لازلت اقول واردد ولازلت مؤمن اننا شعب قوي جبار ونملك كل إماكنيات التميّز والتفوق ... إذا توجهنا صح ( حط تحتها ثلاثمية وخمس وتسعين خط )

مسألة توجيهنا صح هذي فيها نظر والسبب هو الخصوصيه السعوديه

خصوصيه سياسيه واجتماعيه واقتصاديه ودينيه

الخصوصيه اللي تخلي فكر الجماعه يسيطر على الفرد الا في حالات نادره وهالسيطره تحد من
انطلاق هالفرد .. عكس الغرب اللي يعطي اهميه للفرد وتخليه يبرز كل ابداعاته

في القتال والشجاعه أنتجت أمثله بارزه بغض النظر عن توجههم سواء إرهاب أو مقاومه وجهاد ، هم بالأساس مقاتلين وشجعان هذولا لو تمكنوا من ممارسه مواهبهم في القتال وشجاعتهم تحت مظله الوطن وش بيصير ؟

مفكرين .. علماء .. فنانين .. مفحطين .. لاعبين ..أطباء .. مخترعين .. باحثين .. مبدعين في مجالات كثيره .. حتى في النكته والسخريه من الأوضاع والدليل المسجات اللي تنتشر مع كل أزمه بدايه من أزمه سوق الأسهم

مبدعين نشوفهم كفلتات .. يعني خارج النص مو وفق إطار منظم ومدعوم ومهيأ له كل السبل .. لكن مجرد وجودهم يبين لك ان هالشعب يملك الكثير .. وحرام حرام الهدر وعدم الاستثمار .. لكن نقول حسبي الله على المستفيد اللي ماراح يستمر كثير في موقعه .. ولا وش معنى عمليه التخدير المستمر للتعليم الحكومي وتفريغه من محتواه ؟

الخصوصيه السعوديه في نظري ظاهره تستحق الوقوف طويلا والتأمل .. وخاصه بعد ان بدأت الحاله الفرديه المتميزه تترابط وتشكل وعي جمعي

ظاهره تستحق الإعجاب بهالشعب اللي قاعد يتحرك بصمت .. يتحرك من الداخل ويتبلور في انتظار لحظه التغيير

وهذا اللي اشوفه من بعض الأصدقاء من جنسيات اخرى لما احكي لهم عن بعض التحركات الاجتماعيه عندنا .. يندهشون ويبدون اعجابهم وخاصه انهم من دول فيها حريه تعبير وديموقراطيه

حتى تتضح الفكره نترك العموميات وندخل في التفاصيل واخترت مثال حمله خلوها تصدي لمقاطعه السيارات لأنها اقرب مثال امس كنت اتكلم فيه مع واحد لبناني يبلغ من العمر 60 سنه وأشرح له فكره الحمله وقصتها ...

بدات معه حبه حبه :

1 - بدات تنتشر أخبار ان شركات السيارات العالميه خسرانه مع الأزمه الماليه وانها قربت من الافلاس وتسريح ووظفين الخ الخ

2 - رده الفعل الطبيعيه انتشر بين الناس فكره مفادها ان الأسعار اكيد بتنزل عشان كذا اللي معه كاش المفروش يمسكه ويصبر كم شهر لأنه لو شرا الحين اكيد بيندم على اساس الأسعار بتنزل ... كان الكلام هذا شهر 8 او 9 عام 2008 وكان الوعد على بدايه 2009 وأسعار جديده

3 - فعلا بدأ الناس يمسكون قريشاتهم وخف الطلب على السيارات وبدأت فروع الوكالات تلاحظ هالشي

3 - نشرت بعض الصحف تقارير عن هالفكره الشائعه بين الناس ... وأخذت رأي بعض ممثلي وكلاء السيارات في السعوديه لتكون المفاجأه : تسفيه لرأي الناس ومعطيات حركه الاقتصاد العالمي .. ضحك على الذقون ... انكار هذه الإشاعات .. وإصرار على ان الأسعار باقيه او بترتفع

4 - الشارع السعودي أحس بأن هناك من يهين كرامته ومايحترم عقله ... وهنا انطلقت فكره مقاطعه وكلاء السيارات حتى يعرفون ان الله حق .. يعني تأديب ... بدات من الانترنت تحت شعار "خلوها تصدي" وصح ان أغلب الانترنت شباب لكن الشيبان واللي مالهم في الانترنت كانوا جناح آخر للحمله بدون وعي منهم بسبب قرارهم السابق بأنهم يمسكون الكاش

5 - رده فعل من الجانب المضاد : اجتماع وكلاء السيارات وقرارهم برفع الأسعار لموديلات 2009 عشان تمشي موديلات 2008 في ظل صمت تام من الجهات المسؤوله وتجاهل لقانون منع الاحتكار والتآمر ضد المستهلك

6 - كان الناس يعولون على الدعم الإعلامي لتكنن المفاجاه ان الصحف ماعاد تنشر أي شي فيه كلمه "مقاطعه" ، بل ان الموضوع تمادى باجتماع اللجنه الوطنيه للسيارات ( امحق وطنيه ) والبيان اللي طلعوه بأن مافيه نزول للسيارات والتحذير الموجه للناس بعدم الانقياد خلف الشائعات

7 - الشعور بالغبن عند الشارع يزود والإصرار يزود اكثر وتضاف جمله " وموديلها يعدي" إلى شعار الحمله في رد على محاوله تصريف موديل 2008 المتكدس وكان هالشي مع دخول يناير 2009 يعني بعد 3 شهور من بدايه الحمله تقريبا وسارت الحمله باتجاه انتظار ماتسفر عنه الآثار بعد مرور ست شهور ونشر تقارير الشركات العالميه عن أرباحها للربعين الأول والثاني

8 - يتأكد الخبر ان وزاره الإعلام اصدرت تعميم مباشر وصريح موجه لكل الصحف بعدم نشر أي شي عن حمله مقاطعه السيارات ، بالإضافه إلى تواطؤ رؤوساء التحرير الخايفين على فلوس الإعلانات اللي يسيل لها لعاب اطلق شنب ... صفحه وحده ملونه من الجميح تدخل على الجريده مبالغ تتجاوز 50 الف ريال ..

