يا ليتني شفت موضوعك قبل فترة

أنا أحد ضحايا الغش التجاري في المواد الصحيه

ونصيحة للجميع أو اللي يبني له منزل لا تشترون الا الاصلي من الادوات الصحية

وما يكفي أنه اصلي إذا انكتب عليه الماني او صنع اوربي

لا بد ان تتأكد بنفسك وتسأل قبل لا تشتري..

قصتي مع ادوات السباكة طبعا ..كنت اتعامل مع محل يبيع جميع الادوات في مكان واحد

ووفر علي لاني كل شيء لقيته عنده .. طبعا كنت حريص على أن اخذ كل شيء أصلي

علشان يكون لي وللزمن ..

المهم .. وفي الاخير بعد ما انتهيت من البناء جاء وقت السكن

جربنا كل شيء في البيت هل هو سليم من توصيلات الكهرباء والسباكة ووو .. الخ

طلع كل شيء تمام ..

طبعا انتهينا من الاثاث وجميع الترتيبات في البيت ...

وقبل لا اسكن في البيت سافرت لمدة شهر ورجعت وانا فرحان ومشتاق للبيت الجديد

الا والطامة الكبرى وانا اتفاجئ بالبويه من تخرج من كل مكان في البيت وخاصة عند الغرف

اللي بجنبها المواسير.. والبيت مقطر مويه والجدران مبلله اغلبها ..

انصدمت ولا اعرف وش السالفه .... قلت يمكن عين ما صلت على النبي..

بعدها سكرت المحبس حق المويه علشان الحق ما الحقه من غرفة ..

على طول رحت للسباك اتهاوش معه ..

المهم جاني البيت وكشف في اماكن التهريب ولقى السبب شيء بسيط كلفني الكثير ...

تدروي وش هو في قطعة صغير مدري وش اسمها تركب بين الماسورة والمحابس

قالي هذي السبب .. طلعت كلها مكسورة وسببت لي هالكارثة..

ليش لانه مقلده وقالي النصاب انها اصليه وبعدين شفت الفرق الاصلي منقوش عليه الصناعة

والتجاري باين عليه انه تقليد .. بس بعد ايش ... بعد ما اكلت المقلب المكلف ..

فنصيحه يا اخوان انتبهوا انتبهوا...

واسف على الاطاله واتمنى تستفيدوا من تجربتي ..