ليش الحملة على عبد اللطيف جميل ؟

**(القاضي)** · 07-02-2009, 05:40 AM

أسعد الله أيامكم بالخير والمسرات :
مستغرب جدا من الحملة الشعواء على شركة عبداللطيف جميل وكأن مافيه أحد في السوق غير هالشركة ؟!
ياحبايب التجارة بيع وشراء ... التاجر يشتري من الصين والا من أي دولة السلعة بنص ريال ويبيعها بخمسطعش

لأن سعرها في بلدها شي وفي البلد الثاني شي ثاني .. وهالشي يرجع لدخل الفرد في البلد المبيع فيه ... ولا أدل على ذلك مثلا من أدوات الكمبيوتر والمواد الغذائية والأدوية وغيرها كثير ... لكن المشكلة مانصحى إلا يوم نفلس والا من قبل ولا أحد يدري وش السالفة

ادفع .. ادفع .. اشتري .. استهلاك بدون عقل ... والحين صحينا ؟

لحووووووووول .
التاجر إن شاء الله يشتري بمية ويبيع بألف ... وش اسوي لمخ يشتري أي شي بدون تفكير .
التاجر ماضربك على يدك وقال إلا تشتري مني ... أهو عنده سلعة وقدر يسوقها بجدارة وفاعلية وتخطيط جيد ..حتى خلق لها أرضية وسط المجتمع قوية .
إذن من صاحب المشكلة ؟!

... إنت صاحب المشكلة من البداية لأن التاجر جاب سلعة وهو وحظه تمشي والا تبور في السوق ...
الواحد منا ياحبايب ينظر فقط لمصلحته هو بس .. الحين انت تقول التاجر يدور مصلحته التاجر يدور الدراهم ..... وانت الحين وش تدور ؟!
تدور بس كل فترة تغير سيارة وتكشخ بها وتقز الشوارع بها يمين ويسار والا عشان يقولون والله يغير سيارة وتبي توفر فلوس ... حتى حملتك الحين عشان توفر دارهمك في جيبك وتكشخ قدام الله وخلقه .... الدنيا ياحبايب كلها مصالح .
وبعدين وفيه أحد مايدور الربح والمكسب ... في كل شؤون الحياة حنا ندور الربح والخسارة حتى الوالد مع أولاده يدور هالشي .. إما عشان يحفظون اسمه أو يخدمونه إذا كبر أو يكونون عزوة له أو أو ... حتى الله يكرمكم قضاء الحاجة لك فيه مصلحة وانتوا بكرامة .
شغلة إني أتاجر وأهم شي مصلحة الوطن والمواطن هذا كلام مثالي زيادة عن اللزوم .
والله كل واحد منا تهمه مصلحة المجتمع لكن أهم شي مصلحته ومصلحة أولاده وأهله وجيبه وما إلى ذلك .
الشركات الكبيرة والمحترمة يستفيد منها الكثير الكثير في الباطن .. مثلا عبداللطيف جميل قارنه بأي شركة ثانية من شركات السيارات بالمملكة وشوف وش يعطي الموظف :
رواتب مجزية .... بدلات جيدة ... إكراميات من عمولات وبونص سنوي مجزي .... تأمين طبي ... إجازات وبدل إجازات ... تعليم راقي للمجتهدين ولو في خارج المملكة... دورات للموظفين ممتازة وعلى أرقى مستوى مجانا ...تسهيلات في شراء السيارات للموظفين ...أنظمة إدارة متقدمة ومتطورة جدا قد لاتجدها إلا في الشركات العالمية ... حتى أن الذي يخرج من شركة عبداللطيف جميل تتلقفه الشركات الأخرى لكم الخبرة والمعلومات الهائل في الشركة وكأنك تعيش ليس في شركة بل في جامعة ..... تأمين في حالة الإصابة حتى ولو لم تكن على رأس العمل ... تأمين من تعول في حالة وفاة الموظف لاقدر الله لعائلته بمبلغ جيد ... قانون ونظام مبني على العدل والاحترام للبعض ولو تحصل أحيانا اختراقات أو تجاوزات لكن يبقى النظام العام نظام إنساني محترم لايستغني عن الموظف بكل سهولة ولو كان من كان إلا بعذر واضح (لأن اهل المال يقولون هذا الشخص وراه عائلة وأطفال وين يروح )...هناك شفافية وأدب في التعامل مع المخالف أو حتى المنافس جيدة ... ولا أدل على ذلك من أن عبد اللطيف جميل لم يفتح فرعا فيه وكيل قديم لتويوتا بل في مرة من المرات حصل خلاف بين أبناء تاجر من تجار تويوتا في الجنوب واختلف الأبناء وقد كانوا يريدون تقسيم التركة فتدخل محمد جميل وأصلح بينهم وأتى بفريق لتنظيم العمل وليعطي كل ذي حق حقه في حال سير شركتهم حتى استقامت لهم الأمور ولم يأخذ منهم شيئا ولو كان أحد ثاني كانت فرصته .
غير أعمال كثيرة تقوم بها الشركة في الباطن غير الظاهو من تطوير لمستشفيات عامة ( مانبي نذكر أسماءها عشان لانروح في داهية ) حتى مدارس حتى دور رعاية وأشياء أخرى كثيرة .. فهو يستفيد ويفيد ...
انا أدري أن الكثير يقولوا إني مدافع .... لا والله يا إخوان ليس قصدي مجرد الدفاع ولكن الواحد لازم يكون صاحب نظرة شمولية وينظر من زوايا متعددة ويظل صاحب أي شركة بشر ويحصل منه تجاوزات ولكن العدل لابد منه ( ولا يجرمنكم شنآن قوم على أن لا تعدلوا ، اعدلوا هو أقرب للتقوى ) ...
ولكم جزيل الشكر والعرفان