وهنا يزداد النشاط الإعلامي في الانترنت ويتم التركيز أكثر على إبراز تأثيرات الحمله :

أ - صور السيارات المتكدسه في الموانئ السعوديه والمخازن
ب - أخبار تغريق عبداللطيف جميل لسوق الكويت بسياراته ، والذيابه ماقصروا جابوا صوره من إعلان نص صفحه في جرايد كويتيه من وكيل تويوتا في الكويت يحذر من السيارات اللي تم تغريق السوق بها من دول مجاوره وانها غير مشموله بالضمان حق وكيل الكويت
ج - اكتشاف حركات نص كم يقوم بها بعض الوكلاء لتسويق سياراتهم ومن بينها حركه الشخص اللي يكتب في المنتديات ويقول ان عنده خصم خاص من ابوجميل ويجيب لك اللكزس بناقص 40 الف بشرط انك تعطيه عموله 10 الاف ( كشفوهم انهم مسوقين مدفوعين وان ابوجميل مايبغا يقول بشكل علني انه مسوي تخفيضات عشان مايبين ان الحمله ناجحه )
د - جولات ميدانيه تطوعيه لجمع معلومات عن حركه البيع في الفروع ( كانت 200 سياره مبيعات فرع واحد في الشهر لأحد الوكلاء وصارت مبيعات كل الفروع ماتتجاوز 20 سياره في الشهر )

&&&&&&&

جهد نقابي منظم بدون تنظيم وبدون إداره ... جهود ذاتيه فرديه ... بالمقابل حركات قذره من مراكز القوى الماليه في البلد بمسانده من النظام ... ولازال الصراع مستمرا ... لازالت معركه كسر العظم مستمره بين الشارع وبين وكلاء السيارات ومن يساندهم في المنظومه الحكوميه

يقول صديقي اللبناني ( اللي وصف حركات ابوجميل بأنها حركات مافيا ) : والله برافوو .. بشرفي .. لايمكن تلاقي مثل هالحاله في أي بلد في العالم الا في السعوديه . انتهى كلامه

والكلام هذا مدح ونقد في نفس الوقت ... نقد للفساد الحكومي اللي يحرم الشعب من أبسط حقوقه وهي انه يوصل صوته فمابالك انه ياخذ حقه .. ولكنه مدح لقدره الشعب على مواصله الكفاح ضد هالفساد

والسبب طبعا هي خصوصيتنا .. لأننا لو في بلد فيه ديموقراطيه وحريه تعبير خلنا نقول الكويت ولا لبنان مثلا .. كان ما أبدع الشعب في ابتكار كل مايمكن ان يخدم فكرته ... الضغط يولد الإبداع ... واحنا عندنا ضغط وهو انعدام حريه التعبير وعدم وصول الصوت لا في الإعلام الرسمي ولا عبر القنوات القانونيه الرسميه يعني مايقدرون مواطنين مثلا يروحون يرفعون قضيه او استجواب لوزير التجاره عن اللي قاعد يصير او حتى يطالبون بفتح تحقيق

عشان كذا بدا الشارع يخترع طرق أخرى لإيصال صوته والنضال من أجل هالقيمه المهمه

المسأله أكبر واوسع أبعاد من سعر سياره او سلعه .. المسأله وجوديه وحقوقيه

الشعب يقف وحيدا صامدا .. لامجلس شورى ولا وزاره تجاره ولا حمايه مستهلك ولا حقوق إنسان ... بل ان بعض هالجهات صارت ضده وياليتها كفت خيرها وشرها

الأمثله كثيره .. كانت بدايتها على ما أذكر بحمله "لا للاتصالات السعوديه" اللي انتهت بحجب موقع الحمله ... تواطؤ منظم ضد المجتمع المدني !

حمله مقاطعه السلع الغاليه في بدايات الغلاء .. أيضا تم محاربتها إعلاميا

والآن حمله خلوها تصدي .. وموديلها يعدي

بالمقابل حمله حقوق المعلمين ( بالمناسبه اهنيهم نموذج اخر على الكفاح المدني .. هذا واللي قاموا بها مو كل المعلمين ولايجون 10% من عددهم في المملكه ) لم تواجه أي تواطؤ إعلامي لحجبها .. الظاهر لأن وزاره التعليم مافيها فلوس

إلى الأمام ...لاحياه مع اليأس .. ياوطني

ملاحظه : الوطن هو : الشعب + الأرض .. ليس هناك من يدخل معنا في هالمعادله ( بعيدا عن مفهوم ولايه الأمر كما يطرح في وسائل الإعلام الرسميه ، ولي الأمر إن كان من الشعب وإليه فهو تاج على رأس الوطن .. وإن لم يكن فهو خارج معادله الوطن - مع حبي وتقديري الذي لا أخفيه للملك عبدالله حبيب الشعب .. لكن يد وحدة لرجل كبير في السن ماتصفق .. المشكله لاتتوقف عند شخص واحد في نظام يصبحك ويمسيك على فكره انك يالمواطن لك 5- 6 الاف ولي أمر )