من ناحية السعر والله ما ادري اذا غيروه والا لأ
بقولكم عن اللي صار لي
في يوم اغبر رحت عندهم انا والمدام
كان عندهم عرض يقول فيه (بروستد 4 قطع بعشرة ريال مع مشروب غازي وبتاتا فقط في هذا الفرع)
المهم طلبتي واحد وانا عند الكاشير الا اشوف ذاك الصرصور الصغير عند الحديده اللي
ينطلون فيها السندويشات اقول للفلبيني شف هناك في صرصور وانا اشر عليه
قام الأخ وبكل احترام يجيب ذاك المنديل ورماه في الزبالة
انا تقرفت واخذت الطلب ورحت وانا مسدوده نفسي وما قلت للمدام المهم تركت الأكل كاني ماشتهيه
الا المدام تشر على الأرض وهي تصارخ والا أشوف ذاك الصرصور الثاني (لعنبو هالحالة), عاد هنا وصلت معي اقوم وانادي كل الموظفين واسحبهم واحد واحد واجمعهم واقولهم تفضلوا وهم يقزون الصرصور وكأن على رؤوسهم الطير اقوم و اسفل فيهم كلهم, ويطلع واحد من الزباين مرتاع يقول وش السالفة يالخو , ثم اقول للرئيسهم عطني فلوسي لابارك الله في مطعمكم الخايس واطلع سيده عالبيت وكبسة على كيف كيفك صنع في البيت.

والله هذا اللي صار لي من شهر تقريبا وللأمانة حبيت انقله وذلك لأنقاذ الأرواح من التسمم.

هذي أول مشاركة ولن تكون الأخيرة وشكرا على هالمنتدى اللي فعلا ينم عن وعي المستهلك.