والله ما يعطونك ريال ، يوم الشركات بسنه ، مصدق بتطالب بحقك أنت ، وين يا أبو في أوربا أنت .



لالالالالا والله ما أتركهم سلامات




أولا هم غلطانين ومهملين ويحسبون أرواحنا لعبه أو أني سعودي قديم وبسكت عن حقي



المهم بداية القصة صار حادث وجاء المرور بعد ساعتين والتأمين وكلهم يقولون الخطأ على الشركه 100%


واخذتها ورحت الشركه كبداية وقلت أبي تعويض ومعي اثباتات تقرير المرور والتأمين والصور بالموقع



وقال مافي شئ يثبت بالبداية


قلت له تقرير مرور برقم والتأمين مثله وفيه صور وفيه شهوووود وتقول ما في اثبات



قال خلاص روح للموظف تحت




اروح له



قالي تخلص امورك من المرور وتجينا



رحت للمرور



وقلت لهم ابي تعويض



اعطوني ورقة تقديرات واشيل السياره لمكتب التقديرات بالنسيم


طبعا صارت سالفه مع راعي السطحه



اتفقنا على مبلغ 150 ريال على أساس نروح للعروبة وبعدين قال لي راعي السطحه نروح للنسيم عشان اذا حولونا لشيخ المعارض يكون قريب وأكدت عليه يكون المبلغ 150 ريال

قال اوكيه


وصلنا للتقديرات قالوا السياره مكلفه روحوا لشيخ المعارض



جاء راعي السطحه وقال زيدني 100 ريال واوديك لشيخ المعارض قلت والاتفاق


قال اجل بنزل السياره


قلت منت منزلها احنا متفقين والا بجيب الشرطه



جاء قالي بنجلس عند شيخ المعارض للساعه 2 الظهر واحنا كنا بالساعه 9 الصبح ويقول زحمه


قلت له طيب ليش توافق من اول كان قلت اذا بنروح شيخ المعارض بنزيد


قال اذا خلصنا قبل الساعه 12 ما بأخذ ولا ريال



قلت طيب



ونروح لشيخ المعارض




ويقدرونها قبل الحادث وبعد الحادث واعطوني ظرف مختوم للمرور بقيمة التعويض


طبعا خلصنا من شيخ المعارض الساعه 11 ويوم صلت للبيت ونزلنا السياره



جاء راعي السطحه يقول عطني 250 ريال


وانا اقول له اتفاقنا اذا خلصنا قبل الظهر ما تأخذ ولا ريال صح والا لا


قال لا دايم يجي زحمه بس حضك زين ومن هالكلام

قلت له شوف وانت بعد حضك زين لاني بعطيك 150 ريال بس وبعتبر الـ100 اللي طلبتها هي اللي ما تأخذها اذا رجعنا قبل الظهر


قال لا حرام عليك بتسرقني


قلت استح على وجهك ولا تقول عني حرامي وانت من بديت تبغى تستغلني وتزيد وتقول كلام منت قده


شيل الـ150 والا والله ما تشوفها طوول عمرك واذا بتشتكي اشتك اصلا صرت راعي شكاوي


يمكن اخوي ما يفتح الباب بسرعه برفع عليه شكوى



اخذها وقلت له

اسمع زين مال الحرام مو طيب


وانزلها ويروح



واليوم الثاني رحت لمرور الشمال وانشب لهم الا تخلص اليوم ويوم خلصت قالوا خلاص مندوبنا بيرسلها لمرور الناصريه


قلت لا انا بخذها وبوديها وافقوا


وادعس لمرور الناصريه الساعه 10 مع الزحمه والقرف واعطيهم الظرف وجو يقولون وش اسم الشركه


قلت لهم الاسم والموقع وكل شئ


قالوا لا ما نقدر نتبلى على احد


خلاص بنراسل الامانه قسم المتابعه والتنسيق عشان اسم الشركه


قلت لهم انا بأخذ الاوراق واخلصها واجيبها لكم


اعطوني الاوراق وسألتهم


وين مكتب التنسيق والمتابعه


قالوا على الدائري الشرقي مخرج 9


انا


واروح من الناصريه للامانه وصلت الساعه 1 وسملتهم وقلت لهم انا باخذ الاوراق منكم وبروح للمرور


جيتهم الاثنين وقالوا تعال بكره


جيت الثلاثاء قالوا تعال السبت وما نتأخر عشان تلقاها جاهزه


جيت السبت قالوا المدير مشغول تعال بكره وكنت بطلع


سمعت السكرتير يقول لواحد المدير بكره عنده اجتماع ومو جاي



وانشب لهم واقول والله ما اروح الا والاوراق معي وخلصوها وكل شئ وجلست من الساعه 9 الى 12ونص عشانها

بس للامانه السكرتير هناك الاسمر رهيب ومتعاون ويخلص الامور بسرعه بس البلى بالمدير العنز


قلت ما يمديني اروح للناصريه ورحت اليوم الثاني للناصريه

وسلمتهم الاوراق وقلت يالله يالله بسررررعه عطوني ورقه اروح للشركه


قالوا وقف يا حلو <<< أنا حلو


خلاص احنا بنراسل الشركه وكل شئ


كلمت الشركه وقلت لهم ارسلوا المندوب بسرررعه


وجلست اسبوعين مماطله وبالاخير قررت اصير مثل ابو زنيفر


اكلم الشركه 20 مكالمه بالساعه واروح لهم وانشب


وبالاخير طفشتهم وادق كل يوم


واذا ما ردوا رحت للشركه


ابو زنيفر هذي حسناته هههههههه



وبالاخير اليوم عطوني رقم المندوب وقالوا لا عاد تكلمنا كلم المندوب



اتصلت على المندوب قال



بكره الساعه 10


قلت له وبكره تجي تقول بعد بكره


قال لي المندوب خلاص قابلني بالمرور بعد نص ساعه



ورحت للمرور وخلصت الاوراق واستلمت الشيك وبغيت اسحب على ورقة التنازل اخليهم يطاردوني بس طفشت ابي انام الصبح



واخيرا اخذت حقي وانتصرت



وطبعا ابوي جاب سمكري للسياره وقال تتسمكر بـ7000 ريال



ناظر فيني ابويه نظره


انا انخرشت ويوم دخلنا البيت قلت له بروح للشركه ونجرب محنا خسرانين شئ



واروح ورى الشركه لين اخذت حقي



وقبل يومين ابوي يقول استعجل بالشيك عرفت انه طفر



صار الحادث بـ20/5/1432

واخذت التعويض بـ 20 / 6 / 1432



وترى الاجراءات الحكومية والرسميه اسبوع وانت مخلص



يوم تاخذ فيه اوراق التقديرات وتقدر

اليوم الثاني تروح للمرور باي قسم وتحول للناصريه يعطونك اوراق وتروح لقسم المتابعه والتنسيق بالامانه

تجلس يومين وترجع لهم وتاخذها بس لازم تستعجلهم

تاخذها للمرور الناصريه وخلاص رسميا انتهينا


الباقي على المرور يراسل الشركه وباقي الامور من مخاطبه للغرفه التجاريه وغيرها



هنا انت وشطارتك واتقانك لدور ابو زنيفر

مع الشركه







وتحياتي للجميع