الكل منا يطوف بلدنا الغاليه مترامية الاطراف ويذهب من الشرقيه للغربية مرورا بالوسطى والاخر من الشمال للجنوب وهكذا

والزائر لتلك المناطق يلاحظ نفس العيب متكرر من منتطقه لمنطقة ونلاحظ عيـوب كبيرة ومتكرره في بلديات تلك المناطق ولا نعرف الاسباب ؟!! ناخذ منها على سبيل المثال لا للحصر:

الدمام: مخطط 71 ومخطط 91
كانك في عهد الستينات شوارع الرئيسية الي عهد قريب كانك في الستينات حفر وصباخي وعدم تصريف مياه للامطار ؟ وحضائر الاغنام وسط الحارة تخيل؟!!! حضائر بيع وليست حضائر خاصه ولم تنقل من تلك المناطق الا قبل سنه بعدما شموا اهل المنطقه انواع الروائح كل ماهبت شمال
الاحياء الداخليه حدث ولا حرج ماعدا طريق الدمام الخبر الرئيسي
السوق مواقف بفلوس ؟!!!!!!!!!!! عادة سيئة صراحه قال ليش قال عشان المقاول اخذ تعهد ينظف حمامات السوق اجلكم اللله مقابل كل ساعه بخمسه ريال على كل سياره واعتقد المواقف تشيل فوق الف سيارة والسوق دايم فل؟

من محاسن الدمام حتى لانظلم بلديتهم كورنيشهم الذي يسر الناظرين صراحه بدعواا في كورنيش الدمام وكورنيش الخبر شي يبيض الوجه



الاحساء: من يزور الاحساء ومناطق المزارع يستغرب انه في المملكه شوارع بلا اضاءه ومطبات وتقاطعات بلا اشارات واشياء غريبه وشوارع السياره خلف السيارة ولا تقول هذه شوارع ريئيسية؟ عجزت لاحصل لها مبرر؟


الجبيل البلد: عدم تصريف لمياه السيول مطبات وحفر بمعظم الشوارع ومشروع اخذ له اكثر من سنه وهم يصلحون فيه عشان يحطون ماصوره وهو شارع المدينة قرب الكوبري ؟!!!!


حفر الباطن : منطقة غريبه صراحه
نحن في سنة 2007 ومازالت شوارع حفر الباطن الداخليه وارقى حي على قولتهم حي المحمدية شوارعهم ترابية نعم ترابية ومن يعرف المنطقه يشهد بذلك

فقط الشوارع الرئيسية لحفر الباطن القار؟!!!
احس حفر الباطن شارعين فقط شارع ابو قعر حق الكويت وشارع الدمام الشمال ؟!!! وياليت اهله يفيدونا عنه اكثر


الرياض : لفت انتباهي للرياض الشاحنات البرتقاليه التي تشفط مياه المجاري عزكم الله وطريقة تصريفهم الغير صحيه
استغرب وين يودون هالمياه كلها اثاريهم يكبونها بالبرررر بدون اي تنظيم وتاتي الابل السائبه وتشرب منها وتظهر بها بعض الامراض ( نزل بجريدة الرياض اظن الجمعه الماضي ) او الخميس قريته

اما الشوارع الداخليه فلست من اهل الرياض او من يزورها بتكرار ولكن لفت انتباهي مصنع الاسمنت بوسط احياء سكنية ؟!!! وتسرب الادخنه منه والتلوث الملحوظ جنوب الرياض
ومع الرياض لي موضوع كامل سوف انزله قريب


القصيم بريده : من كثر حفريات بريده طلع كاركتير يقول هل وجدتوا الكنز المفقود ياهل بريده ؟!!!!
حفريات على مدار العمر
معرفتي ببريده منذ 1991 وهناك شارع يظهر من المحاكم دائما حفريات فيه دائما يايمين يايسار واتحدي اي واحد يثبت غير ذلك لاني كل ستة اشهر امر بهالمنطقه ماااااااادري وش يسوووون

عنيزه ماعرفها عدل : بس استغربت قلت مراكزها التجارية ؟! على كثر تجارها
الغاط : رهيبه الدله والبراد اللي حاطين بمدخل المدينة والان حطوا ثلاث اقمار ؟ هلال ، بدر ، مكتمل وحطوا سيفين ونخله
احسه شغله مهايطه بس معجبني صراحه

الزلفي ، مهتمين بمدخل المدينه من جهة الحفر وغير مهتمين بجهتها من جهة القصيم ؟!!! يمكن عشان طبيعة الارض او مزارع مدري؟

رياض الخبراء فعلا روعه بالجمال ( اقصد شوارعها العامه )

