ما ادري هذا منتدى ناس ناضجه والا مجرد مراهقين همهم الاكبر الصياح ورفع الصوت ( وهم في الحقيقه مايسوون اي شي ) واول زباين المطاعم الغاليه هم؟؟؟؟

الاجنبي ينقسم لعدة اقسام:

1- الاجنبي المستقدم براتب بسيط: زي السواق وحارس البيت وغيره هذول ضعوف مالهم الا الله ورزقهم على قدهم ويمشون نفسهم بارخص الاشياء ( حبة خبز في اليوم + طبخ في بيوتهم فول وفاصوليا وخلافه + صدقات الناس عليهم ).

2- الاجنبي المستقدم براتب عالي : وغالبيتهم من الشاميين والمصريين تلقاهم مدرسين ودكاتره وغيره وعايشين حياتهم توفير في توفير يمسكوا القرش جنب القرش حتى يرجعوا بلدهم ويأمنوا مستقبلهم هناك.

3- الاجنبي اللي عايش في السعوديه ومولود فيها وماخذ عاداتها وتقاليدها: ماتعرف هو سعودي او لا الا لو شفت الاقامه بيده وهذا يتأثر مثلي مثلك ورواتبهم في الغالب قليله او تلقاهم من ارباب العمل في الخفاء ماشين جنب الحيط.

ياجماعة الخير السعوديين مو ناقصهم اي شي ويقدروا يسووا اي شي ولاتقولوا الاجنبي هوا اللي سوا والاجنبي هو اللي خطف لقمة عيشنا والاجنبي هو السبب في البطاله والاجنبي هو السبب في قلة الوظائف؟؟

لازم نعترف ان العيب فينا احنا لازم نعترف ان السعوديين انفسهم تعودوا على الترف والدلع الزايد وهذا الشي اللي خلانا نوصل لهالمستوى ( معقول المطاعم اللي يشتغلوا فيها سعوديين بشكل كامل يعني طباخين ومباشرين واستقبال وحساب ونظافه سعوديين = صفر في المملكه كلها )

لاتقولوا الاجانب ماسمحوا لنا نشتغل هالوظائف قولوا اننا احنا السعوديين مانبي نشتغل هذي الوظائف اصلا في وظائف راقيه ونرفض نشتغلها لاننا مانبي الا الوظيفه الحكوميه ( مكتب وراتب يزيد كل شهر ومضمون حتى بعد التقاعد ) ومانبي نتعب.

شوفوا حلقة الخضار من بعد السعودهـ كيف صارت محد صار يروح الحلقه صرنا نشتري من السوبرماركت الكبير ونريح انفسنا لان تعامل السعوديين في الحلقه مقرف بصراحه يعاملك بكبر خشم كانك جاي تشحت منه وغالبيتهم ماخذ الشغلانه قهوه يجلس فيها هو واخوياه وبالاخير يقولوا مافي حركه ( الحركه بركه ) ويشتكوا ويتركوا العمل..

اول شي نصلح انفسنا ونبطل الحسد والتعصب القبلي اللي نهى عنه ديننا والهباله الزايده ( في كل موضوع القى واحد يقول الاجانب الاجانب كأن الاجانب هم اللي يحكمونا وينزلوا القرارات بانفسهم ) ونبدأ نصلح انفسنا ونتمنى الخير لغيرنا قبل مانتمناه لنا وكذا ربنا يبارك لنا في رزقنا.

معظم الردود في المنتدى توضح الحسد للغير ( هم يشتغلون بعرق جبينهم ليه مانشتغل مثلهم ) وبكل صراحه بسأل سؤال:

الحين لو جاء واحد يقول انه شغال جرسون في مطعم ويستلم الفين ريال يبي يتزوج وتقدم لاسرة محترمه ظنكم بيوافقوا عليه والا بيرفضونه بسبب وظيفته؟)

ياجماعة الخير المشكله في الغلاء كبيره لكن الردود في المنتدى ماتناقش هذي المشكله بعقل كل اللي صاير سب وتهزيء وكلام فاضي ما ادري احس نفسي داخل منتدى مراهقين والله المقاطعه عمرها مابتكون كذا.

الحين لو سافر اليمني حق الفول والمندي والمثلوثه وسافر الهندي والباكستاني حق الكافتيريات وسافر التركي حق الشاورما والمشويات وسافر الشامي حق المعجنات وسافر المصري حق الطعميه وجلسنا احنا يالسعوديين في البلد لوحدنا ظنكم بتمشي البلد؟؟؟؟؟؟؟

والله ثم والله لندفع لهم ثلاث اضعاف الرواتب حقهم ونرجعهم ونبوس رجلينهم والا من وين نلقى سعودي يتنازل ويتكرم علينا ويسوي محل شاورما ويشتغل بنفسه والا من وين نجيب سعودي يشتغل في المحطه يعبي لنا بنزين والا من وين نجيب سعودي ينظف الصحون في مطعم بخاري والا والا والا واول شي من وين نجيب سعودي يشتغل في ورشة سيارات ويحلق لنا شعورنا وينظف شوارعنا وسياراتنا ويمارس عننا كل الاشغال ( التافهه بنظرنا والمعيبه والرديئه والمستوى الواطي ) اذا لقينا هالسعودين صدقوني بعدها مابنحتاج نتكلم ولا بنحتاج وزارة عمل وعمل ولا اي شي لان الاجنبي لحاله بيترك لنا البلد اذا مالقى فيها خير.