اولا نحمد الله على كل شي

هذي قصتي مع معرض دار العربة للسيارات الامريكية المستعملة في الرياض الدائري الشرقي بين مخرج 11 و 12

انا شريت منهم موتر امريكي مستعمل قبل سنتين وحاولت اوديه للوكالة للفحص وعيا صاحب المعرض قلت طيب اوديه لورشة الغروب فالنسيم عشان افحصه قال طااايب

فحصته بدي بالجهاز ومكينه وقالي المصري .. كلوا تمام يابيه هات 200 .. عطيته ميتين وانا طاير بالفرحة الموتر فعلا شكله نظيييف زي اي موتر امريكي لكن بعد سنتين انكشفت الفضائح

في يوم من الايام صدمت لي واحد من ورا وانكشفت عيوب الصدام الامامي علطول انشق واكتشفت ان فيه شبك حديدي مركب مكان الشق السابق ومسمكر وطالع شكله اخر حلاوة

الغريب كيف مااكتشفه المصري وحده من اثنين .. اما المصري نصاب او انه نصاب لان الجهاز بعد الكشف على البدي ماطلع اي عيب !!

المهم رحت اسمكر عند فلبيني فالنسيم قالي الجهاز مافيه مشكلة المشكلة في المصري .. عندك الرفرف بعد مسمكر .. قلت كيف؟؟ .. قال سمعتني !!

يعني طلع الموتر مصدوم صدمة بنت كلب طيرت الصدام والرفرف .. حسبنا الله عليك يامعرض دار العربة والمشكلة السوداني يقولي الموتر نزيف واللهي ماهتحصل احسن منو .

طبعا السيارة كاي سيارة امريكية اي حادث يحصل لها يكون مسجل في ادارة المرور في امريكا والسيارة ماكان مسجل عليها اي حادث فيبدو ان الحادث حصل داخل المملكة وهذا يثبت ان صاحب المعرض على علم بالحادثة وغشني .

فالختام اسأل الله القوي العزيز ان كان صاحب معرض دار العربة يعلم بالموضوع او السوداني او المصري والفنيين اللي في ورشة الغروب يعلمون ان لايبارك في مالهم ولا في تجارتهم ويجعل خسارتهم عاجلا غير اجل ..باعوني السيارة بسعر المستعمل النظيف وطلعت مكركبة

حسبي الله عليهم ونعم الوكيل .. اسال الله ان يعوضني بدالها .. ويكفيني شرها للاسف بدا يبان بعض العيوب مثل الصدا

طبعا ماودي اقص عليكم سالفة التامين اللي مجرد ضحك على الذقون

للاسف التجارة عندنا اصبح يميزها الغش .. بل احيانا تجد الغشاش يظهر بمظهر اهل الصلاح ويبيع الناس منتجات تضر بصحتهم وقد تسبب هلاكهم .

لماذا اصبح الناس همهم دنياهم ونسوا الاخرة !!؟؟ عجبي لمن يجمع هذي الاموال بطرق حرام وفالاخير تذهب لورثته لان الله يحرم متعتها عليه ويجعلها عذاب عليه فالاخرة تكوى فيها جباههم وجنوبهم .

الموضوع كتبته لتحذير اخواني من هذا المعرض ومن ورشة الغروب ومن السيارات الامريكية المستعمله افحصوها عند السمكرية فهم لهم نظرتهم الخاصة الجهاز قد يخطيء .. اما ماحدث لي فاني احتسبه عند الله لاني اعلم ان في هذا البلد المظلوم يؤكل حقه عيانا بيانا ولكن الله يعوضه باذن الله ان صبر واحتسب .اما الظالم فهو يحمى ويدافع عنه باسم النظام .