حائل : من اروع المناطق بالمملكة من حيث النظافه وتنظيم المرور هذا الكلام لحتى قبل سنتين اما من سنتين فاظن تغير مدير الصيانه للشوارع ووصلت لها عدوى بريده واخذوا يحفرون وينبشون بالشوارع علما بان هناك مياه مجاري في اخر وادي اديرع تشوف الهوائل وتشم الروائح الكريهه واهله ابخص .. ياليت يوضوحون


المدينة المنوره : مدينة المصطفى صلى الله عليه وسلم استغربت الاحياء الشرقيه اهمال البلديه لهم وعدم رصف الشوارع وزفلتتها وماعرفها عدل اظن هناك احياء تحتاج لاصلاح شماليه كما سعت


جــــــده : ام الرخاء والشده فعلا انصدمت عندما تمشيت على كورنيش جده ياناس جده عروس البحر الاحمر مالها كورنيش زي الناس ؟!!!!!

ارضيه الكورنيش سوداءءء من الزيوت مادري الرطوبه وكم واحد راعي دباب ووكم واحد يبيع بليله وفشارات ودريفتين حاطينهن البلديه عشان الحلف بس ؟!@!!!!
هل انا غلطان ياهل جده ؟!!! المنطقه مابين قصر الملك وانت نازل للبلد مافيه الا مسجد هناك الناس العصر يقعدون بظله لين يبرد الجو ويروحون على رجولهم بارض ترابيه وكورنيش يجيب الهم ؟ سالت ليش قالا عشان مصالح التجار وتمشي كباينهم اللي بالايجار اليوم ومصالح شخصيه
الشي الثاني:
كل يوم يصيحيون اهل جده من قلة مياه الشرب وطلع عندهم مرض قبل سنه مادري مشكله بتصريف مياه المجاري
ماقول الا الله يعينكم ياهل جـــــــده وعسى يأتيكم امين بلديه وناس يخافون الله شي محزن والله


الظائف :: الله مااروع الجو فقط الجو لانه من عند ربي
اما الطائف فلي عليها مأخذ كثيره خصوصا على البلديه قعدت بالطايف اسبوع قبل سنه لاحظة قلت النظافه بالمنتزهات بل انعدامها
ومنتزهات الشفاء حوش ترابي وتجي البلديه كثر الله خيرها وترش مويه على التراب عشان مايطير الغبار .. والله انخجلت لان فيه سياح كويتيين وخليجيين استحيت وانا مالي دخل منظر غير حضاري ابددد

وش فيها لو زرعوه ثيل ورتبوه
بس هناك مقاول مدري تاجر مستاجر الارض من البلديه وينصب على الناس الخيل بعشرين والدباب بعشره وهات يافلوس ؟!!
اما المنتزهات الحكوميه تفتقر للنظافه بشكل عااااااااام
واكثرها بزنس ومصالح وتذاكر


الجنوب زرت ابها مره لابأس وماعرفها

الشمـــــــــال: رفحا ، عرعر ، طريف ، القريات ، سكاكا
بكل اختصــار الشمــال منسي ومهمل

لكن بعد زيارة خادم الحرمين الاخيره نتمنى له النهوض ( بيض الله وجهك يابو متعب)

تبوك : ماعرفها بس لاحظت بعض المناطق تحتاج للشوارع والارصفه وتصريف المياه


المعذره عن بعض المناطق لاني كتبت الموضوع على عجل وبعض المناطق ماجيتها بتمعن حتى لانظلم انفسنا

نلاحظ من هالموضوع تكرار معظم مشاكل الطرق ومشاكل البلديات والنظافه ومقاولين الطرقات وتكرار نفس المسرحيه حتى يبقى المقاول طوال السنه شغال ويضغ اردى نوعيه حتى يستطيع صيانته وتستمر الحسابات الجاريه
طبعا الملامه على البلديه وإدارة الطرق بكل المناطق

البلديات جيدين بس بإنارة مدخل القرى او المناطق وباقي القريه او تلقاها تفتقر لمعظم المقومات ويطقون لك لوحه المنطقه الفلانية ترحب بكم ؟!! برواز على المدخل

وانا لا انكر بعض الايجابيات لبعض مدراء البلديات ولكن نذكر العيوب لكي يتلاشوها ويحسنون من انفسهم والصديق مرءاة صديقه كما يقول المثل ولابد ان ننصح ونخاطب اؤلئك المسئولين حتى يعم النفع للجميع


تحياتي للجميع وانا اسف اذا اخطيت بحق احد واستغفر الله إن زليت بشي
والمعذره منكم ،،،،



اخوكم
مقاطع من الجبيل
كتب خاص لمنتديات المقاطعه