=الموضوع قيد الإنشاء= لم يكتمل طرحي بعد.. ارجو زيارتكم مرة اخرى لنستفيد جميعا =
بسم الله الرحمن الرحيم.. تحية طيبة لكم جميعا ..
مقدمة../
لاينكر عاقل فينا بأننا بحاجة ماسة الى الوعي والإدراك بكافة حقوق الفرد منا.. للعيش بحياة كريمة رغيدة.. ملؤها الموارد الطيبة النافعة لنستمر بالعطاء..في مملكة الخير اللتي بدأ يتكاثر في رواد خيرها من تجار وأكابر مرض الجشع والطمع.. والرغبة بالمزيد دون العطاء المزيد..
<< توهقت بهالمقدمة كيف انهيها..
ومن هذا المنطلق.. بات لزاما ًعلينا انا وانت ومن نعرف.. أن نعرف بأي الطرق يمكننا ضمان الجودة.. ضمان إستحقاق ما دفعته في هذا المنتج.. أيا كان.. ولعلي بدأت اليوم في جانب السيارات..
لبلوغ الفائدة القصوى.. والراحة المثلى.. وبالتأكيد.. ضمان المصلحة العامة..
الصراحة الموضوع جدا ً كبير ومتسع ومتشعب للنقاش.. أقصد ببالي شغلات كثير..
غلاء الاسعار بشكل عام.. وتكتيكات التسويق الماكرة لإستغلال المشتري.. وإحتكار الضمان على الوكيل دون غيره.. قطع الغير ومدى توافرها.. ومفارقة الاسعار مابين بائع وآخر.. خدمات ما بعد البيع من ضمان وخدمة مجانية وقطع استهلاكية وتوافر ذلك من عدمه او قصوره على مشتر دون آخر.. التراجع عن الصفقة حال جور البائع.. او عسر المستأجر.. لاقدر الله 
وقيسوا على ذلك تفاصيل وتفصيلات كثيرة مادون هذه المحاور..
لكن اليوم انشالله بهالصفحة نبي نقضب بشيء واحد على الاقل.. أبي أناقش معكم في هرجة... وباللفظ البسيط السهل العام..
( سيارتي تضررت.. وربي أحوجنا للوكيل.. اللي ماهو بكفؤ لإسم وكيل..! -حاشاكم العيب- !! )..
السيناريو..
سعيدان واحد حبيب.. توه مطلع موتر 2010 لونه قرمزي.. ماشي هذاك اليوم بشارع المطاعم.. الا وواحد داغسن موتره من لفة طالع فجأة كذا.. المهم أبشركم.. خوينا طلع منها كالشعرة من العجين.. وهذاك المتهور بعد.. عاد مالكم بالطويلة.. جا نجم.. وخطط ورسم.. والغلط على الطرف الثاني 100%.. وسعيدان الحمد لله ..ربنا أكرمه أن موتره بيدخل على التأمين الشامل واصلاح وكالة.. وعلى قولهم يادار ما دخلك شر.. << بدري علينا ..!
وتمر الايام.. وموتر سعيدان رازينه بزاوية الوكالة.. ماحركوا فيه قطعة تقل زعلانين عليه.. وخوينا تعطل شغله.. وإستأجر سيارة يكد عليها ارخص ايجار سيارة يومها بـ60 حتى قير عادي مايعرف يسوقه وتعلمه هالفترة القاهرة !! .. وعاشت معاه هالفترة العصيبة لدرجة يقول مع الايام حبها وبغى ينسى ان عنده موتر..! لكنه صاير يتابع مع الوكالة ببرود.. خبركم هو يائس فيهم كحال كثير منا الحين..
اما هم ماغير خذ لك تصاريف.. مبلغ التعويض بيقدرونه و تأخر..ثم الموافقة..
و اوراق التأمين ماجات.. وثم جات وطلبية القطع ما جات.. ثم كلهم جاؤوا بس ناقصنا مدري وشو.. رغم انه سعيدان منتظم بالاقساط كلن قبل يومه بيوم..! والصيانات من اروع ما يكون حتى المسمار مايشده الا عندهم..
المهم وهذاك اليوم.. طفح الكيل.. وضاقت الدنيا الوسيعة.. وسعيدان جا يشكي لي.. ولنا بهالمنتدى..
محاور الموضوع../ ( يعني وش نبي نتكلم به ! )سعيدان الطيب.. وش غلطاته ووش فوت.. ووش خلاهم يستغلون لحمته اللينة..
سعيدان كيف تفاهمه مع الوكالة.. الاسلوب..
سعيدان متعطل.. الرد ننتظره الى متى..
متى نرفع الصوت.. ومتى نصبر.. والصبر له حد.. لكن بموضوعنا.. نبي حل لما بعد..!! هالحد !!
النصائح والاستفادة..
لي كم جلسة مع خوينا سعيدان هذا.. وانا وياكم أبي نعلمه كيف يتفاهم مع هالوكالة..وكيف يطلع حق تعبه من مرمطةمشاوير.. وتكاليف.. وانتظار تأخير.. .. وطبعا موتره الزبدة.. يبيه بأسرع وقت ..
=الموضوع قيد الإنشاء= لم يكتمل طرحي بعد.. ارجو زيارتكم مرة اخرى لنستفيد جميعا =
26-08-2010, 02:35 PM
لاتشيل هم.. أنا معك وبأعلمك كيف توريهم شغلهم !!
العرض الشجري