ذبحونا بدعايات الصوابين المضادة للبكتيريا بالتلفزيون و انها تذبح 99% من البكتيريا على الجسم.
قلت ادور عنهم و اشوف وضعهم صحيّا، و صج استخدامهم أحسن من استخدام الصابون العادي؟
باختصار أعطيكم الجواب من الآخر: لاااااااااااااع!
شلون؟
مركز الوقاية و التحكم بالأمراض التابع للحكومة الأمريكية (Center for Disease Control and Prevention) سوى تجربة بـ200 بيت بعضهم بصابون عادي و بعضهم بمضاد للبكتيريا.
النتيجة كانت انه الصابون المضاد للبكتيريا ما فاد بشي أزيد من الصابون العادي و لا وفر حماية من النشلة و الانفلونزا.
الأطباء يقولون أي صابون عادي راح يأدي الغرض معاك ان شاء الله و ماله داعي تدفع أكثر حق الصابون هذا.
شخصياً أشوف الشركات ماخذين السالفة تجارة و دعاية و الناس مع الخيل يا شقرا.
من النقاط المهم الانتباه لها:
1- الصابون المضاد للبكتيريا يتميز بوجود مادة تريكلوسان (triclosan) هو اللي يذبح البكتيريا، بس المشكلة يحتاج يقعد على سطح الجسم دقيقتين عالأقل عشان يبدي فاعليته … مادري منو الفاضي اللي يحط الصابون على ايده و يقعد دقيقتين ناطر حق أبو الشباب يشوف شغله مع البكتيريا؟
2- بعض العلماء يقولون احتمال البكتيريا يصير عندها مناعة من هالمضاد مع الوقت.
3- مو كل البكتيريا اللي على جسمك مضر، بعض البكتيريا مفيد يحارب بكتيريا ضارة و ياكل العرق اللي تفرزه البشرة، المضاد اللي بالصابون غالباً يحرق الأخضر و اليابس و ما يفرق بين أي بكتيريا. (يعني يوم يقولون يتخلص من 99% من البكتيريا صج ما عندهم سالفة)
4- وايد من مستخدمي الصابون المضاد للبكتيريا يقولون انه يسبب جفاااااااف حق المستهلك.
زين شلون تستخدم الصابون العادي بشكل صحي؟
اغسل ايدك بماي دافي وصابون على راحتك و ان شاء الله ما اييك شر.
زين و الصابون الناشف (اللي ما يحتاج ماي) المنتشر هالأيام؟
زين مافيه مشاكل و تمام بس لا يصير بديل حق الماي و الصابون خل يكون التنظيف الرئيسي هو بالماي و الصابون و الثانوي الناشف.
يعني بس يوم ما يكون عندك ماي و صابون استخدمهم.
و مشكلته هم استخدامه الزايد بدون ماي يسبب جفاف و يزيد احتمال الإصابة بمرض أو عدوى ،،، هالكلام بس مع كثرة الاستخدام المتكرر من غير ماي و صابون عاديين.
صج يذبح 99.9% من البكتيريا؟
إي بس مو على ايد الإنسان، يذبح هالنسبة من البكتيريا على سطح سهل و بيئة متحكمين فيها، أما إيد الإنسان و استخدامه اليومي شي ثاني كلش.
المصادر:
Everyday Health
How Stuff Works
About.com

منقول