره

هذا ماحصل في المقاطعه .. سواء مقاطعه المنتجات الأمريكيه أو فيما بعد الدنمركيه وأخيرا مقاطعه المنتجات الغاليه +اللي تستغفل المواطن أيا كانت حتى لو وطنيه : مثل حمله خلوها تخيس وخلوها تصدي وغيرها

في البدايات كان هناك الكثير من المحبَطين والمحبِطين و اللي عاصروا الحملات الأولى لمقاطعه المنتجات الأمريكيه يذكرون كيف كانت الفكره تطرح كسالفه في المجالس لكن قليل اللي طبقها .. لكن مع مرور السنوات وتجدد الأحداث اللي تكشف وجه امريكا القبيح أكثر .. بدأت تتوسع هالظاهره وصار لها منشورات خاصه بالبدائل وغيره حتى جاءت حرب غزه لتكون دفعه قويه بهالاتجاه .. وأكثر شي يدعم هالتحرك الحين هو البيانات والأرقام والتصاريح اللي بدأت تصدر من رؤوساء ماك وستاربكس وكوكاكولا وببسي وغيرها والكلام عن وجود خسائر فاقت 40% في بعض البلدان حسب وكاله الأنباء الفرنسيه

هذي البيانات تعطي دفعه معنويه كبيره للفكره نفسها وتتسبب في زياده الإصرار بل انضمام مقاطعين جدد

الدنمركيه .. يتكلمون ناس عن أنها ضعفت .. ولكن فيه كلام عن شريحه كبيره مصرين إلى الآن على موقفهم وخاص ان بعضهم تعود على البدائل وماصارت تفرق معه

طبعا اللي يقولون انها ضعفت يرددون هالكلام في تعليقهم على أي مقاطعه أخرى مثل حمله خلوها تخيس وخلوها تصدي اللي جت لاحقه للدنمركيه .. وربما يكون هؤلاء الأشخاص يتكلمون عن واقعهم الضيق فقط يعني ماعندهم احصائيات او دراسات .. تلقاه هو ما اهتم بالمقاطعه .. واهتمامات جلسائه لاتحتمل طرح نقاش متعمق في مسائل كالمقاطعه او القضايا الاقتصاديه بشكل عام .. بالعربي : ماهيب أكبر همّهم هالسوالف

حمله خلوها تصدي تكلمت عنها كثير في موضوعي السابق " خصوصيتنا وجبروتنا .. حمله خلوها تصدي نموذجاً" وتعمقت أكثر في مساله الأشياء اللي خلت الناس يتحمسون للمقاطعه ويتمسكون فيها أكثر مع مرور الوقت وتصاعد الأحداث من ردود فعل للوكلاء والمؤسسات الحكوميه والصحفيه وغيره وكيف انهم بتكتلهم ضد المواطن صاروا سبب في تمسكه أكثر بموقفه بشكل فردي ومن ثم جماعي