اولا تحية واحترام لكل اعضاء المنتدى العظام وهذا اول موضوع اشارك فيه من اعدادي وليس نقلي واذا اصبت فهو من الله واذا اخطأت فمني ومن الشيطان حاب اتكلم عن عدة مواضيع فالعفو من كثرت القرقرة حقي



النقطة الثانية عدم تصديق كل شيء بالجرايد , الجرايد تبغى تبيع وبعدين بعض الاحيان اشكك في اهداف بعض المقالات زي حملة بعض الجرايد على رجال هيئة الامر بالمعروف الله يثبتهم ان شاءالله اخر خبر سمعته مني فاكر من جريدة اشتريتها ولا من موقع اخباري( يقول المصدر مواطن اشتكى على رجال الهيئةاقتحمو استراحته وشافوا مرته وهيا لابسة ملابس النوم او حاجة زي كدا وهددوه لو اشتكى حيتصرفو معاه تصرف ثاني ) لا ياشيخ من جدك وكأني اهبل حصدق فيلم هندي ويييييييييييييين كلام مايدخل المخ ياخي لو كان عقلي تنح ودلخ ماصدقته اتارينا في فيلم امريكي


النقطة الثالثة العنـــــــــــــــــــــــصرية كنت احب افرفر في المنتديات واتفرج على اراء الناس والصراحة انصدمت العنصرية منتشرة السعودي يسب يقول هذا سعودي متجنس ولا هاذا ابويمن وهذا بنقالي والسعودي المتجنس يسب يقول يابدوي يامتخلف والغير سعوديين يسبو , يمين بالله لو الرسول عليه الصلاة والسلام موجود بينا ايش تتوقعو حيقول ؟؟؟؟؟؟؟؟ (كان خجل من امته ), معقول كدا واحنا خير امة اخرجت للناس قريت كلام انصدمت بيه واحد يقول الحضارم ماسونيين لاحول ولاقوة الا بالله مدري الاخ اللي كاتبها يعرف ايش معنى ماسوني ان كان مايعرف ويقولها فهاذي مصيبة وان كان يعرف وقاصدها فهاذي مصيبة اكبر , كفرت مسلمين عشانك ماتحبهم وقاعد يقول احتلو البلد , ياحبيبي اللي اجتهد ونال هذا من رزق رب العالمين مو من فلوس ابوك وواحد يتكلم على البخارية ويقلهم طرش بحر ويسبهم ويقول انا قبيلي , الله يستر والله خايف على البلد اذا كثرت من العينات هاذي رب العالمين وضح في القرآن انه مافي فرق بين العربي والأعجم الا بالتقوى , طبعا ماأبغى احد يجي يقلي انا مع الأجانب طبعا أنا مع توطين الوظائف وولد البلد أولى بس للمجتهد ولا دوائرنا الحكومية معظمها سعوديين وكلكم شايفين الوضع لما تخلص معاملة وارجع واكرر انا مع توطين الوظائف واحترام الاجنبي وعدم احتقراه لان مافي احد احسن من احد ( كلكم لآدم وآدم من تراب ) السعودية بلد خير والحمدلله والمجتهد ليه نصيبه مهما كان اصله طالما سعودي جد واجتهد بالحلال الله يباركله بحلاله واذا بالحرام الله يخسفبه قولو امين.

واخيرا الصراحة شفت ناس من هذا المنتدى يرفعو الراس بطريقة كلامهم وتفكيرهم الراقي ويشرفني اكون من اسرتكم فإن شاءالله تقبلوني ضيف كثير القرقرة عندكم وجزاكم الله خير